វិទ្យាល័យចម្រើនវិជ្ជា សាខាថ្មពេជ្រ នៅខេត្តត្បូងឃ្មុំបានរៀបចំកម្មវិធីបិទឆ្នាំសិក្សា សម្រាប់សិស្សថ្នាក់ទី១២ ជំនាន់ទី២ ឆ្នាំសិក្សា ២០២២-២០២៣ ព្រមទាំងកម្មវិធីរំលឹកគុណអាណាព្យាបាល និងគ្រូបង្រៀនកាលពីថ្ងៃអង្គារ ទី១៤ ខែវិច្ឆិកា កន្លងទៅ ក្រោមអធិបតីភាពរបស់លោក សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម លោកបូជាចារ្យ បងស្រី លោកគ្រូអ្នកគ្រូ អាណាព្យាបាល ព្រមទាំងសិស្សានុសិស្សនៃវិទ្យាល័យចម្រើនវិជ្ជាជាច្រើនកុះករ។
ក្នុងកិច្ចបើកកម្មវិធី លោក ជុន ស៊ីម នាយកសាលា បានដាស់តឿនដល់សិស្សថ្នាក់ទី១២ដែលបានប្រឡងបាក់ឌុប ត្រៀមខ្លួននិងចិត្តគំនិតដើម្បីទទួលលទ្ធផលហើយត្រូវមានសង្ឃឹមជានិច្ច។ លោកសូមយុវសិស្សទាំងអស់ យកអ្វីដែលគ្រូបានបង្រៀន ទាំងសីលធម៌ សុជីវធម៌ ទៅអនុវត្តន៍នៅសកលវិទ្យាល័យ។
លោកអភិបាល សិលា សួន ហង្សលី មានប្រសាសន៍ថា «ក្នុងសម័យសង្គ្រាមឪពុកម្តាយយើងអត់មានឱកាសរៀនទេ ត្រូវធ្វើការជាច្រើន ដោយមានទុក្ខលំបាក។ តែក្នុងសម័យនេះ យើងមានឱកាសច្រើនដើម្បីទៅរៀន ហើយយើងមានមេរៀន ឬវិធីជាច្រើនក្នុងការស្រាវជ្រាវមេរៀនដោយខ្លួនឯង សូមកុំឲ្យឱកាសនេះកន្លងផុតទៅ»។
លោកអភិបាលបានបន្តទៀតថា ក្នុងសង្គមមានការល្បួងជាច្រើន ដែលអាចនាំឲ្យបរាជ័យក្នុងការសិក្សា និងអនាគត ហើយដើម្បីជួយដល់ខ្លួនឯងផង និងជួយដល់សង្គមត្រូរៀនបន្ថែមនូវ មេរៀនបំណិនជីវិតឲ្យបានច្រើន។
នៅពិធីរំលឹកគុណអាណាព្យាបាលនោះផងដែរ ភា គន្ធា តំណាងឲ្យសិស្សានុសិស្សថ្នាក់ទី១២ បានឡើងថ្លែងអំណរគុណដល់អាណាព្យាបាលដែលបានចិញ្ចឹមតាំងពីតូច និងថែរក្សាដោយក្តីស្រឡាញ់ និងបានអប់រំរៀនសូតរហូតដល់ពេលនេះ។
គន្ធា ឲ្យដឹងថា «នៅពេលនេះ កូនទាំងអស់គ្នាសូមខមាលទោសនូវរាល់កំហុងខុសឆ្គងដែលបានប្រព្រឹត្តចំពោះឪពុកម្តាយ នៅថ្ងៃនេះកូនទាំងអស់គ្នាត្រូវតាំងចិត្តតបស្នងសងគុណ និងសូមឲ្យអ្នកមានគុណទាំងអស់លើកលែងរាល់កំហុសដែលកូនៗបានប្រព្រឹត្ត»។
អ្នកគ្រូ ឃាន វន បានឲ្យដឹងថា វិទ្យាល័យចម្រើនវិជ្ជាសាខាថ្មពេជ្រមានប្រសាសន៍ថា គោលបំណងនៃពិធីរំលឹកគុណនេះ គឺឲ្យកូនសិស្សដែលរៀបនឹងចាកចេញពីសាលានេះទៅ ចងចាំពីការខិតខំប្រឹងប្រែងពីគ្រូបង្រៀននិងអាណាព្យាបាលក្នុងការផ្គត់ផ្គង់ដល់ការសិក្សារបស់ពួកគាត់។
អ្នកគ្រូបានបន្ថែមទៀតថា៖ «នៅថ្ងៃអនាគត ពួកគាត់អាចរៀនពីការដឹងគុណនេះ អាចធ្វើជាមនុស្សល្អជួយអ្នកដទៃ និងបម្រើសង្គម ជាពិសេសពួកគាត់នឹងដឹងគុណដល់អស់អ្នកដែលបានជួយគាត់»។
ព្រៃ ថានិច សិស្សថ្នាក់ទី១២ ប្រាប់ថា គាត់នឹងយកអ្វីៗដែលគាត់បានរៀននៅក្នុងសាលាទៅអនុវត្តក្នុងជីវិត និងសូមអរគុណដល់សាលាដែលបានផ្តល់ឱកាសឲ្យរូបគាត់បានរៀននៅទីនេះ។
ថានិចបាននិយាយថា «ទោះបីសាលាតូច មានបន្ទប់តិច ប៉ុន្តែសាលាព្យាយាមផ្តល់នូវអ្វីដែលកូនសិស្សត្រូវការ ដូចជាចំណេះដឹង ការរស់នៅសព្វថ្ងៃ តាមរយៈលោកគ្រូអ្នកគ្រូ»។
វិទ្យាល័យចម្រើនវិជ្ជា ជាសាលាបង្កើតឡើងដោយព្រះសហគមន៍កាតូលិក ស្ថិតនៅភូមិថ្មពេជ្រ១ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ បង្កើតឡើងក្នុងឆ្នាំ២០១៩ ដោយលោកបូជាចារ្យ អាល់ប៊ែតូ កាការ៉ូ ក្នុងគោលបំណងជួយដល់កូនសិស្សដែលមានជីវភាពលំបាកនៅឆ្ងាយពីសាលារៀន។ វិទ្យាល័យនេះជាសាលាសាខាទី២ក្នុងចំណោមសាលាចំនួន៤ របស់វិទ្យាល័យចម្រើនវិជ្ជា។ បច្ចុប្បន្នមានពីថ្នាក់ទី១០-១២ មានកូនសិស្សកំពុងរៀនសរុបចំនួន១០៦នាក់ ក្នុងនោះមានស្រីចំនួន៥៩នាក់៕
ដោយ៖ ម៉េង ភីឡុង
