សភាអភិបាលព្រះសហគមន៍កាតូលិកនៅកម្ពុជា បានរៀបចំសំណាក់ធម៌បូជាចារ្យប្រចាំឆ្នាំ២០២៣ ដែលបានធ្វើឡើងនាសហគមន៍សន្តមីកាអែលនៃមណ្ឌលសកម្មភាពកំពង់សោម រយៈពេល៦ថ្ងៃ ដោយបានបញ្ចប់ដោយទទួលបានផ្លែផ្កាល្អ។
ពិធីសំណាក់ធម៌បូជាចារ្យប្រចាំឆ្នាំ២០២៣នេះ បានរៀបចំកាលពីថ្ងៃ២៩ ខែឧសភា ដល់ថ្ងៃទី៣ ខែមិថុនា ឆ្នាំ២០២៣កន្លងមកនេះ ក្រោមអធិបតីភាព លោកអគ្គអភិបាល ជូលាន លេអូ ប៊េងគីម នៃរដ្ឋធានីកូឡាឡាំពួរ ដោយមានការចូលរួមពីលោកអភិបាលទាំងបីភូមិភាគ លោកបូជាចារ្យ និងលោកឧបដ្ឋាកជាច្រើនរូប។
កម្មវិធីនេះ ចាប់ផ្ដើមសារឡើងវិញដោយមានការជួបជុំគ្នារវាងបូជាចារ្យអន្តរភូមិភាគបន្ទាប់ពីប្រទេសកម្ពុជាបានជួបនឹងជម្ងឺរាតត្បាតកូវីដ១៩ បណ្ដាលឱ្យសកម្មភាពព្រះសហគមន៍ផ្អាកដំណើរការខ្លះៗ ដូចជាការសិក្សាអប់រំ សិក្ខាសាលាខ្លីៗនឹងសកម្មភាពយុវជនជាដើម។
លោកអគ្គអភិបាល ជូលាន លេអូ ប៊េងគីម មានប្រសាសន៍ថា ៖ «ខ្ញុំរីករាយណាស់ដែលបានមកក្រុងព្រះសីហនុ នៃប្រទេសកម្ពុជានេះ ដើម្បីណែនាំសំណាក់ធម៌ខ្លះៗដល់ក្រុមលោកបូជាចារ្យនៅក្នុងប្រទេសកម្ពុជានាពេលនេះ»។
លោកបន្តថា ៖ «ខ្ញុំសូមអរគុណលោកអភិបាលគីគេដែលបានអញ្ជើញខ្ញុំ លោកអភិបាលអូលីវយ៉េដែលបានស្វាគមន៍យ៉ាងកក់ក្តៅ និងលោកអភិបាលលីផងដែរ ហើយក្នុងរយៈពេលប៉ុន្មានថ្ងៃនេះ ខ្ញុំសង្កេតឃើញថាលោកបូជាចារ្យទាំងអស់មានឆន្ទៈនៅក្នុងកិច្ចការបម្រើព្រះសហគមន៍នៅកម្ពុជា»។
លោកអគ្គអភិបាលលើកឡើងដោយសង្ឃឹមថា លោកនឹងអាចមានពេលវេលាច្រើនជាងនេះទៀតនៅពេលក្រោយ ដើម្បីធ្វើទស្សនកិច្ចនៅក្នុងប្រទេសដ៏ស្រស់ស្អាតបែបនេះ ហើយពេលដែលលោកចាកចេញទៅប្រទេសលោកវិញ លោកនៅតែមានអនុស្សាវរីយ៍ល្អៗពីកិច្ចការសាសនទូត និងព្រះសហគមន៍នៅទីនេះ។
លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ ក៏បានលើកឡើងដែរថា ពិធីសំណាក់ធម៌បូជាចារ្យនេះដែរ មានការចូលរួមពីបូជាចារ្យ ប្រមាណជា៦០នាក់ ទាំង៣ភូមិភាគ។
លោកបន្តថា ៖ «ឆ្នាំនេះជាពេលវេលាមួយល្អសម្រាប់យើងដោយសារតាំងពីឆ្នាំ២០១៩មកយើងមិនដែលមានសំណាក់ធម៌រួមគ្នាដូចនេះឡើយ ដោយសារតែការរាលដាលនៃមេរោគកូវីដ-១៩ ហើយឆ្នាំនេះយើងបានរៀបចំជាមួយលោកអគ្គអភិបាលដែលមកពីរដ្ឋធានីកូឡាឡាំពួរនៃប្រទេសម៉ាឡេស៊ី បានណែនាំយើងជាក្រុមបូជាចារ្យ ជាក្រុមលោកអភិបាលធ្វើដំណើរជាមួយគ្នា»។
