អភិបូជាពិធីប្រសិទ្ធីពរលើប្រេងពិសិដ្ឋ
នៅព្រះសហគមន៍សន្តសិលា និងសន្តប៉ូល ភ្នំពេញថ្មី
ភ្នំពេញថ្មី ថ្ងៃទី២៩ ខែមីនា ឆ្នាំ២០២៣
កាលពីដើមដំបូងបង្អស់ ព្រះជាម្ចាស់បានបង្កើតផ្ទៃមេឃ និងផែនដី។ នៅគ្រានោះ ផែនដីគ្មានរូបរាង និងនៅទទេ មានតែភាពងងឹតពីលើទីជម្រៅទឹក ហើយព្រះវិញ្ញាណរបស់ព្រះជាម្ចាស់នៅរេរាពីលើផ្ទៃទឹក។ ព្រះជាម្ចាស់មានព្រះបន្ទូលថា៖ «ចូរមានពន្លឺ!» ពន្លឺក៏កើតមានឡើង។ ព្រះជាម្ចាស់ទតឃើញថា ពន្លឺនោះល្អប្រសើរហើយ ព្រះអង្គក៏បានញែកពន្លឺចេញពីភាពងងឹត។ ព្រះជាម្ចាស់ហៅពន្លឺថា “ថ្ងៃ” និងហៅភាពងងឹតថា “យប់”។ កណ ១,១-៥
លោកអភិបាល លោកឪពុក បងប្អូនជាទីស្រឡាញ់
អំបាញ់មិញ ខ្ញុំបានអានកំណើតពិភពលោកនៅពេលព្រះជាម្ចាស់បានបង្កើតពិភពលោក ដើមដំបូងនៃពិភពលោកព្រះជាម្ចាស់បានបង្កើតពន្លឺ នៅពេលនេះយើងឃើញព្រះអាទិត្យកំពុងត្រៀមលិច។ ថ្ងៃនេះ ពិតមែនយើងមានអំណរសប្បាយជួបជុំគ្នា នេះជាលើកទីមួយដែលលោកឧបដ្ឋាកបានចូលក្នុងអភិបូជាប្រសិទ្ធីពរលើប្រេងពិសិដ្ឋក្នុងតួនាទីនេះ។ លោកបូជាចារ្យមួយចំនួនក៏ជាលើកទីមួយដែរ ដែលបានចូលជាមួយយើង នៅក្នុងព្រះសហគមន៍កម្ពុជា ក៏ដូចជានៅក្នុងក្រុមបូជាចារ្យបម្រើព្រះសហគមន៍នៅកម្ពុជា។ លោកអភិបាល សិលា សួន ហង្សលី ក៏ជាលើកទីមួយដែលបានចូលរួមអភិបូជានេះ ក្នុងតួនាទីជាលោកអភិបាលព្រះសហគមន៍កាតូលិកភូមិភាគកំពង់ចាម លោកអភិបាល គីគេ ជាលើកទី២២ ខ្ញុំជាលើកទី១៤។
យប់នេះ យើងឃើញបងប្អូនមកយ៉ាងច្រើនដើម្បីលើកតម្កើងព្រះជាម្ចាស់ ជាពិសេសនៅថ្ងៃដែលយើងអរព្រះគុណព្រះអង្គសម្រាប់លោកបូជាចារ្យរបស់យើង អរព្រះគុណព្រះជាម្ចាស់សម្រាប់ប្រេងដែលព្រះអង្គប្រទានពរបន្តិចទៀត ដែលយើងនឹងប្រើនៅរាត្រីបុណ្យចម្លងខាងមុខនេះ។ សម្រាប់បងប្អូនដែលបានត្រៀមខ្លូនពីយូរឆ្នាំហើយ ដើម្បីទទួលអគ្គសញ្ញាជ្រមុជទឹកទូទាំងប្រទេសកម្ពុជា។ យប់នេះ ខ្ញុំសូមអនុញ្ញាតនិយាយទៅលោកបូជាចារ្យ ហើយបងប្អូនសូមទទួលស្តាប់និងចូលនៅក្នុងដំណើររួមជាមួយគ្នា។
