អភិបូជារាត្រីបុណ្យចម្លង
នៅព្រះសហគមន៍សន្តីម៉ារីញញឹម ចំការទៀង
តាកែវ ថ្ងៃទី៩ ខែមេសា ឆ្នាំ២០២៣
អត្ថបទទី១៖ កិច្ចការ ១០,៣៤.៣៧-៤៣
យើងជាបន្ទាល់អំពីកិច្ចការទាំងអស់ដែលព្រះអង្គបានធ្វើ។ កក ១០,៣៩
អត្ថបទទី១៖ កូឡូស ៣,១-៤
ជីវិតរបស់បងប្អូន ក៏បានកប់ទុកជាមួយព្រះគ្រីស្តក្នុងព្រះជាម្ចាស់ដែរ។ កូឡ ៣,៣
ដំណឹងល្អ៖ យ៉ូហាន ២០,១-៩
ចេញដំណើរឆ្ពោះទៅផ្នូរ។ យហ ២០,១
បងប្អូនជាទីស្រឡាញ់!
“ព្រះយេស៊ូគ្រីស្តមានព្រះជន្មរស់ឡើងវិញ អាលេលូយ៉ាអ! អាលេលូយ៉ា!”
នេះជាដំណឹងល្អ ដែលយើងបានស្ដាប់នៅថ្ងៃនេះ ដែលណែនាំឲ្យយើងទាំងអស់បានពោរពេញដោយអំណរសប្បាយ និងប្រញាប់ប្រញាល់ដូចក្រុមស្ដ្រីពីដើម ដូចព្រះនាងម៉ារីដែលបានទទួលដំណឹងជាមាតារបស់ព្រះជាម្ចាស់។ ប្រញាប់ប្រញាល់ ដើម្បីចែករំលែកអំណរសប្បាយមួយយ៉ាងពិសេសដែលយើងបានទទួល។ បងប្អូនជាទីស្រឡាញ់ ថ្ងៃនេះដែលយើងបានជួបគ្នានៅក្នុងបរិវេណនៃព្រះវិហារសន្តីម៉ារីញញឹម ចំការទៀង។ យើងអរព្រះគុណព្រះជាម្ចាស់ សម្រាប់បងប្អូនដែលបានទទួលអគ្គសញ្ញាជ្រមុជទឹកពីយប់មិញ នៅក្នុងភូមិភាគភ្នំពេញ យប់នេះយើងមានជិត៣០នាក់ទៀតដែលបានទទួលជីវិតថ្មី។
នេះជាឱកាសមួយ ដើម្បីអរព្រះគុណព្រះជាម្ចាស់ពិតមែន យើងបានធ្វើដំណើរយូរឆ្នាំហើយ ថ្ងៃនេះយើងឃើញព្រះបន្ទូលរបស់ព្រះជាម្ចាស់ ដែលបានកើតនៅលើផែនដីនេះ ទៅជារូបរាងដ៏ពិតប្រាកដតាមរយៈបងប្អូនដែលនឹងទទួលជីវិតថ្មីនៅក្នុងអគ្គសញ្ញាជ្រមុជទឹក។ បងប្អូនជាទីស្រឡាញ់ នៅក្នុងរយៈពេល៤០ថ្ងៃដែលយើងបានធ្វើដំណើរបន្តិចម្ដងៗជាមួយព្រះយេស៊ូ យើងត្រូវការនឹកឃើញនៅពេលយើងចូលនៅក្នុងរដូវ៤០ថ្ងៃ រួមជាមួយព្រះយេស៊ូ។ យើងបានចូលនៅក្នុងវាលរហោស្ថានរួមជាមួយព្រះយេស៊ូ យើងបានធ្វើដំណើរអំពីការល្បួងរួមជាមួយព្រះយេស៊ូ។ យើងបានស្គាល់អំពីភាពងងឹតនៅក្នុងជីវិតយើង យើងបានស្គាល់អំពីមារសាតាំងដែលបៀតបៀនយើង យើងស្គាល់អំពីអំពើបាបដែលណែនាំឲ្យជួនកាលយើងដួល។ ណែនាំឲ្យយើងជួនកាល យើងវង្វេងនៅក្នុងផ្លូវនៃជីវិតរបស់យើង អស់៤០ថ្ងៃយើងបានយកចិត្តទុកដាក់ដើម្បីទូលអង្វរព្រះជាម្ចាស់ សូមឲ្យព្រះអង្គជម្រះចិត្តគំនិតរបស់យើងខ្ញុំ។
