អភិបូជាថ្ងៃសៅរ៍ពិសិដ្ឋ (រាត្រីបុណ្យចម្លង)
នៅព្រះសហគមន៍ព្រះកុមារយេស៊ូ បឹងទំពន់
ភ្នំពេញខាងត្បូង ថ្ងៃទី៨ ខែមេសា ឆ្នាំ២០២៣
អត្ថបទទី១៖ កំណើតពិភពលោក ១,១-២,២
ព្រះជាម្ចាស់មានព្រះបន្ទូលថា៖ «ចូរមានពន្លឺ!» ពន្លឺក៏កើតមានឡើង។ កណ ១,៣
អត្ថបទទី១៖ រ៉ូម ៦,៣-១១
ចរិតចាស់របស់យើងបានជាប់ឆ្កាងជាមួយព្រះអង្គរួចហើយ។ រម ៦,៦
ដំណឹងល្អ៖ ម៉ាថាយ ២៨,១-១០
កុំភ័យខ្លាចអ្វី! ខ្ញុំដឹងថានាងៗមករកព្រះយេស៊ូ។ មថ ២៨,៥
បងប្អូនជាទីស្រឡាញ់!
“ទេវទូតនោះមានទ្រង់ទ្រាយភ្លឺដូចផ្លេកបន្ទោរ និងមានសម្លៀកបំពាក់សរដូចសំឡី”
នៅពេលយើងបានប្រកាសថា ព្រះយេស៊ូមានព្រះជន្មរស់ឡើងវិញ នៅរាត្រីនេះព្រះអង្គប្រើដុំភ្លើងលុបបំបាត់ភាពងងឹតនៃអំពើបាប។ “នៅរាត្រីនេះ ក្នុងពិភពលោកទាំងមូលព្រះអង្គញែកអ្នកជឿលើព្រះគ្រីស្ត ចេញពីអំពើអាក្រក់របស់លោកីយ៍ និងចេញពីភាពងងឹតនៃអំពើបាប ហើយទ្រង់ដឹកនាំពពួកគេ ដោយព្រះហឫទ័យប្រណីសន្ដោស ព្រមទាំងប្រទានឲ្យពួកគេបានវិសុទ្ធ”។ ពីភាពងងឹត ដែលលោកយូដាបានក្បត់ព្រះបុត្រានៃព្រះពន្លឺ ពីភាពងងឹតដែលមហាជនបានស្អប់និងមើលងាយសេចក្ដីពិតនៃព្រះពន្លឺ ពីភាពងងឹតដែលលោកពីឡាត់បានកាត់ក្ដីមនុស្សសុចរិត។ ព្រះយេស៊ូគ្រីស្តចេញពីភាពងងឹតនេះ ដើម្បីយកមនុស្សទាំងអស់មកជាមួយព្រះអង្គ ដែលធ្វើតាមព្រះហឫទ័យរបស់ព្រះជាម្ចាស់ ពីដើមកំណើតនៃពិភពលោក។ ដោយបើកផ្លូវមួយដ៏អស្ចារ្យ ផ្លូវមួយដ៏ពិសេស គឺទ្វារនៃស្ថានបរមសុខ ដើម្បីទទួលជីវិតអស់កល្បជានិច្ច។
“ពិតមែន រាត្រីនេះមានសុភមង្គលមែន ត្បិតស្ថានបរមសុខនិងផែនដីរួបរួមគ្នា ហើយព្រះជាម្ចាស់និងមនុស្សលោកភ្ជាប់គ្នា”។ នៅពេលហ្នឹង មារសាតាំងនិងការល្បួងទាំងអស់ បានចាញ់អស់ហើយ នៅពេលហ្នឹងការប្រយុទ្ធចុងក្រោយរបស់ព្រះយេស៊ូនៅលើឈើឆ្កាងបានបញ្ចប់ហើយ។ នៅពេលហ្នឹង ផ្នូរគឺផ្នូរទទេអស់កល្បជានិច្ច។
“ព្រះយេស៊ូគ្រីស្តមានព្រះជន្មរស់ឡើងវិញ អាលេលូយ៉ា! អាលេលូយ៉ា!”
