ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គប្រោសព្រះយេស៊ូទទួលព្រះជន្មផ្ទាល់របស់ព្រះអង្គ ព្រះអង្គក៏ប្រោសយើងខ្ញុំឱ្យមានកិត្តិយសជាបុត្រធីតារបស់ព្រះអង្គដែរ។ សូមទ្រង់ព្រះមេត្តាពង្រឹងជំនឿ សេចក្តីសង្ឃឹម និងសេចក្តីស្រឡាញ់របស់យើងខ្ញុំផង។ សូមប្រោសយើងខ្ញុំអាចឱ្យរស់នៅតាមឋានៈដ៏ថ្លៃថ្នូររបស់ខ្លួនផង។

អត្ថបទទី១៖ សូមថ្លែងព្រះគម្ពីរកិច្ចការរបស់គ្រីស្តទូត កក ៥,២៧-៣២.៤០-៤១

ក្រុមគ្រីស្តទូតឈរនៅមុខក្រុមប្រឹក្សាជាន់ខ្ពស់។ លោកមហាបូជាចារ្យ​សួរក្រុមគ្រីស្តទូតថា៖ «យើងបានហាមប្រាមអ្នករាល់គ្នាមិនឱ្យបង្រៀនប្រជា​ជនក្នុងនាមអ្នកនោះជាដាច់ខាត តែឥឡូវនេះអ្នករាល់គ្នាបែរជាបង្រៀន​គេពាសពេញក្រុងយេរូសាឡឹមទាំងមូលទៅវិញ!។ អ្នករាល់គ្នាក៏ចង់ទម្លាក់កំហុសនៃការប្រហារជីវិតបុរសនោះមកលើយើងថែមទៀតផង!»។
លោកសិលា និងគ្រីស្តទូតឯទៀតៗឆ្លើយឡើងថា៖ «យើងខ្ញុំត្រូវស្តាប់បង្គាប់ព្រះជាម្ចាស់ ជាជាងស្តាប់បង្គាប់មនុស្ស។ ព្រះនៃបុព្វបុរសរបស់យើងទ្រង់បានប្រោសលោកយេស៊ូដែលអស់លោកបានសម្លាប់ដោយព្យួរនៅលើឈើនោះឱ្យ​ភ្ញាក់ឡើង។ ព្រះជាម្ចាស់បានលើកលោកយេស៊ូឡើងដោយឫទ្ធិបារមីរបស់ព្រះ​អង្គ ហើយតែងតាំងលោកជាព្រះអម្ចាស់ និងជាព្រះសង្គ្រោះដើម្បីប្រោសប្រ​ទានឱ្យប្រជារាស្រ្តអុីស្រាអែលកែប្រែចិត្តគំនិត និងលើកលែងទោស​ឱ្យគេ​បានរួចពីបាប។ យើងខ្ញុំជាសាក្សីអំពីហេតុការណ៍ទាំងនេះ ហើយព្រះវិញ្ញាណ​ដ៏វិសុទ្ធ ដែលព្រះជាម្ចាស់ប្រទានដល់អស់អ្នកស្តាប់បង្គាប់ព្រះអង្គទ្រង់ក៏ជា​សាក្សីដែរ»។ គេហាមប្រាមមិនឱ្យប្រកាសអំពីព្រះនាមព្រះយេស៊ូទៀត រួចលែងឱ្យត្រឡប់​ទៅវិញ។ ក្រុមគ្រីស្តទូតចាកចេញពីក្រុមប្រឹក្សាជាន់ខ្ពស់ទាំងអរសប្បាយ ដ្បិត​ព្រះជាម្ចាស់បានប្រទានឱ្យគេមានកិត្តិយសរងទុក្ខទោសព្រោះតែព្រះនាម​ព្រះយេស៊ូ។