ជាពិសេសនៅភូមិភាគយើង យើងមានបងប្អូនដែលបានទទួលជំហានទី២ អស់៤០ថ្ងៃយើងបានធ្វើពិធីជម្រះចិត្តគំនិត ដើម្បីយល់ថាពិតមែនដោយកម្លាំងផ្ទាល់ខ្លួន យើងមិនអាចទៅជាមនុស្សថ្មីបានទេ ដោយកម្លាំងផ្ទាល់ខ្លួនយើងមិនអាចទទួលជីវិតថ្មីបានទេ។ ប៉ុន្តែ ប្រសិនបើយើងទីពឹងទៅលើព្រះជាម្ចាស់ ប្រសិនបើយើងទីពឹងទៅលើព្រះយេស៊ូគ្រីស្ត ដែលគង់នៅជាមួយយើង យើងកែប្រែជីវិតរបស់យើងទៅជាជីវិតថ្មី។
កាលពីថ្ងៃសុក្រ មហាជនបានស្រែកយ៉ាងខ្លាំងថា “ឆ្កាងទៅ! ឆ្កាងទៅ!” យើងជួនកាលជាមហាជនដែរ។ យើងលើកតម្កើងសិរីរុងរឿងរបស់ព្រះជាម្ចាស់ ដូចពីថ្ងៃអាទិត្យពេលព្រះយេស៊ូយាងចូលទីក្រុងយេរូសាឡឹម និងមហាជនបានច្រៀងលើកតម្កើងព្រះមហាក្សត្ររបស់គេ “ជយោ! ព្រះរាជ្យវង្សព្រះបាទដាវីឌ ជយោ!”។ ប៉ុន្តែ បីថ្ងៃក្រោយមកនៅពេលលោកប៉ុនពីឡាត់សួរគេថា “តើយើងត្រូវដោះលែងបាណាបាស់ ឬព្រះយេស៊ូ?”។ គេស្រែកយ៉ាងខ្លាំងថា “ដោះលែងបាណាបាស់ ហើយឆ្កាងយេស៊ូទៅ”។
បងប្អូនជាទីស្រឡាញ់ ពិតមែននៅថ្ងៃសុក្រដែលយើងបាននឹកឃើញព្រះយេស៊ូសោយទិវង្គត យើងបាននឹកឃើញពីរបៀបដែលព្រះយេស៊ូបានប្រមូលអំពើបាបរបស់យើងទាំងអស់ បានប្រមូលភាពងងឹតនៃជីវិតរបស់យើងទាំងអស់។ យប់នេះ យើងមានឈើឆ្កាងមួយយ៉ាងស្អាត ដែលបានយកចាស់ឫសនៅក្នុងស្រែរបស់យើង និងនៅក្នុងឈើឆ្កាងនេះយើងបានឃើញយើងមានអាវសរមួយ។ អាវសរនេះ ជាក្រណាត់ដែលបានរុំព្រះសពរបស់ព្រះយេស៊ូ ដោយសារនៅពេលស្ដ្រីៗទៅដល់ផ្នូរ ជាផ្នូរទទេអត់បានរកឃើញសពទេ។ មានអ្នកខ្លះគិតថា មានគេលួចសពរបស់ព្រះយេស៊ូទៅហើយ ប៉ុន្តែតាមពិតព្រះយេស៊ូមានព្រះជន្មរស់ឡើងវិញ។ ក្រណាត់សរនេះ បន្តិចទៀតបងប្អូននឹងបំពាក់ ក្រណាត់សរនេះណែនាំឲ្យយើងឃើញពិតមែនចាប់ពីពេលនេះតទៅ គឺព្រះយេស៊ូគ្រីស្តដែលគង់នៅជាមួយយើង និងយើងបំពាក់ព្រះយេស៊ូពីថ្ងៃដែលយើងបានទទួលជីវិតថ្មីនៅក្នុងអគ្គសញ្ញាជ្រមុជទឹក។ ដូចយើងបានស្ដាប់នៅក្នុងអត្ថបទផ្ញើជូនគ្រីស្តបរិស័ទក្រុងរ៉ូមថា “យើងស្លាប់យើងរស់ជាមួយព្រះយេស៊ូ”។ នេះជាអត្ថន័យនៃពិធីជ្រមុជទឹក ដែលបងប្អូនខ្លះបានទទួលហើយ និងបងប្អូនមួយចំនួននឹងទទួលបន្តិចទៀត យើងស្លាប់ជាមួយព្រះយេស៊ូដើម្បីរស់ជាមួយព្រះយេស៊ូ។