បងប្អូនជាទីស្រឡាញ់ នៅយប់នេះគឺព្រះពន្លឺដ៏ពិសេសដែលផ្ទុះនៅក្នុងដួងចិត្តរបស់យើង អំបាញ់មិញយើងបានឃើញអណ្ដាតភ្លើងដ៏ធំ។ ប៉ុន្តែ នេះជាអណ្ដាតភ្លើងដែលផ្ទុះនៅក្នុងដួងចិត្តរបស់យើង គឺព្រះពន្លឺរបស់ព្រះយេស៊ូគ្រីស្ត និងព្រះអម្ចាស់ផ្ទាល់ ដែលបានយាងមកដើម្បីបំភ្លឺភាពងងឹតនៃជីវិតរបស់យើង។ ពិតមែន នៅក្នុងរាត្រីដ៏វិសុទ្ធនេះ ដែលបន្តិចម្ដងៗណែនាំឲ្យយើងមើលឃើញព្រះអាទិត្យរះ។ យើងនៅក្បែរព្រះជាម្ចាស់ នៅក្នុងព្រះយេស៊ូគ្រីស្តដែលមានព្រះជន្មរស់ឡើងវិញ ដែលយាងមកដើម្បីជួបយើងផ្ទាល់។ ប្រហែលដូចពីដើម ស្ដី្រៗដែលបានរត់ទៅផ្នូរ ដែលបានភ័យមែនទែន ក៏ប៉ុន្តែគេពោរពេញទៅដោយអំណរសប្បាយ។ ដោយសារ គេឮដំណឹងថា ព្រះអម្ចាស់យេស៊ូមានព្រះជន្មរស់ឡើងវិញ។
ដូច្នេះ បងប្អូនជាទីស្រឡាញ់ឲ្យយើងឈរឡើង ឲ្យយើងរត់ ឲ្យយើងប្រញាប់ប្រញាល់
ទី១ នៅក្នុងដួងចិត្តរបស់យើង ដើម្បីទុកឲ្យព្រះពន្លឺរបស់ព្រះគ្រីស្តដែលភ្លឺត្រចះត្រចង់ផ្ទុះឡើង មានភាពសិ្ថតស្ថេរ មានកម្លាំង ដើម្បីណែនាំឲ្យយើងទៅជាមនុស្សថ្មី ដែលទទួលការរំដោះ។
ទី២ នៅក្នុងជីវិតរបស់យើងជាប្រចាំ យើងខិតខំចែករំលែកជាមួយបងប្អូនឯទៀតៗ នូវព្រះពន្លឺដ៏អស្ចារ្យនេះ ដែលជាព្រះពន្លឺនៃសេចក្ដីសង្ឃឹម និងព្រះពន្លឺនៃសេចក្ដីសុខសាន្ត។
បងប្អូនជាទីស្រឡាញ់ មុខគេបង្អស់ព្រះយេស៊ូគ្រីស្តយប់នេះមានព្រះជន្មរស់ឡើងវិញនៅលើផែនដីនេះ ដើម្បីឲ្យយើងចេញពីអំពើបាប ចេញពីភាពងងឹត ចេញពីភាពឃោរឃៅដែលមាននៅក្នុងដួងចិត្តរបស់យើង។ ម្យ៉ាងទៀត ដើម្បីឲ្យយើងភ្ជាប់បន្តិចម្ដងៗនឹងអំណរសប្បាយនៃព្រះរាជ្យនៅស្ថានបរមសុខ ប៉ុន្តែលើផែនដីនេះ។ បងប្អូនជាទីស្រឡាញ់ យប់នេះឲ្យយើងបើកភ្នែកនៃដួងចិត្តរបស់យើង ជាភ្នែកនៃជំនឿដូចលោកយ៉ូហាន ដែលបានចូលនៅក្នុងផ្នូររបស់ព្រះយេស៊ូ និងមានជំនឿតែម្ដង។ បងប្អូនជាទីស្រឡាញ់ ឲ្យយើងបើកភ្នែកដើម្បីឲ្យយើងមើលឃើញនៅក្នុងជីវិតយើងប្រចាំ សញ្ញាសម្គាល់នៃវត្តមានរបស់ព្រះជាម្ចាស់។