ព្រះយេស៊ូមានព្រះបន្ទូលថា “ព្រះវិញ្ញាណដ៏វិសុទ្ធសណ្ឋិតលើខ្ញុំ” នេះជាព្រះបន្ទូលដែលព្រះយេស៊ូបានថ្លែងនៅពេលចូលក្នុងធម្មសាលាលើកដំបូង។ ប៉ុន្តែកុំឱ្យយើងភ្លេចថា នៅពេលព្រះយេស៊ូចូលនៅក្នុងធម្មសាលាដំបូង ព្រះយេស៊ូបានទទួលពិធីជ្រមុជទឹក ពោរពេញដោយព្រះវិញ្ញាណដ៏វិសុទ្ធ។ នៅពេលព្រះយេស៊ូបានទទួលពិធីជ្រមុជទឹកហើយ ព្រះយេស៊ូបានទៅវាលរហោស្ថាន៤០ថ្ងៃ៤០យប់ ព្រះអង្គបានទទួលការល្បួង នៅពេលព្រះយេស៊ូចាប់ផ្តើមឃ្លាននៅថ្ងៃទី៤០។ នៅពេលនោះ ព្រះយេស៊ូបានឈ្នះមារសាតាំង។ យើងត្រូវតែមើលឃើញ ការសន្ទនារវាងព្រះយេស៊ូនឹងមារសាតាំង នេះជាការប្រយុទ្ធរវាងព្រះពន្លឺនិងភាពងងឹត។ ពិតមែន ព្រះយេស៊ូគ្រីស្តជាអ្នកចម្បាំងការពារពន្លឺ ពោរពេញដោយព្រះវិញ្ញាណដ៏វិសុទ្ធ ព្រះអង្គបានឈ្នះការប្រយុទ្ធនេះ។
លោកឪពុកជាទីស្រឡាញ់ នៅថ្ងៃដែលយើងបានទទួលអគ្គសញ្ញាជាបូជាចារ្យ យើងបានទទួលព្រះវិញ្ញាណដ៏វិសុទ្ធដ៏ពេញលក្ខណៈ យើងបានអភិសេកដោយប្រេងពិសិដ្ឋដើម្បីចូលនៅក្នុងឋានៈជាបូជាចារ្យ តាមព្រះយេស៊ូគ្រីស្តដែលជាមហាបូជាចារ្យ។ នៅពេលនេះ យើងហ៊ាននិយាយថា “យើងជាអ្នកចម្បាំងការពារពន្លឺ”។ មិនមែនជាអ្នកចម្បាំង ដើម្បីបំផ្លាញ ដើម្បីណែនាំឱ្យមានភាពស្អប់គ្នា ប៉ុន្តែដើម្បីចូលនៅក្នុងការប្រយុទ្ធរបស់ព្រះជាម្ចាស់ ដើម្បីឱ្យពន្លឺនិងសេចក្តីពិតឈ្នះគ្រប់ពេលវេលា គ្រប់កាលៈទេសៈ។ បន្តិចទៀត ដែលយើងចូលនៅក្នុងសប្តាហ៍ពិសិដ្ឋ យើងចូលនៅក្នុងការប្រយុទ្ធចុងក្រោយបំផុតរបស់ព្រះយេស៊ូ ដើម្បីឈ្នះអំពើហិង្សា ដើម្បីឈ្នះអំពើបាប ដើម្បីឈ្នះការស្អប់គ្នានៅលើផែនដីទាំងមូល។
លោកឪពុកជាទីស្រឡាញ់ ពិតមែនយើងជាអ្នកចម្បាំងការពារពន្លឺ ការប្រយុទ្ធរបស់យើងគឺជាការប្រយុទ្ធដើម្បីសិទ្ធិសេរីភាព ដើម្បីរំដោះមនុស្សលោកឱ្យរកឃើញផ្លូវនៃជីវិតអស់កល្បជានិច្ច។ អាវុធរបស់យើង គឺជំនឿ គឺសេចក្តីស្រឡាញ់ គឺធម៌មេត្តាករុណា និងសេចក្តីសង្ឃឹម។ សមរភូមិរបស់យើងគឺដួងចិត្តរបស់យើងយ៉ាងពិតប្រាកដ ដោយសារនៅក្នុងដួងចិត្តរបស់យើង យើងមានការប្រយុទ្ធយ៉ាងច្រើន។ ប៉ុន្តែ ជាពិភពលោកទាំងមូលដែលយើងឃើញមានការចងដៃចងជើង ដែលណែនាំឱ្យយើងបាត់បង់សេរីភាព។ សេរីភាពដែលយើងបានទទួលយ៉ាងពេញលក្ខណៈ នៅពេលព្រះជាម្ចាស់បានបង្កើតយើងជាបុរសជាស្ត្រី ជាតំណាង ជារូបរាងរបស់ព្រះជាម្ចាស់។ លក្ខន្តិករបស់យើង គឺព្រះពន្ទូលរបស់ព្រះជាម្ចាស់។
