នៅព្រឹកនេះថ្ងៃអង្គារ ទី១៦ ខែធ្នូ អង្គការការីតាសកម្ពុជា បានផ្តល់ជូននូវអង្ករចំនួន២៧តោន ជូនដល់ក្រុមគ្រួសារភៀសសឹកចំនួន ១,១០៥ គ្រួសារ ដែលកំពុងស្នាក់នៅក្នុងមណ្ឌលសុវត្ថិភាព ស្រុកបវេល ខេត្តបាត់ដំបង ក្រោមកិច្ចសហការជាមួយអាជ្ញាធរមូលដ្ឋានក្នុងខេត្តបាត់ដំបង។
លោកអេនរីគេ ហ្វីការេដូ ប្រធានក្រុមប្រឹក្សាអង្គការការីតាសកម្ពុជា និងជាអភិបាលព្រះសហគមន៍កាតូលិកភូមិភាគបាត់ដំបង បានមានប្រសាសន៍ទៅកាន់ជនភៀសសឹកទាំងអស់ថា «សូមបងប្អូនកុំមានអារម្មណ៍ឯកា ឬអស់សង្ឃឹមឡើយ! រាជរដ្ឋាភិបាល អង្គការការីតាសកម្ពុជា និងបណ្តាដៃគូអង្គការនានា នឹងឈរជាមួយបងប្អូនគ្រប់កាលៈទេសៈទាំងអស់»។
អង្គការការីតាសកម្ពុជា ជាសេនាធិការមួយរបស់ព្រះសហគមន៍កាតូលិក ក្នុងកិច្ចការមនុស្សធម៌ ហើយកន្លងមកអង្គការនេះ បានចូលរួមយ៉ាងច្រើនជួយដល់ជនភៀសសឹកកន្លងមកនៅតាមព្រំដែនកម្ពុជា-ថៃក្នុងពេលមានជម្លោះ។
លោក គឹម រតនា នាយកអង្គការការីតាសកម្ពុជា បានលើកឡើងថា អង្គការការីតាសកម្ពុជា ជាអង្គការមនុស្សធម៌ និងអភិវឌ្ឍន៍នៃព្រះសហគមន៍កាតូលិកកម្ពុជា ដែលមានបេសសកម្មរួមជាមួយរាជរដ្ឋាភិបាល ដើម្បីចូលរួមអភិវឌ្ឍន៍ និងឆ្លើយតបបន្ទាន់ចំពោះជនរងគ្រោះ។
លោកបានបញ្ជាក់ថា អង្គការការីតាសសូមចូលរួមជាមួយរាជរដ្ឋាភិបាល ដែលតែងតែយកចិត្តទុកដាក់ខ្ពស់ ចំពោះតម្រូវការមូលដ្ឋានរបស់ប្រជាជនភៀសសឹក ជាពិសេស ជម្រកបណ្តោះអាសន្ន ស្បៀងអាហារ ទឹកស្អាតប្រើប្រាស់ ជាពិសេសគឺសុខសុវត្ថិភាព នៅតាមមណ្ឌលសុវត្ថិភាព។
លោកនាយកប្រតិបត្តិរូបនេះ បានអំពាវនាវសុំឲ្យមានបទឈប់បាញ់ និងសន្តិភាព និងសូមឲ្យ«អន្តរជាតិជួយអន្តរាគមន៍ និងផ្តល់យុត្តិធម៌សម្រាប់ប្រទេសកម្ពុជា»។
នៅក្នុងជំរំជនភៀសសឹក អង្គការការីតាសកម្ពុជា នឹងតម្លើងធុងចម្រោះទឹកស្អាតសម្រាប់ប្រើប្រាស់ និងរៀបចំតង់ថ្នាក់រៀននិងបណ្ណាល័យចល័តបណ្តោះអាសន្ន ដើម្បីឱ្យកុមារនិងយុវជននៅទីនេះ មានកន្លែងរៀនបន្ត។ ក្នុងនោះដែរអង្គការនេះ បានសហការណ៍ជាមួយក្រសួងសុខាភិបាលដើម្បីផ្តល់សេវាកម្មសុខភាពផ្លូវចិត្តទាំងកុមារ និងមនុស្សពេញវ័យ ដើម្បីជួយស្មារតីនិងសុខភាពផ្លូវចិត្តក្នុងពេលមានសង្គ្រាមនេះ។
លោក យឹម សៀប អភិបាលរងនៃគណៈអភិបាលខេត្តបាត់ដំបងបានមានប្រសាសន៍ អរគុណដល់អង្គការការីតាសកម្ពុជា ដែលបានជួយដល់ជនភៀសសឹក។
លោកបន្តថា «ខ្ញុំគិតថាពេលនេះ ជាពេលដ៏លំបាក ហើយដែលត្រូវជួយពួកគាត់ ព្រោះថាការរត់គេចគ្រាប់ ជារឿងមួយលំបាក ហើយឥឡូវពួកគាត់ក៏ខ្វះខាតស្បៀងអាហារថែមទៀត»។ លោកបន្ថែមថា សកម្មភាពរបស់ អង្គការការីតាសនៅពេលនេះ ធ្វើឲ្យគាត់ «រំភើបសប្បាយរីករាយជាខ្លាំង»។
យោងតាមទិន្នន័យពីក្រសួងការពារជាតិកម្ពុជា ស្ថានភាពជម្លោះនៅតាមបណ្ដោយព្រំដែនដែលបានផ្ទុះឡើងវិញតាំងពីថ្ងៃទី៧ ខែធ្នូ បានបង្កឱ្យមានផលប៉ះពាល់យ៉ាងធ្ងន់ធ្ងរ ក្នុងនោះមាន ជនស៊ីវិលបាត់បង់ជីវិត ប្រមាណជាង ១០នាក់ និងមនុស្សជាច្រើននាក់ទៀតរងរបួស។ ជនភៀសសឹក មានចំនួនជិតកន្លះលាននាក់ កំពុងខ្វះខាតជម្រក និងស្បៀងអាហារ៕
ដោយ សេង មួយ