ទំនុកតម្កើងលេខ ៣០(២៩), ២-៦.១២-១៣ បទពាក្យ ៧​​​

២	បពិត្រព្រះម្ចាស់ដ៏ឧត្តម	ទូលបង្គំសូមលើកតម្កើង
	ព្រោះព្រះអង្គបានស្រង់ខ្ញុំឡើង	មិនឱ្យពួកខ្មាំងលេងសើចបាន	។
៣	ឱព្រះអម្ចាស់ដែលជាព្រះ	ប្រសើរពេកណាស់ខ្ពស់ថ្កើងថ្កាន
	ខ្ញុំអង្វរសុំក្តីសុខសាន្ត	ហើយទ្រង់ប្រោសប្រាណឱ្យបានជា	។
៤	បពិត្រព្រះម្ចាស់ដ៏ឧត្តម	ស្រង់ទូលបង្គំផុតវេទនា
	ចេញពីរណ្តៅជនមរណា	ប្រទានជីវ៉ារស់ជាថ្មី	។
៥	ឱ!អ្នករាល់គ្នាដែលជារាស្រ្ត	របស់ព្រះម្ចាស់ដ៏ប្រពៃ
	ចូរច្រៀងតម្កើងនាមម្ចាស់ថ្លៃ	វិសុទ្ធពេកក្រៃនៃព្រះអង្គ	។
៦	ព្រះអង្គខ្ញាល់តែមួយភ្លែតសោះ	ប្រណីសន្តោសមនុស្សទាំងពួង
	ពេលល្ងាចគេយំចិត្តមួរហ្មង	ព្រលឹមស្រាងឡើងអរសប្បាយ	។
១២	ព្រះអង្គធ្វើឱ្យផុតអស់ទុក្ខ	អាប់អួរសព្វមុខមិនមានហ្មង
	ឥតមានកាន់ទុក្ខរីករាយម្តង	ខោអាវល្អផងពាក់សប្បាយ	។
១៣	ខ្ញុំមិននៅស្ងៀមធ្វើឆ្មៃឆ្មើង	ស្មូតបទតម្កើងមិនជិនណាយ
	ឱ!ព្រះម្ចាស់អើយខ្ញុំឱនកាយ	បង្គំថ្វាត់ថ្វាយតម្កើងផង	។

អត្ថបទទី២៖ សូមថ្លែងព្រះគម្ពីរវិវរណៈ វវ ៥,១១-១៤

ខ្ញុំយ៉ូហាន និមិត្តឃើញហើយឮសូរសំឡេងទេវទូតយ៉ាងច្រើននៅជុំវិញបល្ល័ង្ក ជុំវិញសត្វលោកដែលមានជីវិត និងជុំវិញពួកព្រឹទ្ធាចារ្យ។ ទេវទូតទាំងនោះមានចំនួនរាប់ម៉ឺន រាប់សែនច្រើនអនេកអនន្ត នាំគ្នាបន្លឺសំឡេងឡើងយ៉ាងខ្លាំងថា៖ «កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជសម្បត្តិ ព្រះប្រាជ្ញាញាណ មហិទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង»។
ពេលនោះ ខ្ញុំឮសត្វលោកទាំងប៉ុន្មាននៅលើមេឃ នៅលើផែនដី នៅក្រោមដី នៅក្នុងសមុទ្រ ព្រមទាំងអ្វីៗទាំងអស់ដែលនៅស្ថានទាំងនោះបន្លឺសំឡេងឡើងថា៖ «សូមព្រះអង្គដែលគង់លើបល្ល័ង្ក និងកូនចៀមទទួលពាក្យសរសើរតម្កើង ព្រះកិត្តិនាម សិរីរុងរឿង និងព្រះចេស្តា អស់កល្បជាអង្វែងតរៀងទៅ!»។ បន្ទាប់មក សត្វមានជីវិតទាំងបួនពោលឡើងថា៖”អាម៉ែន!” ហើយព្រឹទ្ធាចារ្យក៏នាំគ្នាក្រាបថ្វាយ​បង្គំ។