យើងឃើញព្រះអាទិត្យកំពុងលិច ពន្លឺកំពុងបាត់ ប៉ុន្តែកុំឱ្យយើងចេញតាមទ្វារដ៏តូចមួយ ដូចលោកយូដាដែលបានចេញពីពិធីជប់លៀងជាមួយព្រះយេស៊ូ នៅពេលនោះយប់ងងឹតហើយ។ ថ្ងៃនេះ នៅម៉ោង៦ល្ងាចយើងអាចមើលឃើញដោយភ្នែកទទេ គឺភពព្រះច័ន្ទ ភពសុក្រ ភពព្រហស្បតិ៍ ភពអង្គារដែលបាននៅត្រង់ជួរគ្នា ហេតុការណ៍នេះកើតឡើង១០០ឆ្នាំម្តង។ យប់នេះ លោកអភិបាល លោកបូជាចារ្យ នឹងប្រកាសពាក្យសច្ចាសាជាថ្មី នៅក្នុងអគ្គសញ្ញាជាអភិបាល ជាបូជាចារ្យ សូមផ្ញើបេសកកម្មរបស់យើង ជីវិតរបស់យើងទៅលើព្រះនាងម៉ារី។ ដោយសារ ពិតមែនព្រះនាងម៉ារីជាអ្នកចម្បាំងការពារពន្លឺមុនគេបង្អស់ ចាប់ផ្តើមតាំងពីពេលព្រះនាងបានឆ្លើយថា “នាងខ្ញុំជាអ្នកបម្រើរបស់ព្រះជាម្ចាស់ សូមធ្វើតាមព្រះហឫទ័យរបស់ព្រះអង្គចុះ”។ នៅពេលនោះ ព្រះនាងម៉ារីឈរឡើង និងប្រញាប់ប្រញាល់ធ្វើដំណើរដើម្បីចែករំលែកដំណឹងល្អនេះដល់យាយអេលីសាប៊េត។
លោកឪពុកជាទីស្រឡាញ់ ឱ្យយើងឈរឡើង ឱ្យយើងប្រញាប់ប្រញាល់ ដើម្បីចែករំលែកដំណឹងល្អដល់ជនក្រីក្រ ដើម្បីណែនាំឱ្យបងប្អូនបានរកឃើញជីវិតថ្មី ដោយដោះគ្រប់ចំណងដៃចំណងជើង ដែលណែនាំឱ្យយើងវង្វេងនៅក្នុងផ្លូវងងឹត ជាពិសេសការច្រណែន ការលោភលន់។ ឱ្យយើងប្រញាប់ ដើម្បីបើកភ្នែករបស់បងប្អូនដែលយើងទទួលខុសត្រូវ ដើម្បីមើលឃើញការអស្ចារ្យនៃជីវិត ជាអំណោយទានដែលយើងបានទទួលពីព្រះជាម្ចាស់។ លោកឪពុកជាទីស្រឡាញ់ យើងជាអ្នកចម្បាំងការពារពន្លឺ សូមឈរឡើងឱ្យយើងដើរត្រង់នៅក្នុងអំណរសប្បាយដែលយើងបានទទួលពីព្រះជាម្ចាស់។ ព្រះជាម្ចាស់ជាខែល ដើម្បីការពារយើងនៅក្នុងការប្រយុទ្ធប្រឆាំងនឹងភាពងងឹត។
ប៉ុន្មានថ្ងៃមុន ខ្ញុំបានចូលរួមកម្មវិធីបូជនីយេសចរជាមួយយុវជនភូមិភាគភ្នំពេញ ជាង២០០នាក់។ នៅពេលយើងឃើញគេកំពុងដើរ កំពុងអធិដ្ឋាន កំពុងស្តាប់ព្រះបន្ទូល កំពុងស្តាប់ការអប់រំ… ខ្ញុំមានសំណួរមួយថា តើយើងត្រូវចែករំលែកអ្វីខ្លះដល់ពួកគាត់? តើយើងត្រូវនិយាយអ្វីខ្លះដល់ពួកគាត់ដើម្បីឱ្យគេភ្លឺនៅក្នុងជីវិតផ្ទាល់ខ្លួន? នៅពេលនោះខ្ញុំបាននឹកឃើញដល់លិខិតរបស់សន្តម្នាក់ ដែលបានសរសេរសៀវភៅ “ព្រះអម្ចាស់ដ៏តូច”។ នៅឆ្នាំ១៩៤៤ គាត់ក៏បានសរសេរលិខិតមួយច្បាប់មុនគាត់ស្លាប់ជូនមេទាហានម្នាក់ គាត់ក៏បានដាក់សំណួរថា តើយើងត្រូវការនិយាយអ្វីខ្លះដល់មនុស្សលោក? គាត់បាននិយាយថា តាមពិតមានបញ្ហាតែមួយសម្រាប់មនុស្សលោក គឺធ្វើដូចម្តេចឱ្យមនុស្សលោករកឃើញតម្លៃនៃជីវិតនៅក្នុងវិញ្ញាណ ឱ្យមនុស្សលោកចាប់អារម្មណ៍ និងព្រួយបារម្ភអំពីជីវិតខាងផ្លូវវិញ្ញាណ។ យើងមិនអាចរស់នៅក្នុងសម្ភារៈនិយម នៅក្នុងជីវិតនយោបាយ ដោយធ្វើរបាយការណ៍ ឬគម្រោងការតែប៉ុណ្ណឹង។ ប៉ុន្តែ យើងត្រូវការរស់នៅក្នុងសេចក្ដីស្រឡាញ់ដ៏ពិសេសដែលមកពីព្រះជាម្ចាស់។ សព្វថ្ងៃ មនុស្សនៅលើពិភពលោកជាង២០០០លាននាក់ ចេះតែស្ដាប់សំលេងរបស់មនុស្សយន្ត (Robots) ចេះតែយកសំលេងរបស់មនុស្សយន្ត (Robots) និងចេះតែធ្វើតាមគំនិតរបស់មនុស្សយន្ត (Robots) តែប៉ុណ្ណឹង។
នៅថ្ងៃអាទិត្យ យើងបានស្តាប់នៅក្នុងអត្ថបទទី១ “ប្រជារាស្ត្ររបស់យើងអើយ ពេលយើងបើកផ្នូរហើយនាំអ្នករាល់គ្នាចេញមក នោះអ្នករាល់គ្នានឹងទទួលស្គាល់ថា យើងពិតជាព្រះអម្ចាស់មែន យើងនឹងដាក់វិញ្ញាណយើងក្នុងអ្នករាល់គ្នា ដើម្បីឱ្យអ្នករាល់គ្នាមានជីវិត យើងនឹងនាំអ្នករាល់គ្នាទៅទឹកដីរបស់ខ្លួនវិញ”។ ចេញពីផ្នូរ ទទួលព្រះវិញ្ញាណដើម្បីទទួលជីវិតរបស់ព្រះជាម្ចាស់ដ៏ពេញលក្ខណៈ។
បងប្អូនជាទីស្រឡាញ់ យើងត្រូវការមានអ្នកចម្បាំងការពារពន្លឺ ដើម្បីបើកកូនសោរនៅក្នុងដួងចិត្តរបស់យើងដែលរារាំងផ្លូវ ដើម្បីណែនាំឱ្យយើងបំផ្លាញភាពងងឹតនៅក្នុងពិភពលោក។ ដោយដឹងថា ភាពងងឹតមានភាពដ៏ស្អាតបំផុត ដែលណែនាំឱ្យយើងវង្វេងច្រឡំយ៉ាងច្រើន ដូចពាក្យរបស់មារសាតាំងនិយាយទៅព្រះយេស៊ូ។ ល្អស្ដាប់ណាស់ ចង់គ្រប់គ្រងទីក្រុង ចង់បាននំបុ័ង ចង់បានអំណាច ខ្ញុំឱ្យទាំងអស់ ជាពិសេសនៅពេលនោះព្រះយេស៊ូកំពុងឃ្លាន។ ប្រសិនបើ យើងមើលពិភពលោករបស់យើងសព្វថ្ងៃ ណែនាំឱ្យយើងផ្តាច់ទំនាក់ទំនងជាមួយធម្មជាតិ ដោយសាងសង់សុទ្ធតែទីក្រុង អាគារបេតុង ដែលញុំាំតែម្ហូបអាហារដែលគេកែច្នៃ។ សព្វថ្ងៃ ពិភពលោករបស់យើងណែនាំឱ្យរូបកាយរបស់យើង ប្រាជ្ញារបស់យើងទៅឆ្ងាយពីជម្រៅចិត្តនៃសេចក្ដីត្រូវការ។ ពិភពលោករបស់យើងសព្វថ្ងៃ ណែនាំឱ្យយើងផ្តាច់ទំនាក់ទំនងជាពិសេសជាមួយផ្លូវវិញ្ញាណ ដែលណែនាំឱ្យវត្តមានរបស់ព្រះជាម្ចាស់ចេញពីសង្គមរបស់យើង ដែលណែនាំឱ្យយើងដើរឆ្ងាយពីព្រះជាម្ចាស់នៅគ្រប់ទីកន្លែងដែលយើងមើលឃើញ។