បងប្អូនជាទីស្រឡាញ់ សូមបើកភ្នែកនៅពេលព្រះយេស៊ូបានសោយទិវង្គត ព្រះយេស៊ូបានចូលនៅក្នុងស្ថាននរក នៅស្ថានក្រោម។ យប់នេះព្រះយេស៊ូចេញពីស្ថាននរកវិញ នឹងទាក់ទាញមនុស្សទាំងអស់ដែលជាប់នៅក្នុងហ្នឹង ជាមនុស្សដែលពោរពេញសេចក្ដីស្រឡាញ់ចំពោះព្រះជាម្ចាស់ ដើម្បីណែនាំឱ្យគេឡើងនិងទទួលសិរីរុងរឿងរួមជាមួយព្រះជាម្ចាស់។ នេះជាមូលហេតុ យប់នេះយើងគោរពព្រះយេស៊ូដែលមានព្រះជន្មរស់ឡើងវិញ ចាប់ពីភាពងងឹតដើម្បីធ្វើដំណើរដូចព្រះអាទិត្យបន្តិចម្ដងៗបានរះ។ ព្រះយេស៊ូជាព្រះអាទិត្យថ្មី ដែលរះលើផែនដីចាស់របស់យើង ដើម្បីឲ្យយើងទៅជាមនុស្សថ្មី។ បងប្អូនជាទីស្រឡាញ់ វាលស្រែដែលយើងបានរៀបចំនៅក្នុងផ្ទាំងប៉ាណូនេះ គឺព្រះអាទិត្យដែលកំពុងរះនៅលើវាលស្រែរបស់យើង។ មានន័យថា នៅលើជីវិតរបស់យើង យើងឃើញសន្ទូង យើងឃើញដើមត្នោត យើងឃើញស្រូវរបស់យើង យើងដឹងថានេះជាជីវិតរបស់យើង។ ឈើឆ្កាង មិនមែនជាឈើឆ្កាងនៅលើដែលយើងមិនដឹងទេ ឈើឆ្កាងចាក់ឫសនៅក្នុងទឹកដីរបស់យើង ដើម្បីយល់ថាពិតមែនព្រះយេស៊ូបានចាប់កំណើតជាមនុស្សនៅក្នុងជីវិតរបស់យើងផ្ទាល់។
នៅថ្ងៃព្រះយេស៊ូប្រសូត និងថ្ងៃនេះគឺព្រះយេស៊ូដែលមានព្រះជន្មរស់ឡើងវិញនៅក្នុងជីវិតយើងផ្ទាល់ មុនគេបង្អស់ព្រះយេស៊ូមិនមែនមានព្រះជន្មរស់ឡើងវិញទូទៅ។ ប៉ុន្តែ នៅក្នុងយើងរៀងៗខ្លួន គឺព្រះយេស៊ូផ្ទាល់ដែលកំពុងមានព្រះជន្មរស់ឡើងវិញ គឺនៅក្នុងខ្លួនរបស់យើងផ្ទាល់ដែលយើងមានពន្លឺដែលកំពុងផ្ទុះ។ តែមិនមែនផ្ទុះដើម្បីសម្លាប់យើង ផ្ទុះដើម្បីឲ្យយើងស្អាតបំផុត ឲ្យយើងសរជាសំឡី ដូចយើងបានស្ដាប់ថ្ងៃនេះ។ ពិតមែន ព្រះពន្លឺនេះជាព្រះពន្លឺមួយយ៉ាងពិសេសបំផុត ដែលណែនាំឲ្យយើងមានជីវិតថ្មី។ ជីវិតថ្មីប្រហែលយើងអត់ទាន់មើលឃើញ ប៉ុន្តែចាប់ពីពេលនេះតទៅយើងអាចទៅជាមនុស្សថ្មី។
បងប្អូនជាទីស្រឡាញ់ ព្រះយេស៊ូនៅក្នុងការសោយទិវង្គត នៅក្នុងភាពស្ងៀមស្ងាត់របស់ព្រះអង្គ នៅក្នុងសក្ការៈបូជាដ៏កំពូលរបស់ព្រះអង្គ នៅពេលហ្នឹងព្រះយេស៊ូបានបើកផ្លូវថ្មីសម្រាប់យើង។ ផ្លូវនេះជាផ្លូវនៃពន្លឺ យើងជាប្រជារាស្រ្តរបស់ព្រះជាម្ចាស់ យើងជាប្រជារាស្ត្រនៃពន្លឺ យើងជាអ្នកចម្បាំងការពារពន្លឺ យើងមិនមែនជាអ្នកចម្បាំងដើម្បីធ្វើសង្រ្គាមសម្លាប់គេ។ ប៉ុន្តែ ព្រះយេស៊ូបានតែងតាំងយើងនៅលើផែនដីនេះ ដើម្បីទៅជាក្រុមអ្នកចម្បាំងការពារពន្លឺ នេះជាតួនាទីដែលយើងបានទទួល