ពីម្សិលមិញ ខ្ញុំបានរំលឹកអំពីព្រះយេស៊ូចាប់ផ្ដើមបង្ហាញផ្លូវនៃពន្លឺ ព្រះយេស៊ូបានចាប់ផ្ដើមបើកផ្លូវនៃពន្លឺសម្រាប់យើងនៅក្នុងភាពស្ងៀមស្ងាត់របស់ព្រះយេស៊ូ និងនៅក្នុងសក្ការៈបូជាដ៏កំពូលរបស់ព្រះយេស៊ូ។ នៅពេលនេះ គឺផ្លូវនេះមិនមែនជាផ្លូវដែលយើងត្រូវការទុកចោល ព្រះយេស៊ូបានបើកផ្លូវហើយដើម្បីឲ្យយើងចាប់ផ្ដើមដើរតាមផ្លូវនេះ។ ដើម្បីឲ្យយើងចាប់ផ្ដើមដើរតាមផ្លូវនេះ ដោយទទួលព្រះបន្ទូលរបស់ព្រះជាម្ចាស់ដែលចិញ្ចឹមយើង។ ដូចយើងបានស្ដាប់នៅក្នុងអត្ថបទលោកអេសាយ តាមពិតអត់ត្រូវការមានលុយដើម្បីញ៉ាំម្ហូបឆ្ងាញ់ៗ គឺព្រះបន្ទូលរបស់ព្រះជាម្ចាស់ដែលចិញ្ចឹមជីវិតរបស់យើងល្មម ដើម្បីធ្វើដំណើរនៅលើផ្លូវនៃពន្លឺដែលព្រះយេស៊ូបានបើកនៅក្នុងយប់ដ៏សុខសាន្តនេះ។ ដោយទទួលព្រះកាយព្រះគ្រីស្ត ដែលជាព្រះកាយនៃព្រះពន្លឺដែលយើងទទួលនៅគ្រប់ពេលវេលានៅក្នុងពិធីអភិបូជា។
បងប្អូនជាទីស្រឡាញ់ យប់នេះយើងអាចទទួលស្គាល់ថា យើងជាប្រជារាស្រ្តរបស់ព្រះជាម្ចាស់ យើងជាប្រជារាស្ត្រនិងអ្នកចម្បាំងការពារពន្លឺនៅលើផែនដីនេះ។ ផ្លូវដែលព្រះយេស៊ូបានបើកឲ្យយើង គឺផ្លូវមួយដែលណែនាំឲ្យយើងមានជីវិតសាមញ្ញធម្មតា ដើម្បីដោះចេញភាពច្រណែនដែលយើងមាននៅក្នុងដួងចិត្តរបស់យើង ឲ្យយើងមានជីវិតសម្រាប់ព្រះជាម្ចាស់ និងសម្រាប់បងប្អូនឯទៀតៗ។ ដើម្បីឲ្យយើងសម្លាប់ភាពអាត្មានិយមដែលមាននៅក្នុងដួងចិត្តរបស់យើង ឲ្យយើងមានជីវិតដែលបម្រើ ដែលស្រឡាញ់ ដើម្បីជិះជាន់អំណួតនិងសេចក្ដីត្រូវការអំណាច ដែលយើងមាននៅក្នុងដួងចិត្តរបស់យើង។ នេះជាផ្លូវនៃអ្នកចម្បាំងការពារពន្លឺ ដែលព្រះយេស៊ូនៅរាត្រីដ៏សុខសាន្តនេះ រាត្រីដ៏វិសុទ្ធនេះ អញ្ជើញយើងឲ្យយើងចាប់ផ្ដើមធ្វើដំណើរបន្តិចម្ដងៗ ជាពិសេសឲ្យយើងចាប់ផ្ដើមទទួលនៅក្នុងដូងចិត្តរបស់យើង។ ពិតមែន ជីវិតសាមញ្ញដែលព្រះយេស៊ូបានប្រទានពីដើមរៀងមក ដូចនៅក្នុងអត្ថបទទីមួយដែលយើងបានស្ដាប់ថ្ងៃនេះ នៅពេលព្រះយេស៊ូបានបង្កើតបុរសនិងស្ដ្រី ព្រះយេស៊ូមានព្រះបន្ទូលថា “មើល! យើងប្រគល់ធម្មជាតិទាំងប៉ុន្មានដែលមានគ្រាប់ពូជដុះនៅពាសពេញលើផែនដី និងដើមឈើដែលមានផ្លែមានគ្រាប់បន្តពូជ ឲ្យអ្នករាល់គ្នាធ្វើជាអាហារ”។