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
ព្រះគ្រីស្តមានព្រះជន្មគង់នៅ។ ព្រះអង្គបានបង្កើតពិភពលោក។ ព្រះអង្គសង្គ្រោះមនុស្សលោក! អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ២១,១-១៩ (ឬយ៉ាងខ្លី ២១,១-១៤)

ព្រះយេស៊ូបានបង្ហាញខ្លួនឱ្យក្រុមសាវ័កឃើញម្តងទៀត នៅមាត់សមុទ្រ​ទីបេរីយ៉ាដ គឺព្រះអង្គបង្ហាញឱ្យគេឃើញដូចតទៅ៖
លោកសិលា លោកថូម៉ាស ហៅឌីឌីម លោកណាថាណាអែលពីភូមិកាណាក្នុងស្រុកាលីឡេ កូនទាំងពីររបស់លោកសេបេដេ និងសាវ័ករបស់ព្រះយេស៊ូពីរ​នាក់ទៀតនៅជុំគ្នា។ លោកសិលានិយាយទៅកាន់សាវ័កឯទៀតៗថា៖ «ខ្ញុំទៅ​រកត្រី»។ គេពោលតបមកគាត់វិញថា៖ «យើងទៅជាមួយដែរ»។ គេក៏នាំ​គ្នា​ចេញទៅ ហើយចុះទូកទាំងអស់គ្នា ប៉ុន្តែនៅយប់នោះគេឥតបានត្រីសោះ។ ព្រលឹមឡើង ព្រះ​យេស៊ូឈរនៅមាត់ច្រាំង ប៉ុន្តែក្រុមសាវ័កមិនដឹង​ថាជាព្រះ​អង្គទេ។ ព្រះយេស៊ូមានព្រះបន្ទូលទៅគេថា៖ «កូនចៅអើយ! មានអ្វីបរិភោគ​ឬទេ?»។ គេទូលព្រះអង្គថា៖ «គ្មានទេ»។ ព្រះអង្គមានព្រះបន្ទូលទៅគេថា៖ ​«ចូរទម្លាក់អួនខាងស្តាំទូកទៅ មុខជាបានត្រីមិនខាន»។ គេក៏ទម្លាក់អួន ហើយ​ពុំអាចលើកអួនឡើងវិញបានឡើយ ព្រោះមានត្រីច្រើនពេក។ ពេលនោះសាវ័ក​ដែលព្រះយេស៊ូស្រឡាញ់ និយាយទៅលោកសិលាថា៖ ​«ព្រះអម្ចាស់ទេតើ!»។ កាលលោកស៊ីម៉ូនសិលាឮថា៖ “ព្រះអម្ចាស់” ដូច្នេះ គាត់ក៏ស្លៀកពាក់ ដ្បិតគាត់​នៅខ្លួនទទេ រួចលោតទៅក្នុងទឹក។ សាវ័កឯទៀតៗនាំគ្នាចូលទូកទៅមាត់ច្រាំង ទាំងទាញអួនដែលមានត្រីពេញទៅជាមួយផង ព្រោះគេមិននៅឆ្ងាយ​ពីច្រាំង​ប៉ុន្មានទេ គឺប្រមាណជាពីររយហត្ថប៉ុណ្ណោះ។ គេឡើងទៅលើគោក ឃើញ​រងើក​ភ្លើងមានដាក់ត្រី និងនំប័ុងអាំងពីលើផង។ ព្រះយេស៊ូមានព្រះបន្ទូលទៅគេថា៖ «សុំយកត្រីដែលអ្នករាល់គ្នាទើបនឹងចាប់បានមកណេះ!»។ លោក​ស៊ីម៉ូន​ សិលា ចុះទៅក្នុងទូកទាញ​អួនដែលមានត្រីពេញមកដាក់លើគោក គឺ​មានត្រីធំៗចំនួនមួយរយហាសិបបី។ ទោះបីមានត្រីច្រើនយ៉ាងនេះក៏ដោយ ក៏អួនមិនធ្លាយដែរ។ ព្រះយេស៊ូមានព្រះបន្ទូលទៅគេថា៖ «នាំគ្នាមកបរិភោគទៅ»។ គ្មានសាវ័កណាម្នាក់ហ៊ានសួរព្រះអង្គថា៖ “លោកជានរណា” ឡើយ ដ្បិតគេដឹងថាជាព្រះអម្ចាស់ទាំងអស់គ្នា។ ព្រះយេស៊ូយាងទៅជិតពួកគេ ទ្រង់​យកនំប័ុងមកប្រទានឱ្យគេ ហើយយកត្រីមកប្រទានឱ្យគេដែរ។
តាំងពីព្រះអង្គតើនឡើងពីចំណោមមនុស្សស្លាប់មក នេះជាលើកទីបីហើយដែលព្រះយេស៊ូសម្តែងព្រះអង្គឱ្យក្រុមសាវ័កឃើញ។

