យុវជនចំនួន១៦៨នាក់ មកពីព្រះសហគមន៍នានាក្នុងភូមិភាគកំពង់ចាម បានរិះគិតរួមគ្នាអំពីជីវិតនៃការត្រាស់ហៅរបស់ព្រះជាម្ចាស់ចំពោះពួកគេម្នាក់ៗ នៅព្រះសហគមន៍កាតូលិក សន្ត អន់ដ្រេ ក្នុងខេត្តកំពង់ចាម ក្រោមប្រធានបទ “អំណរនៃការត្រាស់ហៅ” កាលពីថ្ងៃទី០៨-០៩ ខែមីនាកន្លងទៅ។
កម្មវិធីត្រាស់ហៅនេះ រៀបចំឡើងដោយគណៈកម្មការត្រាស់ហៅរបស់ភូមិភាគកំពង់ចាម ដែលធ្វើជារៀងរាល់ឆ្នាំ ក្រោមអធិបតីភាពរបស់លោកអភិបាល សិលា សួន ហង្សលី ជាអភិបាលព្រះសហគមន៍កាតូលិកភូមិភាគកំពង់ចាម ចូលរួមដោយលោកបូជាចារ្យ ក្រុមដូនជីសាឡេស៊ាននិងក្រុមស្រឡាញ់ព្រះឈើឆ្កាងក្នុងភូមិភាគនេះ។
លោកអភិបាល ហង្សលី បានមានប្រសាសន៍ថា ត្រាស់ហៅ និយាយអំពីព្រះជាម្ចាស់ត្រាស់ហៅយើង ឱ្យ បំពេញមុខងារផ្សេងៗគ្នា អាចជាបូជាចារ្យ បព្វជិត-ជិតា អ្នកមានគ្រួសារ អ្នកនៅលីវ អ្នកស្ម័គ្រចិត្ត ដើម្បីបំពេញបេសកកម្មដែលព្រះជាម្ចាស់ប្រទានឱ្យតាមរយៈព្រះសហគមន៍។
ពន្យល់អំពីប្រធានបទក្នុងពិធីបើកការត្រាស់ហៅនេះ លោកអភិបាលបានពន្យល់ពាក្យថា «អំណរនិងភាពសប្បាយរីករាយគឺខុសគ្នា»។
លោកបញ្ជាក់ថា ពេលណាយើងនិយាយពីភាពរីករាយ គឺជាអ្វីមួយដែលទាក់ទងជាមួយអារម្មណ៍ខាងក្រៅ ការសប្បាយតែមួយភ្លែតតាមអ្វីដែលទាក់ទាញអារម្មណ៍របស់យើង។ ប៉ុន្តែ “អំណរ” គឺជាអ្វីដែលទាក់ទងនឹងជីវិតផ្លូវវិញ្ញាណ ចិត្តនិងបេះដូងរបស់យើង ហើយជ្រៅជាងភាពរីករាយ ដែលនាំឲ្យយើងអរសប្បាយពេញលក្ខណៈ និងជាអំណរដែលព្រះជាម្ចាស់ប្រទានឱ្យ ឬក៏យើងហៅថា «សុភមង្គលអស់មួយជីវិត»។
លោកបូជាចារ្យ ស្ទេផាន សែសាត ជាវាគ្មិនក្នុងកម្មវិធី បានពន្យល់អំពីការត្រាស់ហៅ ដោយលោកនិយាយថា «ព្រះជាម្ចាស់ត្រាស់ហៅយើងម្នាក់ៗឱ្យស្គាល់ ស្រឡាញ់ និងបម្រើព្រះជាម្ចាស់»ដើម្បីឲ្យយើងក្លាយជាជនដ៏វិសុទ្ធ។
នៅក្នុងកម្មវិធីនេះផងដែរ ក្រុមគណៈកម្មការបានអញ្ជើញលោកបូជាចារ្យ ដូនជី និងគ្រីស្តបរិស័ទ ចំនួនបួននាក់ ដើម្បីចែករំលែកនូវបទពិសោធ។ លោកបូជាចារ្យ អាឡិចសិនដ្រូ ម៉ូទី ចែករំលែកអំពីជីវិតជាបូជារ្យ។ លោក ផល មើយ ជាគ្រូអប់រំជំនឿចែករំលែកអំពីកិច្ចការងារក្នុងព្រះសហគមន៍ និងជីវិតជាគ្រហស្ថ។ ក្រុមគ្រួសារលោក ដាំ សុដា ចែករំលែកអំពីជីវិតជាគ្រួសារនិងការរស់នៅជាគ្រីស្តបរិស័ទ។ ដូនជី តេរេសា ចាន់ រដ្ឋា ចែករំលែកអំពីជីវិតជាដូនជីកាតូលិក។
