ពិធិបុណ្យហែស្លឹក ជាបុណ្យប្រពៃណីមួយរបស់គ្រីស្តបរិស័ទកាតូលិក រៀបចំឡើងមួយសប្តាហ៍ មុនបុណ្យព្រះយេស៊ូមានព្រះជន្មរស់ឡើងវិញដ៏រុងរឿង និងជាពិធីបុណ្យរំលឹកអំពីកិច្ចការសង្គ្រោះរបស់ព្រះជាម្ចាស់សម្រាប់មនុស្សលោក។
«ជយោ! ព្រះរាជវង្សព្រះបាទដាវីឌ!» សំឡេងជ័យឃោសច្រៀងអបអរ ដែលបានរៀបចំជាក្បួនដង្ហែ ដោយមានគ្រីស្តបរិស័ទលើកស្លឹករ៉ាមគ្រវីតាមក្រោយឈើឆ្កាងរបស់ព្រះយេស៊ូ ចូលទៅកាន់ព្រះវិហារ បន្ទាប់ពីលោកអភិបាលព្រះសហគមន៍ធ្វើព្រះពរលើស្លឹ្ទាំងនោះ។
លោកឧបដ្ឋាក ជួរ ដាម៉ូ ដែលត្រៀមនឹងទទួលអគ្គសញ្ញាតែងតាំងជាបូជាចារ្យនៅខែសីហាខាងមុខនេះ មានប្រសាសន៍ថា នៅក្នុងជីវិតរស់នៅជាបព្វជិតរបស់លោក ភាពឯកោបានរួមរឹតលោក តែគំរូរបស់ព្រះយេស៊ូបានជួយលោកឲ្យឈ្នះសេចក្តីនេះ។
លោកឧបដ្ឋាកបញ្ជាក់ថា «ព្រះយេស៊ូរួមដំណើរជាមួយខ្ញុំ និងតាមរយៈគំរូនេះបានជួយខ្ញុំឱ្យចេះបម្រើដោយ ចិត្តសុភាពរាបសារ ចិត្តអត់ធ្មត់ ចិត្តស្រឡាញ់ និងចេះដាក់ខ្លួន។»
«សម្រាប់ខ្ញុំវិញព្រះយេស៊ូ គឺជាវីរបុរសនៅក្នុងចិត្តរបស់ខ្ញុំតាំងពីតូចមកម្ល៉េះ ព្រោះព្រះយេស៊ូបានសង្គ្រោះអ្នកតូចតាចឱ្យមានជីវិតថ្លៃថ្នូរឡើងវិញ។» អ្នកស្រី ង៉ែត ធារី ជាគ្រីស្តបរិស័ទនៅព្រះសហគមន៍ភ្នំពេញថ្មី មានប្រសាសន៍នេះ បន្ទាប់ពីបញ្ចប់កម្មវិធីហែស្លឹក។
អ្នកស្រីធារី ក្នុងវ័យ៤០ឆ្នាំ បញ្ជាក់ទៀតថា ការស៊ូប្តូរជីវិតរបស់ព្រះយេស៊ូសម្រាប់មនុស្សលោក បានជួយណែនាំជីវិតរបស់គាត់ «ឱ្យមានភាពស្មោះត្រង់ មានចិត្តមេត្តាករុណា និងជាគំរូសម្រាប់ឱ្យខ្ញុំរៀនធ្វើតាម។»
ពិធីបុណ្យហែស្លឹកនេះ ព្រះសហគមន៍កាតូលិកបានប្រារព្ធព្រមគ្នាកាលពីថ្ងៃអាទិត្យទី២ ខែមេសា កន្លងទៅនៅតាមព្រះសហគមន៍នីមួយៗ។ មុនបុណ្យនេះមួយថ្ងៃ គ្រីស្តបរិស័ទបានប្រមូលផ្តុំគ្នា រចនាស្លឹកត្នោតជារូបរាងផ្សេងៗ ដើម្បីទុកសម្រាប់ថ្ងៃបុណ្យ និងដើម្បីលំអរបរិយាកាសនៃពិធី។
ជាមួយគ្នានេះ គ្រីស្តបរិស័ទយកស្លឹកដែលបានប្រោសទឹកព្រះពររួច បន្ទាប់ពីធីបុណ្យ យកទៅផ្ទះរៀងៗខ្លួន ដាក់តាំងនៅកន្លែងមួយ ដើម្បីរំលឹកអំពីទុក្ខលំបាករបស់ព្រះយេស៊ូ និងកិច្ចការសង្គ្រោះរបស់ព្រះអង្គសម្រាប់មនុស្សលោក។
ក្នុងធម្មទេសនានាថ្ងៃអាទិត្យកន្លងទៅនៅព្រះវិហារសន្តសិលានិងសន្តប៉ូលភ្នំពេញថ្មី លោកអភិបាលអូលីវីយ៉េ ជ្មីតហស្លេ ក្រើនរំឭកគ្រីស្តបរិស័ទអំពីព្រះរាជកិច្ចរបស់ព្រះយេស៊ូ និងការតយុទ្ធរបស់ព្រះអង្គជាមួយមនុស្សលោកដោយចិត្តសុភាពរាបសារ មិនប្រើហិង្សា និងស្តាប់បង្គាប់ព្រះជាម្ចាស់ជាព្រះបិតាដោយបូជាជីវិតសម្រាប់មនុស្សទាំងអស់ ដើម្បីនាំគេទៅឯព្រះអង្គវិញ។
លោកអភិបាលអូលីវីយ៉េ ស្នើឱ្យគ្រីស្តបរិស័ទចូលរួមជាមួយលោកបូជាចារ្យក្នុងការប្រយុទ្ធដើម្បីការពារពន្លឺ គឺធ្វើតាមព្រះបន្ទូល ដោយប្រុងស្មារតីនិងអធិដ្ឋានកុំឱ្យចាញ់ការល្បួង ដេលមានដូចជា
លុយ ចិត្តលោភលន់ អំណាច កំសាក និងឆន្ទៈរបស់ខ្លួនច្បាស់លាស់។ ចំណុចទាំងនេះ នឹងបង្កឲ្យបាត់បង់ពន្លឺនៃសេចក្តីពិត៕
ដោយដាលីស
