ក្នុងពិធីបើកបវេសនកាលសាលាមត្តេយ្យអូរពពូល លោក សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម ឲ្យអាណាព្យាបាលកុមារតូចជួយអប់រំបន្ថែម ទាំងចំណេះដឹង និងអនាម័យខ្លួនប្រាណដល់កូនៗរបស់ពួកគាត់។
សាលាមត្តេយ្យអូរពពូល ជាសាលារបស់ព្រះសហគមន៍កាតូលិកស្ថិតក្នុងភូមិអូរពពូល ឃុំគងជ័យ ស្រុកអូររាំងឪ ខេត្តត្បូងឃ្មុំ ដែលបានបង្កើតឡើងក្នុងឆ្នាំ ២០១០ ហើយបានជួសជុលនិងប្រើប្រាស់ឡើងវិញក្នុងឆ្នាំ២០១៤ បន្ទាប់មកត្រូវបានផ្អាកសកម្មភាពមួយរយៈពេល និងក្នុងឆ្នាំ២០២៣នេះ បានរៀបចំឲ្យមានសកម្មភាពឡើងវិញ។ សាលាមត្តេយ្យនេះ បច្ចុប្បន្នស្ថិតក្រោមការទទួលខុសត្រូវរបស់លោកបូជាចារ្យ ហ្គីយ៉ូម ពីនហ្គាត។
ក្នុងកម្មវិធីបើកបវេសនកាលឆ្នាំសិក្សាថ្មីនេះ បានធ្វើឡើងនៅថ្ងៃទី១៤ ខែធ្នូ ដោយមានមន្ត្រីរដ្ឋាភិបាល អាណាព្យាបាលសិស្ស និងសិស្សានុសិស្សចូលរួមជិត១០០នាក់។
ជាមួយគ្នានេះ លោកអភិបាលព្រះសហគមន៍ សូមឲ្យលោកគ្រូអ្នកគ្រូខិតខំបន្តអប់រំកុមារឲ្យល្អប្រសើរ ដើម្បីឲ្យពួកគាត់អាចក្លាយជាពលរដ្ឋល្អក្នុងពេលអនាគត។
ក្នុងនោះដែរ លោកអភិបាលសំណូមពរឲ្យមាតាបិតាជួយសហការជាមួយអ្នកគ្រូបង្រៀន ជួយដល់កូនសិស្សឲ្យចេះថែរក្សាបរិស្ថាននិងអនាម័យខ្លួនប្រាណ ដើម្បីកាត់បន្ថយជំងឺផ្សេងផ្សេង។
តាមអ្នកគ្រូ ឧត្តម ស្រីវីន ដែលគ្រប់គ្រងសាលាមត្តេយ្យនេះ បានឲ្យដឹងថា នៅក្នុងភូមិអូរពពូលនេះមានសាលាមត្តេយ្យនេះតែមួយគត់ ហើយបច្ចុប្បន្ននេះ សាលាមានថ្នាក់រៀនចំនួន១ ដែលមានកូនសិស្សចំនួន២០នាក់។
ព្រះសហគមន៍កាតូលិកចម្លាក់ សព្វថ្ងៃមានសាលាមត្តេយ្យ៤កន្លែង គឺ សាលាមត្តេយ្យពន្លឺព្រះអាទិត្យនៅចម្លាក់ សាលាមត្តេយ្យត្រពាំងកណ្តោល សាលាមត្តេយ្យនៅភូមិអូរពពូល និងសាលាមត្តេយ្យនៅភូមិទួល៕
ដោយ៖ ម៉េង ភីឡុង