ស្រ៊ាន ស្រីនៅ ជាសិស្សថ្នាក់ទី១២ នៃសាលាចម្រើនវិជ្ជាខេត្តព្រៃវែង ឲ្យដឹងថា នាងមកចូលរួមកម្មវិធីត្រាស់ហៅនេះ ដើម្បីឈ្វេងយល់នូវជីវិតផ្សេងៗនៃការត្រាស់ហៅរបស់ព្រះជាម្ចាស់ និងចង់ដឹងថា ព្រះជាម្ចាស់មានគម្រោងការណ៍អ្វីសម្រាប់រូបនាង។
កម្មវិធីរយៈពេល២ថ្ងៃនេះ បានជួយដល់យុវតី សារុន រក្សា ជាសិស្សថ្នាក់ទី១១ នៃសាលាចម្រើនវិជ្ជាសាខាកំពង់ចាម អាចរកឃើញរបៀបបម្រើក្នុងព្រះសហគមន៍ក្នុងគណៈកម្មការពិធីបុណ្យ និងកម្មវិធីផ្សេងៗទៀត។
យុវជន រចំ លួន ជាជនជាតិដើមភាគតិចចារ៉ាយ មកពីព្រះសហគមន៍រតនគិរី និយាយថា នេះជាលើកទីបីហើយដែលគាត់ចូលរួមកម្មវិធីនេះ។ លួនបន្តថា កម្មវិធីត្រាស់ហៅនេះជួយឲ្យគាត់មានទំនាក់ទំនងជាមួយយុវជនដទៃទៀត ទទួលចំណេះដឹងថ្មីៗ ចេះសហការជាក្រុម និងស្គាល់គ្នាទៅវិញទៅមក។
ក្រោយបញ្ចប់កម្មវិធីនៅថ្ងៃទី២ មានយុវ័នចំនួន៦នាក់ និងយុវតីចំនួន១២ ស្ម័គ្រចិត្តបន្តឈ្វេងយល់ស៊ីជម្រៅអំពីជិវិតជាអ្នកបួស ដែលនឹងត្រូវណែនាំបន្ថែមទៀតជាមួយគណៈកម្មការនៃការត្រាស់ហៅក្នុងភូមិភាគ។
ដូនជីក្លារ៉ា ដូត ស្រីឡៃ នៃក្រុមគ្រួសារស្រឡាញ់ព្រះឈើឆ្កាងនិងជាសមាជិកគណៈកម្មការរៀបចំកម្មវិធីត្រាស់ហៅក្នុងឆ្នាំ២០២៥ បានមានប្រសាសន៍ថា គណៈកម្មការនៃការត្រាស់ហៅ នឹងធ្វើដំណើរទៅខេត្តនានា ដើម្បីសួរសុខទុក្ខយុវជនដែលចាប់អារម្មណ៍នឹងការត្រាស់ហៅ។ ដូនជីរូបនេះ បន្ថែមថា នៅខែវិច្ឆិកា គណៈកម្មការនិងយុវជន នឹងធ្វើដំណើរទៅទីក្រុងភ្នំពេញ ដើម្បីទស្សនកិច្ច ផ្ទះអ្នកបួសនីមួយៗ ក៏ដូចជាទេវវិទ្យាល័យក្នុងប្រទេសកម្ពុជា។
ដូនជីស្រីឡៃ សំណូមពរ ឲ្យយុវជនទាំងអស់ ហ៊ានឆ្លើយតបការត្រាស់ហៅរបស់ព្រះជាម្ចាស់ និងសូមឲ្យពួកគាត់ចេះយកគំរូតាមព្រះនាងម៉ារី ដែលសុខចិត្តទទួលគម្រោងការណ៍របស់ព្រះជាម្ចាស់ ដោយឱ្យព្រះយេស៊ូចាប់កំណើតជាមនុស្ស៕
ដោយ ដាំ សុដា
