ពិធីក្បួនដង្ហែយ៉ាងឱឡារិកលាយឡំជាមួយរបាំក្ងោកនាំមុខឈើឆ្កាង លោកបូជាចារ្យនិងគ្រីស្តបរិស័ទយ៉ាងច្រើនកុះករដើរប្រទក្សិណជុំវិញព្រះវិហារថ្មីចំនួន៣ជុំ ក្រោមអធិបតីភាពលោកអភិបាល ទេព ច័ន្ទពិសិដ្ឋ អភិបាលនៃព្រះសហគមន៍ភូមិភាគបាត់ដំបង និងអាជ្ញាធរមូលដ្ឋាន នាព្រឹកថ្ងៃទី៣០ ខែកញ្ញា ឆ្នាំ២០២២។
ព្រះវិហារថ្មីនេះមានឈ្មោះថា សន្តីតេរេសានៅក្រុងអាវីឡា ស្ថិតនៅក្នុងភូមិកំពង់គោក្រោម ឃុំកំពង់គោ ស្រុកកំពង់ស្វាយ ខេត្តកំពង់ធំ ដែលមានចម្ងាយជិត១៩០គីឡូម៉ែត្រពីទីក្រុងភ្នំពេញ។
តាមប្រសាសន៍របស់លោកអភិបាលទេព ច័ន្ទពិសិដ្ឋ ឲ្យដឹងថា ព្រះសហគមន៍កាតូលិកកំពង់គោក្រោម មានដើមកំណើតជាង១០០ឆ្នាំមកហើយ គឺតាំងពីសម័យអាណានិគមបារាំង មានគ្រីស្តបរិស័ទមករស់នៅតំបន់នេះ ហើយបន្ទាប់មកក៏មានលោកបូជាចារ្យ វឺណេ ណែនាំព្រះសហគមន៍នៅទីនេះ។
លោកអភិបាលបន្ថែមថា ព្រះសហគមន៍នេះ ធ្លាប់មានព្រះវិហារស្អាត ប៉ុន្តែត្រូវបានបំផ្លាញដោយសារសង្គ្រាមស៊ីវិល។
ក្រោយសង្គ្រាម ព្រះសហគមន៍បានចាប់ផ្តើមកកើតឡើងវិញ ដោយមានលោកបូជាចារ្យទទួលខុសត្រូវមកណែនាំតំបន់នេះ។ បច្ចុប្បន្នព្រះសហគមន៍កំពង់គោ មានគ្រីស្តបរិស័ទជាង២០០នាក់ ហើយព្រះសហគមន៍នេះស្ថិតនៅក្នុងតំបន់សកម្មភាពរបស់ព្រះវិហារគង្វាលដ៏សប្បុរសកំពង់រទេះ ក្នុងខេត្តកំពង់ធំនៃភូមិភាគបាត់ដំបង។
លោកអភិបាលទេព ច័ន្ទពិសិដ្ឋមានប្រសាសន៍ទៀតថា ពិធីឆ្លងព្រះវិហារសន្តីតេរេសាគឺជាសញ្ញាដែលយើងមាន ព្រះដំណាក់របស់ព្រះជាម្ចាស់និងដើម្បីអោយយើងអធិដ្ឋានកសាងព្រះសហគមន៍។
«នៅក្នុងសង្គមរបស់យើងមានបញ្ហាច្រើនដែលនាំអោយយើងខ្លាច ប៉ុន្តែយើងអត់ត្រូវការខ្លាច យើងត្រូវបង្ហាញជំនឿ យើងត្រូវបង្ហាញសមត្ថភាព។» លោកអភិបាលបញ្ជាក់។
លោកអភិបាលបន្ថែមថា ដោយរួមជាមួយព្រះជាម្ចាស់ ជាមួយជំនឿ នាំអោយយើងបង្កើតពិភពលោកថ្មីបង្កើតសន្តិភាពនិងមិត្តភាពជាមួយបងប្អូននិងព្រះជាម្ចាស់។