យើងជាអ្នកចម្បាំងការពារពន្លឺ កុំឱ្យយើងខ្លាចអី ឱ្យយើងសំឡឹងមើលព្រះយេស៊ូគ្រីស្តនៅលើឈើឆ្កាង ជាពិសេសនៅពេលព្រះយេស៊ូគ្រីស្តលាងជើងដល់ក្រុមសាវ័ក ជាពិសេសនៅពេលព្រះយេស៊ូអធិដ្ឋាននៅសួនកេតសេម៉ានី ជាពិសេសនៅពេលព្រះយេស៊ូនៅស្ងៀមស្ងាត់នៅក្បែរលោកប៉ុនពីឡាត់។ នៅពេលព្រះយេស៊ូដួលលើកទីមួយ លើកទីពីរ លើកទីបី ដោយសារឈើឆ្កាង នៅពេលព្រះយេស៊ូសោយទិវង្គតនៅលើព្រះឈើឆ្កាង ដោយផ្ញើវិញ្ញាណទៅលើព្រះជាម្ចាស់ “សព្វគ្រប់ហើយ”។
លោកឪពុកជាទីស្រឡាញ់ ពិតមែនយើងជាអ្នកចម្បាំងការពារពន្លឺ ដើម្បីធ្វើបានយើងត្រូវការមានគុណធម៌នៅក្នុងជីវិតរបស់យើង៖
ទី១ ភក្តីភាព ភក្ដីភាពចំពោះព្រះសហគមន៍ ភក្តីភាពចំពោះព្រះជាម្ចាស់ ភក្តីភាពចំពោះប្រជារាស្ត្ររបស់យើងដែលកំពុងទន្ទឹងរង់ចាំសេចក្តីពិត និងចំពោះបេសកកម្មរបស់យើង។
ទី២ ចិត្តអត់ធ្មត់ តាមពិតអ្នកចម្បាំងការពារពន្លឺដើរមួយៗ ដោយសារគាត់ដឹងថាគាត់ចូលរួមនៅក្នុងពេលវេលាដ៏សំខាន់នៃប្រវត្តិរបស់មនុស្សលោក។ មុនណែនាំឱ្យមនុស្សលោកកែប្រែ យើងត្រូវការកែប្រែខ្លួនឯង នេះជាចំណុចសំខាន់បំផុតដើម្បីទៅជាអ្នកចម្បាំងការពារពន្លឺ។ នៅក្នុងភាពអត់ធ្មត់ យើងត្រូវតែអធិដ្ឋានទៅព្រះជាម្ចាស់កែប្រែដួងចិត្តរបស់យើង តាមព្រះហឫទ័យរបស់ព្រះអង្គដើម្បីយល់ចិត្តបងប្អូនដែលយើងទទួលនៅក្នុងបេសកកម្ម និងព្រះសហគមន៍របស់យើង។
ទី៣ មានជំនាញប៉ិនប្រសប់ យើងជាកូនពន្លឺដែលត្រូវចូលនៅក្នុងការប្រយុទ្ធដ៏តូច ប៉ុន្តែដោយដឹងថាការប្រយុទ្ធនីមួយៗមានតម្លៃណាស់។ យើងត្រូវការវាយតម្លៃ តាមព្រះពន្លឺនៃព្រះវិញ្ញាណដ៏វិសុទ្ធ។ យើងទទួលជីវិតដ៏តូចតាច ជីវិតដ៏មានតម្លៃបំផុត ជីវិតរបស់បងប្អូនម្នាក់ៗដែលយើងត្រូវការធ្វើដំណើររួមជាមួយគ្នា ដើម្បីមើលឃើញពន្លឺ។
ទី៤ មានចិត្តសប្បុរសនិងពោរពេញដោយសេចក្ដីស្រឡាញ់ លោកឪពុកជាទីស្រឡាញ់យើងជាអ្នកចម្បាំងការពារពន្លឺយើងត្រូវការមាននេះ។ យើងមិនត្រូវមានចិត្តស្អប់ ឬចិត្តច្រណែន ផ្ទុយទៅវិញយើងដើរដោយនឹកឃើញព្រះបន្ទូលរបស់ព្រះជាម្ចាស់ជានិច្ច “សូមស្រឡាញ់សត្រូវ សូមធ្វើអំពើល្អដល់មនុស្សដែលស្អប់យើង ជាពិសេសសូមស្រឡាញ់គ្នាទៅវិញទៅមកដូចខ្ញុំបានស្រឡាញ់អ្នករាល់គ្នាដែរ”។