ប្រសិនបើអានយ៉ាងខ្លីសូមឈប់ត្រឹមនេះ

លុះគេបានបរិភោគរួចរាល់ហើយ ព្រះយេស៊ូមានព្រះបន្ទូលសួរលោកសិលាថា៖ «ស៊ីម៉ូនកូនលោកយ៉ូហានអើយ! តើអ្នកស្រឡាញ់ខ្ញុំជាងអ្នកទាំងនេះស្រ​ឡាញ់ខ្ញុំឬ?»។ គាត់ទូលព្រះអង្គថា៖ «ព្រះអម្ចាស់! ព្រះអង្គជ្រាបស្រាប់​ហើយថា ខ្ញុំស្រឡាញ់ព្រះអង្គ»។ ព្រះយេស៊ូមានព្រះបន្ទូលទៅគាត់ថា៖ «សុំ​ថែរក្សាកូនចៀមរបស់ខ្ញុំផង!»។ ព្រះអង្គមានព្រះបន្ទូលសួរគាត់ជាលើកទីពីរ​ថា៖ «ស៊ីម៉ូនកូនលោកយ៉ូហាន អើយ! តើអ្នកស្រឡាញ់ខ្ញុំឬទេ?»។ លោកសិលាទូលថា៖ «ព្រះអម្ចាស់ព្រះអង្គជ្រាបស្រាប់ហើយថា ខ្ញុំស្រឡាញ់ព្រះអង្គ»។ ព្រះយេស៊ូមានព្រះបន្ទូលទៅគាត់ថា៖ «សុំឃ្វាលហ្វូងចៀមរបស់ខ្ញុំផង!»។ ព្រះ​អង្គមានព្រះបន្ទូលសួរគាត់ជាលើកទីបីថា៖ «ស៊ីម៉ូនកូនលោកយ៉ូហានអើយ! តើអ្នកស្រឡាញ់ខ្ញុំឬទេ»។ លោកសិលាព្រួយចិត្ត ព្រោះព្រះអង្គសួរគាត់ដល់​ទៅបីលើកថា “អ្នកស្រឡាញ់ខ្ញុំឬទេ? ដូច្នេះ។ លោកទូលតបទៅព្រះអង្គថា៖ «បពិត្រព្រះអម្ចាស់! ព្រះអង្គជ្រាបអ្វីៗសព្វគ្រប់ទាំងអស់ ព្រះអង្គជ្រាបស្រាប់​ហើយថា ខ្ញុំស្រឡាញ់ព្រះអង្គហើយ»។ ព្រះយេស៊ូមានព្រះបន្ទូលទៅគាត់ថា៖ «សុំថែរក្សាហ្វូងចៀមរបស់ខ្ញុំផង។ ខ្ញុំសុំប្រាប់ឱ្យអ្នកដឹងច្បាស់ថា កាលអ្នកនៅក្មេង អ្នកក្រវាត់ចង្កេះខ្លួនឯង ហើយអ្នកទៅ​ណាតាម​តែចិត្ត​អ្នក​ចង់។ ​​លុះដល់អ្នក​ចាស់ អ្នកនឹងលើកដៃឡើង  ហើយមានម្នាក់ទៀតក្រវាត់ចង្កេះ​ឱ្យអ្នក ទាំងនាំ​អ្នកទៅកន្លែងដែលអ្នកមិនចង់ទៅថែមទៀតផង»។ ព្រះអង្គមានព្រះបន្ទូល​ដូច្នេះបង្ហាញអំពីរបៀបដែលលោកសិលាស្លាប់ ដើម្បីសម្តែងសិរីរុងរឿងរបស់​ព្រះជាម្ចាស់។ បន្ទាប់មក ព្រះអង្គមានព្រះបន្ទូលទៅគាត់ថា៖ «សុំអញ្ជើញមក​តាមខ្ញុំ!»