លោកអភិបាលអូលីវីយ៉េ ជ្មីតហស្លេ អភិបាលនៃព្រះសហគមន៍ភូមិភាគភ្នំពេញ ជំរុញសហគមន៍គ្រីស្តបរិស័ទវៀតណាម ឱ្យយកចិត្តទុកដាក់និយាយភាសាខ្មែរ ដើម្បីរស់នៅក្នុងសង្គមកម្ពុជាដោយងាយស្រួល។
លោកអភិបាលអូលីវីយ៉េ មានប្រសាសន៍ថា «ខ្ញុំមិនបានហាមមិនឱ្យនិយាយភាសាវៀតណាមទេ ក៏ប៉ុន្តែខ្ញុំជំរុញឱ្យគ្រីស្តបរិស័ទដែលរស់នៅកម្ពុជាចូលនៅក្នុងសង្គមដែលពួកគេកំពុងតែរស់នៅនិងដែលកំពុងស្វាគមន៍ពួកគេក្នុងជីវិតប្រចាំថ្ងៃ»។
ក្នុងឱកាសបុណ្យគោរពសន្តហ្វ្រង់ស៊ីស្កូនៃក្រុងអាស៊ីស៊ី និងប្រទានពរលើចេតិយថ្មី នៅព្រះវិហារសន្តយ៉ូសែបទួលក្រសាំង ក្រុងតាខ្មៅ នៃមណ្ឌលសកម្មភាពទន្លេបាសាក់ នាថ្ងៃទី៤ តុលា លោកអភិបាលអូលីវីយ៉េ បានលើកយកគំរូរបស់លោកម៉ាថាយ ជាគ្រីស្តបរិស័ទនៅទីនោះ ដែលបានទទួលមរណភាពនាពេលថ្មីកន្លងទៅថា លោកម៉ាថាយនេះ បានជួយកសាងព្រះហសគមន៍សាជាថ្មីក្រោយសម័យសង្គ្រាម និងបានជួយឱ្យព្រះសហគមន៍មានជីវិត។
លោកអភិបាលបញ្ជាក់ថា បុរសរូបនោះជាគំរូក្នុងការនិយាយទាំងពីរភាសា មានខ្មែរនិងវៀតណាម ហើយគាត់បានផ្ដល់សក្ខីភាពអំពីជីវិតគ្រួសារដល់យុវជនយុវនារីក៏ដូចជាគ្រូអប់រំជំនឿដែរ។
ទាក់ទងទៅនឹងការជំរុញនិងលើកទឹកចិត្តគ្រីស្តបរិស័ទវៀតណាមឱ្យនិយាយភាសាខ្មែរនៅក្នុងសង្គមកម្ពុជានេះដែរ លោកបូជាចារ្យ សិលា សុខ ណា មានប្រសាសន៍ថា ក្នុងនាមខ្ញុំជាលោកជាអ្នកសម្របសម្រួលមណ្ឌលសកម្មភាពទន្លេបាសាក់ រួមជាមួយបូជាចារ្យផ្សេងទៀត គឺពួកលោកខិតខំរៀបចំពិធីបុណ្យដោយមានទាំង២ភាសាបញ្ជូលគ្នា។
លោកថា «ដើម្បីធ្វើយ៉ាងណាឱ្យពិធីបុណ្យ ដែលជាចំណុចស្នូលនៃជីវិតគ្រីស្តបរិស័ទមានទាំងពីរភាសា ដើម្បីឱ្យពួកគាត់ងាយយល់ និងមានការបកប្រែជំនួយផងដែរ»។
ក្រៅពីពិធីបុណ្យ លោកបូជាចារ្យ សុខណា បន្តថា លោកយកចិត្តទុកដាក់ខ្លាំងលើការសិក្សាអប់រំឱ្យកូនវៀតណាមរៀនភាសាខ្មែរ និងចេះរស់នៅក្នុងសង្គមកម្ពុជា។
នៅក្នុងព្រះសហគមន៍ភូមិភាគភ្នំពេញ ព្រះសហគមន៍មានសាលាអក្ខរកម្មភាសាខ្មែរ និងថ្នាក់មត្តេយ្យសិក្សាដល់បឋមសិក្សាសម្រាប់កុមារវៀតណាមដើម្បីជួយពួកគាត់ឲ្យមានទំនាក់ទំនងជាមួយអ្នកជិតខាងបានទូលំទូលាយ៕
ដោយដាលីស
