សន្តប៉ាទ្រីកជាសាសនទូតនិងសន្តឧបការីរបស់ប្រទេសអៀរឡង់។ លោកកើតនៅប្រទេសអង់គ្លេស ក្រោយ មក ត្រូវចោរសមុទ្រអៀរឡង់ចាប់ខ្លួន ទៅលក់ជាទាសករនៅប្រទេសអេស៊ីប។ ប៉ុន្តែ លោកគេចខ្លួនបាន លោកគិតក្នុងចិត្តរបស់លោកថា លោកនឹងជួយជនជាតិអៀរឡង់នេះ កែប្រែចិត្តគំនិត។ លោកចូលវត្តអារាមឥសីនៅក្រុងទូរ្ស៍ រៀនសូត្រនៅក្រុងអូក៍សែរ៍ ជាកូនសិស្សរបស់សន្តយ៉ែម៉ាណូ។ លោក ទៅសួរសុខទុក្ខឥសីនៅប្រទេសអ៊ីតាលី ជាទីបំផុតលោកជាលោកអភិបាលនៅប្រទេសអៀរឡង់។ លោកខិតខំ កសាងព្រះសហគមន៍ តាមរបៀបរស់នៅរបស់ពួកគេ ហើយលោកមានបុព្វជិតា ជាអ្នក ស្រុកនោះផងដែរ។ ទោះបីមានឧបសគ្គនិងទុក្ខលំបាកជាច្រើន ក៏ការប្រកាសដំណឹងល្អរបស់លោក កើតផលផ្លែល្អ។ អៀរឡង់ ក្លាយទៅជាផែនដីដែលមានសន្តបុគ្គលជាច្រើន និងសាសនទូតសម្រាប់ទ្វីបអឺរ៉ូបផងដែរ។ ជាង ៦០ ភាគរយ នៃចំនួនបូជាចារ្យនិងគ្រហស្ថអៀរឡង់ ចេញទៅប្រកាសដំណឹងល្អតាមប្រទេសនានា។ ក្រុមកងពលព្រះនាងម៉ារី (Legio Maria) មានដើមកំណើតពីអៀរឡង់នេះដែរ។ ជីវប្រវត្តរបស់លោក ដែលមានឈ្មោះថា Confession បានសរសេរថា៖ “ខ្ញុំជាកូនបំណុលរបស់ព្រះជាម្ចាស់ ពីព្រោះព្រះអង្គប្រទានព្រះអំណោយទានយ៉ាងច្រើនមកខ្ញុំ ដោយសារតាមរយៈខ្ញុំ មានប្រជាជនជាច្រើនកើតជាថ្មី ក្នុងព្រះជាម្ចាស់ ក្រោយមកបានទទួលអគ្គសញ្ញាលាបថ្ងាស ហើយមានបូជាចារ្យត្រូវទទួលការតែងតាំងសម្រាប់ ពួកគេ ហើយមានមនុស្សជាច្រើនទទួលជំនឿ ដូចព្រះអង្គទ្រង់សន្យាជាមួយព្យាការីថា «មនុស្សពីជាតិសាសន៍ ច្រើនពីដាច់ស្រយាលនៃផែនដីចូលមករកអ្នក…” ហើយមួយទៀតថា “ខ្ញុំបានចាត់អ្នកឲ្យធ្វើជាពន្លឺសម្រាប់ ជន ក្រៅសាសន៍ ដែលអ្នកអាចនាំការសង្គ្រោះទៅដល់ទីដាច់ស្រយាលនៃពិភពលោក”។ ជំនឿដែលរឹងមាំ នាំផ្លែផលល្អសម្រាប់អ្នកដទៃ ប្រសិនបើយើងជឿថា ដំណឹងល្អដែលយើងទទួល នោះ ជាព្រះអំណោយទានរបស់ព្រះជាម្ចាស់មែន ហើយជាអ្វីមួយដែលយើងគួរចែករំលែកឲ្យគេ ពិតជាយើងមាន អំណរសប្បាយយ៉ាងពិតប្រាកដ។ បពិត្រព្រះជាម្ចាស់ សូមព្រះអង្គឲ្យយើងខ្ញុំមានចិត្តខ្នះខ្នែង ដើម្បីប្រកាសដំណឹងល្អឲ្យអ្នកជិតខាងផង។ ហើយសូមឲ្យជំនឿកាតូលិក ចូលវប្បធម៌បងប្អូនខ្មែរ ដើម្បីឲ្យបងប្អូនខ្មែរទទួលស្គាល់ព្រះអង្គផង។