នេះជាបេសកកម្មមួយយ៉ាងពិសេសដែលយើងបានទទួល។ នៅក្នុងរាត្រីដ៏វិសុទ្ធនេះ នៅរាត្រីដ៏ពិសេសនៃពន្លឺនេះ យើងដឹងថាព្រះយេស៊ូដែលមានព្រះជន្មរស់ឡើងវិញ ណែនាំឲ្យយើងទាំងអស់ទៅជាប្រជារាស្រ្តនៃអ្នកចម្បាំងការពារពន្លឺ ដើម្បីរស់នៅតាមរបៀបថ្មីដែលព្រះយេស៊ូបានរៀបចំឲ្យយើង។ របៀបថ្មីដែលព្រះយេស៊ូបានរៀបចំ កុំឲ្យយើងគិតថាជារបៀបមួយយ៉ាងស្រួលបំផុត ឬជារបៀបមួយយ៉ាងអស្ចារ្យបំផុត ឬជារបៀបមួយដែលណែនាំឲ្យយើងទៅជាមនុស្សពិសេសនៅលើផែនដីនេះ។ ផ្ទុយទៅវិញ ព្រះយេស៊ូបានណែនាំឲ្យយើងរស់នៅតាមរបៀបជីវិតសាមញ្ញធម្មតាដូចព្រះនាងម៉ារី ដើម្បីឲ្យយើងដកខ្លួនរបស់យើងចេញពីភាពច្រណែន ភាពលោភលន់។
ផ្លូវនៃពន្លឺដែលព្រះជាម្ចាស់បានរៀបចំឱ្យយើង ដើម្បីសម្លាប់ភាពច្រណែន ដើម្បីសម្លាប់ការចង់បានដូចគេគឺ៖
ទី១ រស់នៅក្នុងជីវិតសាមញ្ញធម្មតា សប្បាយចិត្តនូវអ្វីដែលយើងមាន ដោយសារជាអំណោយទានដែលខ្ញុំបានទទួលពីព្រះជាម្ចាស់។ ជីវិតសាមញ្ញធម្មតា ដែលព្រះអង្គបានរៀបចំឲ្យយើង ជាជីវិតដែលណែនាំឲ្យយើងមានជីវិតដ៏មានសុភមង្គលដ៏ពិតប្រាកដ។ នៅក្នុងអត្ថបទទី១ នៅពេលព្រះជាម្ចាស់បានបង្កើតមនុស្សលោក ព្រះជាម្ចាស់បានចែកម្ហូបអាហារឲ្យមនុស្សលោកញ៉ាំ គឺបានចែកស្មៅនិងផ្លែឈើ។ អត់មានសាច់គោអាំង អត់មានគោដុត អត់មានជ្រូកខ្វៃ មានតែស្មៅនិងផ្លែឈើ។ ផ្លៃឈើនិងបន្លែទាំងអស់ ដែលព្រះជាម្ចាស់រៀបចំសម្រាប់មនុស្សលោកពីដើម គឺមាននេះតែប៉ុណ្ណឹង។ ក្រោយមក យើងចូលនៅក្នុងពិភពរបស់យើងដែលយើងចង់កែច្នៃ យើងចង់ញ៉ាំម្ហូបដែលគេកែច្នៃ ពោរពេញដោយស្ករ ពោរពេញដោយអំបិល ពោរពេញដោយខ្លាញ់ ដូចជាភីហ្សា ហាំបឺហ្គឺជាដើម ប៉ុន្តែនេះមិនមែនជាអ្វីដែលព្រះជាម្ចាស់រៀបចំពីដើម។
ទី២ ព្រះជាម្ចាស់បានរៀបចំជីវិតរបស់យើងទៅជាជីវិតសម្រាប់ព្រះជាម្ចាស់ និងសម្រាប់បងប្អូនឯទៀតៗ ដើម្បីឲ្យយើងសម្លាប់ភាពចង្អៀតចង្អល់ ភាពអាត្មានិយម។ ដែលស៊ីកម្លាំងរបស់យើងពីមួយថ្ងៃទៅមួយថ្ងៃ ដែលស៊ីអារម្មណ៍របស់យើងពីមួយថ្ងៃទៅមួយថ្ងៃ។ ព្រះជាម្ចាស់បានរៀបចំផ្លូវថ្មីដូចព្រះយេស៊ូពីដើម ឲ្យយើងមានជីវិតសម្រាប់ព្រះជាម្ចាស់ និងសម្រាប់បងប្អូនឯទៀតៗ។
