ភ្នំពេញ៖ គម្រោងបរិស្ថានរបស់អង្គការជេស្វីតសឺវិសកម្ពុជា (JSC) បានរៀបចំវគ្គបណ្តុះបណ្តាលខ្លីមួយស្តីពីការបណ្តុះកូនឈើព្រៃ ដើម្បីពង្រឹងសមត្ថភាពក្រុមការងារថ្នាល JSC ប្រចាំរាជធានីភ្នំពេញ ខេត្តសៀមរាប និងព្រះសហគមន៍កាតូលិកតាហ៊ែន ខេត្តបាត់ដំបង។ សិក្ខាសាលានេះបានធ្វើឡើងកាលពីថ្ងៃអាទិត្យ ទី៧ ខែសីហា ឆ្នាំ២០២៥ ដោយមានអ្នកចូលរួមសរុប ១២ នាក់។ វគ្គបណ្តុះបណ្តាលនេះត្រូវបានដឹកនាំដោយលោក ទី ពុំ ជាមន្ត្រីបច្ចេកទេសថ្នាលមកពីវិទ្យាស្ថានស្រាវជ្រាវអភិវឌ្ឍន៍ព្រៃឈើ និងសត្វព្រៃ។ គោលបំណងសំខាន់នៃសិក្ខាសាលានេះ គឺដើម្បីផ្តល់ឱកាសដល់អ្នកបណ្តុះគ្រាប់ពូជទាំងអស់ ឲ្យបានយល់ដឹងកាន់តែស៊ីជម្រៅអំពីការងារថ្នាលបណ្តុះកូនឈើ។ ខ្លឹមសារបណ្តុះបណ្តាលរួមមាន៖ * របៀបជ្រើសរើសគ្រាប់ពូជដែលមានគុណភាពល្អ * វិធីសាស្រ្ត និងបច្ចេកទេសបណ្តុះកូនឈើឱ្យបានត្រឹមត្រូវ * របៀបថែទាំកូនឈើប្រណិតតាមប្រភេទនីមួយៗ គួរបញ្ជាក់ផងដែរថា អ្នកចូលរួមមកពីខេត្តសៀមរាប និងបាត់ដំបង សុទ្ធតែមានបទពិសោធន៍ក្នុងការបណ្តុះកូនឈើប្រណិតរួចមកហើយ។ ពួកគេតែងតែចែករំលែកកូនឈើដែលបានបណ្តុះទៅកាន់តំបន់គោលដៅផ្សេងៗដូចជា វត្តអារាម ព្រះសហគមន៍កាតូលិក និងសាលារៀន ជាដើម ដែលបានរួមចំណែកយ៉ាងសំខាន់ក្នុងការងារដាំដុះ និងថែរក្សាព្រៃឈើ។
