គ្រីស្តបរិស័ទ សមាជិកគណៈកម្មការព្រះសហគមន៍ បព្វជិត-ជិតា និងលោកបូជាចារ្យជិត៧០នាក់ មកពីព្រះសហគមន៍នានា ក្នុងភូមិបាត់ដំបង ចូលរួមក្នុងស្តីអំពី «ការដឹកនាំប្រកបដោយព្រះវិញ្ញាណដ៏វិសុទ្ធ» ដែលធ្វើនៅព្រះវិហារព្រះជាម្ចាស់លើកព្រះនាងម៉ារីឡើងស្ថានបរមសុខ (ពេទ្យយាយជី) ស្ថិតនៅ ភូមិរំចេក១ សង្កាត់រតនៈ ក្រុងបាត់ដំបង ខេត្តបាត់ដំបង ដែលមានរយៈពេល៣ថ្ងៃ ពីថ្ងៃទី ០៧-០៩ ខែ វិច្ឆិកា។
លោកអភិបាល អេនរីគេ ហ្វីការេដូអភិបាលព្រះសហគមន៍កាតូលិកភូមិភាគបាត់ដំបងមានប្រសាសន៍ថា «ប្រជុំប៉ាស្ទូរ៉ាល់នេះ គឺជាពេលវេលាដែលយើងត្រូវអធិដ្ឋាន ស្តាប់គ្នា ជួបគ្នាសួរសុខទុក្ខ មិនមែនជាពេលសម្រេចធ្វើអ្វីមួយឡើយ។»
លោកអភិបាលមានប្រសាសន៍ទៀតថា ពេលនេះយើងគិតអំពី Synodal Church ដែលសម្តេចប៉ាបចង់ឲ្យយើងរិះគិតអំពីយើងជាប្រជារាស្ត្ររបស់ព្រះជាម្ចាស់ ដែលបានទទួលពិធីជ្រមុជទឹក ហើយចូលក្នុងមហាគ្រួសាររបស់ព្រះជាម្ចាស់។ ដូច្នេះ យើងជាបុត្រធីតារបស់ព្រះជាម្ចាស់ មានសារៈសំខាន់សម្រាប់ព្រះសហគមន៍ ដោយត្រូវចូលរួមនិងទទួលខុសត្រូវលើព្រះសហគមន៍។
ចំណុចនេះ «សម្តេចប៉ាបចង់ឲ្យយើងសកម្មក្នុងការប្រកាសដំណឹងល្អ មិនចាំបាច់ឲ្យមានអ្នកបញ្ជា» លោកអភិបាលបញ្ជាក់។
លោកអភិបាលបានចែករំលែកនូវបទពិសោធន៍របស់លោកដែលបានចូលរួមក្នុងសន្និបាតព្រះសហគមន៍សកលកាលពីខែតុលាកន្លងទៅនៅទីក្រុងរ៉ូម។ លោកប្រាប់ថា ក្នុងកម្មវិធីនោះ គឺយើងបញ្ចេញយោបល់និងចែករំលែកបទពិសោធន៍របស់ខ្លួន ហើយរិះអំពីតួនាទីរបស់ស្ត្រីក្នុងព្រះសហគមន៍ និងរិះគិតលើប្រធានបទជាច្រើនទៀត។
បណ្ឌិត ខេង គ្រីស្ទីណា ជាវាគ្មិនមកពីប្រទេសសិង្ហបុរី បានណែនាំអង្គសិក្ខាសាលាឲ្យយល់អំពីមូលហេតុ និងដំណើរការផ្សេងៗ ដែលព្រះសហគមន៍ធ្វើសន្និបាតព្រះសហគមន៍សកលនេះឡើង។
គ្រីស្ទីណា បានឲ្យដឹងថា ពីមុនព្រះសហគមន៍បានរិះគិតជាច្រើនអំពីបញ្ហាពិភលោក ដូចជា បរិស្ថាន បញ្ហាសង្គម ប៉ុន្តែព្រះសហគមន៍មិនបានគិតអំពីបញ្ហាផ្ទាល់ឡើយ ដូច្នេះនេះជាឱកាសដើម្បីរិះគិតផ្ទាល់អំពីដំណើរការរបស់ព្រះសហគមន៍ពេលបច្ចុប្បន្ន។
