អត្ថបទទី១៖ សូមថ្លែងព្រះគម្ពីរលោកបេនស៊ីរ៉ាក់ បសរ ៤,១១-១៩

ព្រះប្រាជ្ញាញាណផ្តល់កិត្តិយសឱ្យកូនចៅរបស់ព្រះអង្គ ព្រះអង្គតាមថែរក្សាអស់​អ្នកដែលស្វែងរកព្រះអង្គ។ អ្នកណាស្រឡាញ់ព្រះប្រាជ្ញាញាណ អ្នកនោះស្រឡាញ់​ជីវិត។ អស់អ្នកដែលក្រោកតាំងពីព្រលឹមស្វែងរកព្រះប្រាជ្ញញាណ មុខជាបានពោរ​ពេញដោយអំណរ។ អ្នកណាកាន់ព្រះប្រាជ្ញាញាណជាប់ អ្នកនោះនឹងទទួលសិរីរុងរឿងទុកជាមត៌ក គេទៅកន្លែងណា ព្រះអម្ចាស់ប្រទានពរឱ្យគេនៅកន្លែងនោះ។ អ្នកណា​បម្រើព្រះប្រាជ្ញាញាណ អ្នកនោះគោរពបម្រើព្រះដ៏វិសុទ្ធ។ អ្នកណាស្រឡាញ់ព្រះ​ប្រាជ្ញាញាណ ព្រះអម្ចាស់ក៏ស្រឡាញ់អ្នកនោះដែរ។ អ្នកដែលស្ដាប់តាមព្រះប្រាជ្ញាញាណនឹងកាត់ក្តីដោយយុត្តិធម៌ អ្នកជាប់ចិត្តនឹងព្រះប្រាជ្ញាញាណនឹងរស់នៅយ៉ាងសុខសាន្ត។ អ្នកផ្ញើជីវិតលើព្រះប្រាជ្ញាញាណ នឹងទទួលព្រះប្រាជ្ញាញាណទុកជាមត៌ក​ ហើយពូជពង្សរបស់គេក៏ទទួលមត៌កនេះដែរ។ មុនដំបូង ព្រះប្រាជ្ញាញាណណែនាំគេ​ឱ្យដើរតាមផ្លូវដ៏ពិបាក ទាំងធ្វើឱ្យគេភ័យខ្លាច និងតក់ស្លុត។ ព្រះអង្គប្រដៅគេ​ដោយលត់ដំគេ រហូតដល់អាចទុកចិត្តលើគេបាន។ ព្រះអង្គល្បងលមើលចិត្តគេដោយសារបទបញ្ជារបស់ព្រះអង្គ។ បន្ទាប់មក ព្រះប្រាជ្ញាញាណណែនាំគេតាមសម្រួល ​ហើយធ្វើឱ្យគេមានអំណរសប្បាយ។ ព្រះអង្គនឹងសម្តែងការអាថ៌កំបាំងរបស់ព្រះអង្គ​ឱ្យគេស្គាល់ផង។ ប្រសិនបើគេវង្វេងឆ្ងាយពីព្រះប្រាជ្ញញាណ ព្រះអង្គនឹងបោះបង់​គេចោល ហើយបណ្តោយឱ្យគេវិនាស។

ទំនុកតម្កើងលេខ ១១៩ (១១៨),១៦៥.១៦៨.១៧១-១៧២.១៧៤-១៧៥ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ១៤,៦-៩

អាលេលូយ៉ា! អាលេលូយ៉ា!
​ខ្ញុំហ្នឹងហើយជាសេចក្តីពិត និងជាជីវិត។ គ្មាននរណាម្នាក់អាចទៅគាល់ព្រះបិតាបានឡើយ លើកលែងតែទៅតាមរយៈខ្ញុំ។អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ៩,៣៨-៤០

លោកយ៉ូហានទូលព្រះយេស៊ូថា៖ «ព្រះគ្រូ! យើងខ្ញុំបានឃើញបុរសម្នាក់ដេញខ្មោចក្នុងនាមព្រះគ្រូ។ យើងខ្ញុំបានឃាត់គេ តែគេមិនមកតាមយើងខ្ញុំទេ»។ ព្រះយេស៊ូមាន​ព្រះបន្ទូលថា៖ «កុំឃាត់គេអី ពុំដែលមាននរណាអាចធ្វើការអស្ចារ្យក្នុងនាមខ្ញុំ រួចបែរ​ជានិយាយអាក្រក់អំពីខ្ញុំភ្លាមនោះឡើយ ដ្បិតអ្នកណាមិនជំទាស់នឹងយើង អ្នកនោះ​ជាគ្នាយើងហើយ»។