ទី៣ ឱ្យយើងយកចិត្តទុកដាក់បម្រើ និងស្រឡាញ់ ដើម្បីជិះជាន់អំណួតដែលយើងមាននៅក្នុងដួងចិត្តរបស់យើង ដើម្បីជិះជាន់សេចក្ដីលោភលន់ដែលយើងមាន។ ព្រះជាម្ចាស់បានរៀបចំនៅក្នុងព្រះយេស៊ូមានព្រះជន្មរស់ឡើងវិញ គឺបម្រើនិងស្រឡាញ់។ នេះជារបៀបចុងក្រោយរបស់ព្រះយេស៊ូ នៅពេលព្រះយេស៊ូបានលាងជើងដល់ក្រុមសាវ័កហើយព្រះអង្គមានព្រះបន្ទូលថា “សូមធ្វើតាមគម្រូរបស់ខ្ញុំ លាងជើងឲ្យគ្នាទៅវិញទៅមក”។ ក្រោយមក ព្រះយេស៊ូមានព្រះបន្ទូលតែមួយម៉ាត់គឺ “សូមស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នា”។
យើងមានជីវិតសាមញ្ញធម្មតា យើងមានជីវិតសម្រាប់ព្រះជាម្ចាស់និងអ្នកដទៃ យើងមានជីវិតដែលយើងចេះបម្រើនិងស្រឡាញ់ ណែនាំឲ្យយើងដកចេញការជិះជាន់ និងអ្វីៗទាំងអស់ដែលណែនាំឲ្យយើងពោរពេញដោយការល្បួង ដែលមកពីមារសាតាំង។ ភាពច្រណែន អាត្មានិយម ចិត្តលោភលន់ នេះទាំងអស់ណែនាំឲ្យមានការឈ្លោះគ្នា ការស្អប់គ្នា ណែនាំឲ្យមានសង្រ្គាមនៅក្នុងពិភពលោក។ ដូច្នេះ យប់នេះឲ្យយើងដើររួមជាមួយគ្នានៅលើផ្លូវនៃពន្លឺ ដែលព្រះយេស៊ូបានរៀបចំឲ្យយើង “ឈរឡើង! ដើម្បីប្រញាប់ប្រញាល់ធ្វើដំណើរ ដើម្បីរស់នៅនៅក្នុងជីវិតសាមញ្ញធម្មតារបស់យើងប្រចាំ”។ នៅក្នុងជីវិតប្រចាំរបស់យើងពីមួយថ្ងៃទៅមួយថ្ងៃ យើងបំពេញតួនាទីរបស់យើង យើងបំពេញការងាររបស់យើងអស់ពីសមត្ថភាព។ ពេលយើងដួលយើងដឹងថា យើងមានព្រះជាម្ចាស់ យើងមានព្រះយេស៊ូ យើងមានក្រុមគ្រួសាររបស់យើងដែលជាព្រះសហគមន៍ យើងអាចទីពឹងលើបាន។
បងប្អូនជាទីស្រឡាញ់ ពិតមែនយើងជាប្រជារាស្ត្រនៃអ្នកចម្បាំងការពារពន្លឺ ឲ្យយើងឈរឡើងរួមជាមួយបងប្អូនដែលនឹងទទួលព្រះវិញ្ញាណដ៏វិសុទ្ធ នៅក្នុងអគ្គសញ្ញាជ្រមុជទឹក។ បន្តិចទៀត គេនឹងបំបាក់ព្រះយេស៊ូនៅក្នុងអាវសរនេះ ឲ្យយើងទាំងអស់គ្នាបំពាក់អាវសរសម្រាប់ជីវិតប្រចាំថ្ងៃមួយថ្ងៃទៅមួយថ្ងៃ។ បន្តិចទៀត យើងនឹងគោរពឆ្នាំថ្មីតាមប្រពៃណីខ្មែរ ឲ្យយើងដឹងថាឆ្នាំថ្មីគឺជីវិតថ្មីនៅក្នុងព្រះយេស៊ូគ្រីស្ត ដែលយាងមកប្រទានព្រះពរឲ្យយើងដ៏ពេញលក្ខណៈ។ ពិតមែន ឲ្យយើងចម្រើនពរដ៏ពេញលក្ខណៈ ដើម្បីទៅជាមនុស្សថ្មីពោរពេញដោយពន្លឺ ដែលមកពីព្រះវិញ្ញាណដ៏វិសុទ្ធ។
ជយោ! ព្រះយេស៊ូគ្រីស្តមានព្រះជន្មរស់ឡើងវិញ អាលេលូយ៉ា! អាលេលូយ៉ា!
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ0