បណ្ឌិតទេវវិទ្យារូបនេះបានប្រាប់ទៀតថា ព្រះសហគមន៍មានចរនាសម្ព័ន្ធជាពីរ៉ាមីត នាំឲ្យមានគម្លាតមួយរវាងអ្នកខាងលើនិងអ្នកខាងក្រោម ដូច្នេះព្រះសហគមន៍បានរិះគិតរកពាក្យមួយ គឺSynodal ដើម្បីឲ្យយើងដឹងអំពីអ្វីដែលព្រះជាម្ចាស់ត្រាស់ហៅយើងចូលរួមក្នុងព្រះសហគមន៍។
ក្នុងអង្គសន្និបាតកាលពីខែតុលាកន្លងទៅ គ្រីស្ទីណាបាននិយាយទៀតថា យើងចូលរួមចែករំលែកទាំងអស់គ្នាមិនត្រឹមតែលោកអភិបាលប៉ុណ្ណោះទេ ម្នាក់ៗមានឱកាសនិយាយ ហើយសម្តេចប៉ាបស្តាប់ ហើយអង្គុយរួមតុមូលជាមួយយើងដែលមានស្ត្រី បព្វជិតរួមជាមួយគ្នា។ យើងត្រូវមានទំនាក់ទំនងគ្នានិងស្គាល់ដូចបងប្អូន និងមិត្តភក្តិ នេះជាផ្លូវថ្មីដែលយើងធ្វើដំណើររួមគ្នា។
សន្និបាតព្រះសហគមន៍សកលបានចាប់ផ្តើមឡើងតាំងពីឆ្នាំ២០២១-២០២៤។ កាលពីឆ្នាំ២០២១ ព្រះសហគមន៍នៅគ្រប់តំបន់ក្នុងពិភពលោកបានរិះគិត លើសំណួរចំនួន៣ គឺតើយើងគួរធ្វើដំណើររួមគ្នាយ៉ាងណា? តើព្រះវិញ្ញាណដឹកនាំឲ្យធ្វើអ្វី? តើការធ្វើដំណើរជាធ្លុងតែមួយជួយយើងប្រកាសដំណឹងល្អដូចម្តេច? ហើយរាល់ចម្លើយទាំងអស់ត្រូវបានបញ្ជូនទៅកាន់ទីក្រុងរ៉ូមដើម្បីទុកជាឯកសារនិងរិះគិត។
លោកពុកលូវីស កាឡូស កាណូ វេលេសបានចែកបទពិសោធន៍ថា កាលពី២ឆ្នាំមុន គឺយើងបានឆ្លើយសំណួរទាំងនេះ ហើយយើងមានកុមារមិនមែនជាគ្រីស្តបរិស័ទតែចង់ដឹងអំពីព្រះសហគមន៍ និងពិភាក្សាអំពីព្រះសហគមន៍អ្វីដែលគេចង់ឃើញព្រះសហគមន៍ធ្វើដំណើររួមជាមួយគ្នា។ ពួកគាត់ជួយឲ្យយើងបើកគំនិតថ្មី។
លោកបូជាចារ្យ មួង រស់ បានឲ្យដឹងថា នៅបាត់ដំបង ព្រះសហគមន៍មិនត្រឹមតែស្តាប់គ្រីស្តបរិស័ទប៉ុណ្ណោះទេ តែពព្រះសហគមន៍បានស្តាប់ពីព្រះសង្ឃដែលធ្លាប់បានស្គាល់ ដើម្បីជជែកជាមួយគ្នា ទទួលយោបល់ដើម្បីកែលំអរព្រះសហគមន៍។ ភាគច្រើនព្រះសង្ឃ បានលើកសរសើរពីសកម្មភាពព្រះសហគមន៍ ហើយពួកគាត់សុំឲ្យបន្តសកម្មភាពរបស់ព្រះសហគមន៍ក្នុងសង្គម។
នៅពេលរសៀលអង្គសិក្ខាសាលាបានរិះគិតអំពីរបៀបនៃការចូលរួម ទំនាក់ទំនង និងសេចក្តីស្រឡាញ់ដែលគ្រីស្តបរិស័ទម្នាក់ៗអាចចូលរួមជាមួយគ្នា និងរបៀបនៃការអធិដ្ឋាន ដែលណែនាំដោយលោកបូជាចារ្យមីកាអែល ស្មីតនៃសហជីវិនព្រះយេស៊ូ មកពីប្រទេសញូសាឡេន៕
ដោយកែវ កញ្ញា