លោកបានជំរុញឲ្យគ្រីស្តបរិស័ទមកអធិដ្ឋានក្នុងវិហារថ្មីឲ្យបានច្រើន ចូលរួមថែរក្សា ព្រះវិហារនេះ រួមគ្នាសម្អាតព្រះវិហារអោយមានសួនច្បារស្អាតៗ «នោះយើងទាំងអស់គ្នានឹងរស់នៅប្រកបដោយសេចក្ដីសុខសាន្តដែលទទួលបានពីព្រះជាម្ចាស់។»
ជាមួយគ្នានេះលោកបូជាចារ្យ គ្រីស្តូហ្វៀ កូមឡាវី ថុដច្រូ បូជាចារ្យទទួលខុសត្រូវព្រះវិហារសន្តីតេរេសាមានប្រសាសន៍ថា ពេលយើងមើលព្រះសហគមន៍ពីខាងក្រៅ ឃើញថាខ្សោយ ប៉ុន្តែព្រះសហគមន៍នេះពោរពេញដោយកម្លាំង ជាពិសេសគឺលោកតាលោកយាយចាស់ៗ ដែលទទួលការអប់រំពីសាសនទូតពីដើម។
លោកបានបន្ថែមថា មនុស្សចាស់គឺជាគ្រឹះដ៏ល្អ ដែលត្រូវការជាចាំបាច់សម្រាប់ពង្រឹងជំនឿព្រះសហគមន៍។ «នៅពេលដែលចាស់ៗរឹងមាំ គឺជួយដល់យុវជនដែរ ដោយសារពួកគេបានឃើញគម្រូល្អៗពីចាស់ៗ។»
ទន្ទឹមនឹងនោះលោកបូជាចារ្យ ទម្លាប់ សុផល ដែលជាអតីតបូជាចារ្យទទួលខុសត្រូវព្រះសហគមន៍តំបន់កំពង់ធំ មានប្រសាសន៍ទៅកាន់គ្រីស្តបរិស័ទ ឲ្យពួកគាត់ចងចាំទង្វើនិងការលះបង់ដ៏សំខាន់របស់សាសនទូតបារាំងម្នាក់ឈ្មោះ រ៉ូប៊ឺត វឺណេ ដែលធ្លាប់រស់នៅនិងកសាងព្រះសហគមន៍នៅទីនេះឲ្យរីកចម្រើន។
លោកបញ្ជាក់ថា «លោកបូជាចារ្យ រ៉ូប៊ឺត វឺណេជាឫសគល់នៃដីរបស់ព្រះវិហារនេះ ហើយលោកបានជួយជនជាតិកម្ពុជាច្រើនទាំងនៅក្នុងជំរំនិងប្រទេសក្រៅ។»
កំពង់គោជាទីដែលបូជាចារ្យ វឺណេរស់នៅជាង៣២ឆ្នាំដោយបម្រើនិងណែនាំគ្រីស្តបរិស័ទដោយចិត្តស្រឡាញ់បំផុត។ លោកបូជាចារ្យបញ្ជាក់។
អ្នកស្រី ញិល ពៅ គ្រីស្តបរិស័ទដើមនឹងជាគណៈកម្មាប្រឹក្សាយោបល់របស់ព្រះសហគមន៍ បាននិយាយថា «ទោះបីជាកន្លែងជាទីសក្ការៈរបស់យើងមិនទាន់ស្រស់ស្អាតក៏ព្រះជាម្ចាស់គង់នៅជាមួយយើងដែរ។»
អ្នកស្រី ញិល ពៅ បន្ថែមថា អ្វីដែលយើងទទួលបានជាព្រះអំណោយទានរបស់ព្រះជាម្ចាស់ ដែលណែនាំអោយចិត្តម្នាក់ៗស្រស់ថ្លា។ អ្នកស្រីសុំឲ្យ គ្រីស្តបរិស័ទទាំងអស់មកចូលរួម អធិដ្ឋានសុំព្រះវិញ្ញាណគង់ជាមួយនិងផ្តល់កម្លាំងដល់គ្រីស្តបរិស័ទគ្រប់គ្នា៕
ដោយ ចាន់ ម៉ានុត
