ជម្រាបសួរបងប្អូនទាំងអស់គ្នា ឆ្នាំនេះជាឆ្នាំពិសេសសម្រាប់ព្រះសហគមន៍ គឺឆ្នាំនៃព្រះមហាករុណាទិគុណ។ ឆ្នាំនៃព្រះមហាករុណាទិគុណមានន័យថា ឲ្យយើងមានឱកាសទៅជិតស្និទ្ធនិងព្រះអង្គ និងកែប្រែចិត្តគំនិត។ ព្រះសហគមន៍ភូមិភាគបាត់ដំបងបានរៀបចំ៦កន្លែង ដើម្បីឲ្យយើងធ្វើបូជនីយចរ។ នៅពេលយើង​ទៅ​​ដល់ព្រះសហគមន៍នីមួយៗ យើងអធិដ្ឋាន ចូលរួមអភិបូជា ទទួលស្រាយបាប និងយើងរួមគ្នាពឹងលើព្រះជាម្ចាស់ ឲ្យយើងទៅជាមនុស្សល្អប្រសើរជាង សូមព្រះជាម្ចាស់ប្រទានពរឲ្យយើង និងសម្រួលភាពខុសឆ្គងរបស់យើង។

ព្រះសហគន៍កាតូលិកភូមិភាគបាត់ដំបង យើងបានជ្រើសរើស៦កន្លែង៖

១- ព្រះវិហារ សន្តយ៉ាកុប នៅពោធិ៍សាត់ (តំបន់ទន្លេ)

២- ព្រះវិហារ ព្រះជាម្ចាស់លើកព្រះនាងម៉ារីឡើងស្ថានបរមសុខ បាត់ដំបង (តំបន់បាត់ដំបង)

៣- ព្រះវិហារ សន្តីតេរេសា នៃព្រះកុមារយេស៊ូ ចំណោម (តំបន់អង្គរ)

៤- ព្រះវិហារ សន្តីម៉ារី តាអំ (តំបន់អង្គរ)

៥- ព្រះវិហារ សន្តអ៊ីញ៉ាស្យូ ពាក់ស្នែង (តំបន់អង្គរ)

៦- ព្រះវិហារ សន្តីតេរេសា នៅក្រុងអាវីឡា កំពង់គោ (តំបន់កំពង់ធំ)

នៅព្រះសហគមន៍ទាំង៦កន្លែងនេះ យើងត្រូវឆ្លៀតពេលទៅសួរសុខទុក្ខបងប្អូនគ្រីស្តបរិស័ទ​ អធិដ្ឋាន ចូលរួមអភិបូជា ឲ្យយើងរួមគ្នាជិតស្និទ្ធនឹងព្រះអង្គ បូជនីយចរទៅរកព្រះអង្គ យើងទទួលស្រាយបាប និងទទួលព្រះពរពីព្រះជាម្ចាស់ ដើម្បីឲ្យយើងហ៊ានកែប្រែចិត្តគំនិត។ បន្តិចទៀតពេលណាយើងចាប់ផ្ដើមរដូវត្រណម (រដូវអប់រំពិសេស) ជារដូវមួយល្អពិសេស ដើម្បីឲ្យយើងចាប់ផ្ដើមបូជនីយចរទៅគ្រប់កន្លែង នៅក្នុងព្រះសហគមន៍យើងរៀបចំសៀវភៅតូចមួយ ដែល​ខ្ញុំ​ហៅ​ថា ជា​លិខិត​ឆ្លងដែន (passport)ឆ្ពោះ​ទៅ​កាន់​សេចក្តីសង្ឃឹម។ សម្រាប់​សៀវភៅនេះ ពេលណាយើងទៅកន្លែងនីមួយៗ យើងសរសេរនៅកន្លែងដែលយើងបានទៅ និងយើងបានស្រាយបាបនៅកន្លែងនោះ។ សូមបងប្អូនរួមគ្នា ធ្វើបូជនីយចរនៅក្នុងឆ្នាំព្រះមហាករុណាទិគុណនេះ ទៅគ្រប់៦កន្លែងដែលយើងមាន ដើម្បី​ឱ្យ​បងប្អូនទទួលព្រះពរពីព្រះជាម្ចាស់ អធិដ្ឋានជិតស្និទ្ធនឹងព្រះអង្គ ដើរតាមមាគ៌ារបស់ព្រះអង្គ បូជនីយចរតាមមាគ៌ារបស់ព្រះអង្គ។ ជូនពរក្នុងឆ្នាំនេះឲ្យយើងទទួលព្រះអំណោយទានពីព្រះជាម្ចាស់ គឺស្គាល់ ស្រឡាញ់ ​និងដើរតាមព្រះអង្គ។

អំណរសប្បាយរបស់ព្រះជាម្ចាស់ជាកម្លាំងរបស់យើង!

ព្រះវិហារ សន្តីតេរេសានៃព្រះកុមារយេស៊ូ ចំណោម

ថ្ងៃទី ២៥ ខែកុម្ភៈ ឆ្នាំ២០២៥

អភិបាល អេនរីគេ ហ្វីការេដូ