ទី៥ ថែរក្សា ពិតមែនអ្នកចម្បាំងការពារពន្លឺថែរក្សារហូត ពាក្យប្រស្នារបស់ព្រះយេស៊ូអំពីមនុស្សសប្បុរសកំពុងធ្វើដំណើរដោយចេះមើលអ្នកដែលកំពុងរងទុក្ខលំបាក ដោយយកចិត្តទុកដាក់ ដោយស្រឡាញ់ ដោយណែនាំឱ្យគេមានជីវិតថ្មី។
ទី៦ បូជា លះបង់ និងតស៊ូ អ្នកចម្បាំងការពារពន្លឺជាអ្នកដែលបូជា លះបង់ និងតស៊ូ ដោយនឹករលឹកទុក្ខលំបាករបស់យើងទាំងអស់។ នឹករលឹករបួសរបស់យើង នឹករលឹកអំពើបាបរបស់យើង ដោយដឹងថាព្រះយេស៊ូបានលាងជម្រះនៅក្នុងព្រះលោហិតរបស់ព្រះគ្រីស្ត នេះជាកម្លាំងរបស់យើងសព្វថ្ងៃដើម្បីចូលនៅក្នុងសង្រ្គាម ប្រយុទ្ធរវាងភាពងងឹតនិងពន្លឺ។
ទី៧ ថែរក្សាស្នាមញញឹម ដោយសារអ្នកចម្បាំងការពារពន្លឺញញឹមគ្រប់ពេលវេលា មិនដែលភ័យខ្លាច ដោយសារគាត់ដឹងថាមានសេចក្ដីក្លាហានទៅមុខជានិច្ច។ ដោយសារមានព្រះជាម្ចាស់ដែលគង់នៅ ណែនាំឱ្យគាត់បើកទ្វារទាំងអស់ ជាពិសេសទ្វារដែលរារាំងផ្លូវនៃជីវិត។
បងប្អូនជាទីស្រឡាញ់ តាមពិតការប្រយុទ្ធតែងនៅក្បែរទ្វារ ក្បែរដួងចិត្ត ក្បែរភ្នែករបស់យើង ហេតុនេះហើយថ្ងៃនេះឱ្យយើងក្រោកឈរឡើង ដើម្បីធ្វើជាអ្នកប្រឆាំងនឹងភាពងងឹត ដើម្បីយើងធ្វើជាអ្នកចម្បាំងការពារពន្លឺ។ ដោយឈរឡើង ស្តាប់សន្តប៉ូលដែលណែនាំយើង “ដូច្នេះ ចូរមានជំហររឹងប៉ឹងឡើង ចូរយកសេចក្ដីពិតមកក្រវ៉ាត់ចង្កេះ យកសេចក្ដីសុចរិតធ្វើជាអាវក្រោះ យកចិត្តប្រុងប្រៀបផ្សាយដំណឹងល្អអំពីសេចក្ដីសុខសាន្ត មកពាក់ជាស្បែកជើង ជាពិសេសចូរយកជំនឿជាខែលដើម្បីឱ្យបងប្អូនអាចពន្លត់ភ្លើងទាំងប៉ុន្មានរបស់មារកំណាច ចូរទទួលការសង្រ្គោះមកធ្វើជាមួកដែក និងយកព្រះបន្ទូលរបស់ព្រះជាម្ចាស់មកធ្វើជាដាវរបស់ព្រះវិញ្ញាណ ចូរអធិដ្ឋានគ្រប់ពេលវេលាតាមការណែនាំរបស់ព្រះវិញ្ញាណ ដោយប្រើទាំងពាក្យអធិដ្ឋាននិងពាក្យអង្វរគ្រប់យ៉ាង ហើយប្រុងស្មារតីទូលអង្វរព្រះជាម្ចាស់ដោយចិត្តព្យាយាមបំផុត សម្រាប់ប្រជាជនដ៏វិសុទ្ធទាំងអស់”។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