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! សូមទ្រង់ព្រះមេត្តាទទួលតង្វាយពីព្រះសហគមន៍។ ព្រះអង្គបានប្រោសឱ្យយើងខ្ញុំរួមនឹងសក្ការបូជារបស់ព្រះយេស៊ូគ្រីស្តដែលបូជាព្រះជន្ម សូមទ្រង់ព្រះមេត្តាប្រោសប្រទានឱ្យយើងខ្ញុំរួមរស់ជាមួយព្រះអង្គនៅស្ថានបរមសុខអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះអម្ចាស់ជាព្រះបិតា! យើងខ្ញុំសូមលើកតម្កើងសិរីរុងរឿងរបស់ព្រះអង្គ ជាពិសេស នៅថ្ងៃនេះដែលព្រះគ្រីស្តបានបូជាព្រះជន្ម ដូចជាកូនចៀមដែលគេធ្លាប់យកទៅធ្វើយញ្ញក្នុងបុណ្យចម្លង។ ព្រះគ្រីស្តបានប្រោសបុត្រធីតាជាច្រើនឱ្យទទួលជីវិតអស់កល្បជានិច្ច!។ អស់អ្នកជឿក៏អាចចូលព្រះរាជ្យនៃស្ថានបរមសុខបានដែរ។ ពិតមែនហើយ! ដោយព្រះគ្រីស្តសោយទិវង្គត ព្រះអង្គបានប្រោសយើងខ្ញុំឱ្យរួចពីអំណាច​នៃសេចក្តីស្លាប់! ដោយព្រះគ្រីស្តមានព្រះជន្មថ្មី យើងខ្ញុំម្នាក់ៗក៏ទទួលជីវិតថ្មីដែរ។ អាស្រ័យហេតុនេះហើយ បានជាយើងខ្ញុំជាប្រជាជនដែលទទួលអគ្គសញ្ញាជ្រមុជទឹកទូទាំងសកលលោកមានអំណរសប្បាយ ហើយសូមចូលរួមជាមួយអស់ទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គដោយប្រកាសថា៖ “ព្រះដ៏វិសុទ្ធ!” ។

ពាក្យអរព្រះគុណ

បពិត្រព្រះបិតាប្រកបដោយព្រះហឫទ័យមេត្តាករុណាយ៉ាងក្រៃលែង! ព្រះអង្គបានប្រោសយើងខ្ញុំឱ្យទទួលជីវិតថ្មីដោយសារជំនឿ និងដោយសារអគ្គសញ្ញានានា។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំជានិច្ច ឱ្យសុខចិត្តរួមស្លាប់រួមរស់ជាមួយព្រះយេស៊ូគ្រីស្តគ្រប់ពេលវេលា សូមណែនាំយើងខ្ញុំឱ្យបានសិរីរុងរឿងរួមជាមួយព្រះអង្គផង។