ពីដើមរៀងមក ព្រះជាម្ចាស់បានប្រទានអ្វីៗទាំងអស់ដែលយើងត្រូវការមាន ដើម្បីចិញ្ចឹមជីវិតរបស់យើងនៅក្នុងរបៀបសាមញ្ញធម្មតា។ ពិតមែន ព្រះជាម្ចាស់បានប្រទានជីវិត ជីវិតសម្រាប់ព្រះជាម្ចាស់ និងសម្រាប់បងប្អូនឯទៀតៗ។ នៅក្នុងអត្ថបទលោកអេសាយ “ព្រះបន្ទូលរបស់ព្រះជាម្ចាស់ហាក់បីដូចជាពាក្យរបស់យើងក៏ដូច្នោះដែរ គឺពាក្យដែលចេញពីមាត់របស់យើង និងមិនវិលត្រឡប់មករកយើងវិញឡើយ ដរាបណាទាល់តែបានសម្រេចតាមបំណងរបស់យើងជាមុនសិន គឺបំពេញកិច្ចការដែលយើងចាត់ឲ្យមក ធ្វើរួចរាល់សព្វគ្រប់”។ ព្រះបន្ទូលដែលចូលនៅក្នុងដួងចិត្តរបស់យើង ដឹងថាព្រះជាម្ចាស់ណែនាំឲ្យព្រះបន្ទូលនេះ ទៅជាព្រះបន្ទូលដ៏មានជីវិតដែលយើងខិតខំអនុវត្ត ឲ្យយើងខិតខំរស់នៅតាមជីវិតរបស់យើងប្រចាំ។ ពិតមែន ជីវិតដើម្បីបម្រើ និងដើម្បីស្រឡាញ់ ដូចយើងបានស្ដាប់នៅក្នុងអត្ថបទរបស់លោកប៉ូលនៅថ្ងៃនេះ “បងប្អូនវិញក៏ដូច្នោះដែរ ចូរចាត់ទុកថាខ្លួនបានស្ដាប់រួចផុតពីអំណាចបាប ហើយបងប្អូនមានជីវិតរស់សម្រាប់ព្រះជាម្ចាស់ដោយរួមជាមួយព្រះគ្រីស្តយេស៊ូ”។ នេះជាអ្វីដែលព្រះយេស៊ូបានណែនាំយើង “សូមស្រឡាញ់គ្នាទៅវិញទៅមកដូចខ្ញុំបានស្រឡាញ់អ្នករាល់គ្នា និងសូមបម្រើគ្នាទៅវិញទៅមកដូចខ្ញុំបានបម្រើបងប្អូនដែរ”។
បងប្អូនជាទីស្រឡាញ់ យប់នេះយើងជាប្រជារាស្រ្តនៃអ្នកចម្បាំងការពារពន្លឺ យប់នេះឲ្យយើងឈរឡើង នៅក្នុងភូមិភាគភ្នំពេញទាំងមូលយើងរួមគ្នា ជាពិសេសជាមួយបងប្អូនដែលទទួលអគ្គសញ្ញាជ្រមុជទឹកបន្តិចទៀតនេះ។ យប់នេះ ឲ្យយើងពាក់អាវសរ តែមិនមែនអាវសរធម្មតា គឺអាវសរនៃព្រះពន្លឺគឺព្រះយេស៊ូគ្រីស្តផ្ទាល់។ យប់នេះ រួមជាមួយបងប្អូនដែលទទួលអគ្គសញ្ញាជ្រមុជទឹក ឲ្យយើងបំពាក់ព្រះយេស៊ូគ្រីស្ត ឲ្យយើងបំពាក់អាវសរនៃព្រះពន្លឺ និងឲ្យយើងប្រញាប់ប្រញាល់ដើម្បីស្រឡាញ់ ដើម្បីបម្រើ ដើម្បីព្យាបាល និងដើម្បីរំដោះ។
ព្រះយេស៊ូគ្រីស្តមានព្រះជន្មរស់ឡើងវិញ អាលេលូយ៉ា! អាលេលូយ៉ា!
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