«ជាពិសេសនៅក្នុងទំនាក់ទំនងជាមួយព្រះជាម្ចាស់ គ្រីស្តបរិស័ទ សង្គម គ្រប់វិស័យ និងទំនាក់ទំនងជាមួយធម្មជាតិ ដើម្បីបង្កើតជីវិតយើងដែលភ្ជាប់ជាមួយព្រះជាម្ចាស់ ពិសេសទទួលពន្លឺពីព្រះវិញ្ញាណដ៍វិសុទ្ធ»។ នេះបើតាមការបន្ថែមពីលោក អូលីវីយ៉េ។
ជាមួយគ្នានោះដែរ លោកអភិបាល ទេព ច័ន្ទពិសិដ្ឋ អភិបាលនៃព្រះសហគមន៍កាតូលិកភូមិភាគបាត់ដំបង ក៏បានថ្លែងឡើងដែរថា រយៈពេល៣ឆ្នាំមកនេះ មិនមានការជួបជុំគ្នាជាមួយបូជាចារ្យទាំងអស់ដើម្បីសំណាក់ធម៌ អធិដ្ឋានជាមួយគ្នានោះឡើយ។
លោកមានប្រសាសន៍ថា ៖ «របៀបដែលលោកអគ្គអភិបាលបង្រៀន និងទេសនាជារបៀបមួយសុភាពរាបសារ ទន់ភ្លន់ ហើយការនិយាយភាសាអង់គ្លេសងាយស្រួលស្ដាប់ នាំឱ្យចូលនៅក្នុងន័យទំនាក់ទំនងជាមួយព្រះជាម្ចាស់ ជាមួយបងប្អូនឯទៀតៗ ជាមួយធម្មជាតិ ដែលនាំឱ្យយើងមានសេចក្ដីសុខសប្បាយ»។
ចំណែក លោកអភិបាល សិលា សួនហង្សលី ក៏បានលើកឡើងដែរថា សំណាក់ធម៌នេះពិតជាមានសារៈសំខាន់ ដែលលោកអគ្គអភិបាលបានណែនាំដល់បូជាចារ្យទាំងអស់ ទោះបីជាការនិយាយជាភាសាអង់គ្លេសក៏ដោយ ប៉ុន្តែជារបៀបមួយស្រួលស្ដាប់ ហើយប្រធានបទក៏ស្រួលដែរ ដោយលោកបានលើកឡើងមកទាក់ទងជាមួយនឹងទំនាក់ទំនង។
លោកបន្ថែមថា ៖ «ប្រធានបទដែលនិយាយពីទំនាក់ទំនង និងពីការឯកភាព ធ្វើឱ្យនឹកឃើញដល់ព្រះបន្ទូលរបស់ព្រះយេស៊ូដែលមានព្រះបន្ទូលអង្វរព្រះជាម្ចាស់ជាព្រះបិតាថា សូមឱ្យយើងរួមគ្នាជាអង្គតែមួយដូចព្រះអង្គរួមគ្នាជាមួយព្រះបិតា និងព្រះវិញ្ញាណដ៌វិសុទ្ធ»។
លោកអភិបាល សិលា សួនហង្សលី បានបន្តថា ៖ «នៅពេលដែលយើងរួមគ្នាគឺយើងផ្ដល់សក្ខីភាពថាពិតមានព្រះយេស៊ូយាងមកក្នុងលោកនេះ និងមានព្រះជាម្ចាស់គង់នៅជាមួយយើងដើម្បីប្រកាសដំណឹងល្អដល់បងប្អូនឯទៀតៗមែន»។ សូមបញ្ជាក់ដែរថា មណ្ឌលសកម្មភាពកំពង់សោម ជាមណ្ឌលសកម្មភាពមួយក្នុងចំណោមមណ្ឌលសកម្មភាពទាំង៩នៃព្រះសហគមន៍កាតូលិកភូមិភាគភ្នំពេញដែលមានលោកបូជាចារ្យ តាវ៉ូឡា យ៉ាំងលូកា ជាអ្នកទទួលខុសត្រូវ ហើយនៅថ្ងៃទី២៥ ខែមិថុនា ខាងមុខនេះ លោកនឹងបំពេញមកបេសកម្មថ្មីដែលជានាយកទេវវិទ្យាល័យនៅរាជធានីភ្នំពេញផងដែរ
