កាលពីថ្ងៃទី២៤ កក្កដា កន្លងទៅនេះ លោកបូជាចារ្យ ផាន បូរី បានដឹកនាំ គ្រីស្តបរិស័ទព្រះសហគមន៍ កែវសីមា បានដំាដើមឈើប្រណិតៗប្រមាណ១៥០ដើម ដូចជា ក្រញូង បេង នាងនួន ជាដើម ក្នុងដីចម្ការរបស់ព្រះសហគមន៍នេះ ដែលស្ថិតនៅភូមិអូររណា ឃុំស្រែខ្ទុម ស្រុកកែវសីមា ខេត្តមណ្ឌលគិរី។
លោក បូចារ្យ ផាន បូរី បានមានប្រសាសន៍ថា ប្រភេទឈើទាំងនេះ នៅក្នុងប្រទេសកម្ពុជាកំពុងរងនូវការកាប់បំផ្លាញ និងព្រៃឈើក៏កំពុងថយចុះ ជាពិសេសឈើប្រណិតៗ ហើយការដាំដើមឈើនៅថ្ងៃនោះ គឺដើម្បីបន្សល់ទុកឲ្យកូនចៅជំនាន់ក្រោយបានស្គាល់ បានដឹង និងបានឃើញ។
លោកបន្តថា កម្មវិធីនេះ គឺគ្រីស្តបរិស័ទនៅព្រះសហគមន៍កែវសីមាបានមូលមតិគ្នារកទិញកូនឈើទាំងនេះ។
លោកបូជាចារ្យទទួលខុសត្រូវព្រះសហគមន៍នេះ ឲ្យដឹងទៀតថា ការដំាដើមឈើនេះផងដែរគឺដើម្បីឲ្យគណៈកម្មការព្រះសហគមន៍មានសកម្មភាពរួបរួមគ្នាធ្វើអ្វីមួយ និងមានអំណរសប្បាយរួមជាមួយគ្នា។ លោកបញ្ជាក់ថា ការសាមគ្គីភាពនាំឲ្យយើងជោគជ័យនៅក្នុងព្រះសហគមន៍របស់យើង។
លោក បូជាចារ្យរូបនេះបានឲ្យដឹងថា ការដំាដើមឈើពិតជាមានសារៈសំខាន់ណាស់សម្រាប់បងប្អូនគ្រីស្តបរិស័ទ ដោយសារពេលដំាឈើមួយដើម ពួកគាត់អធិដ្ឋានទៅព្រះជាម្ចាស់។
លោកបូរី បញ្ជាក់ថា ទោះបីដើមឈើទាំងនោះមានឈ្មោះរបស់វាក៏ដោយ តែគ្រីស្តបរិស័ទបានដាក់ឈ្មោះថ្មីឲ្យពួកវា មានដូចជា«ដើមឈើនៃសន្តិភាព ដើមឈើនៃសេចក្តីសុខសាន្ត ដើមឈើនៃសុភមង្គល ដើមឈើនៃសេចក្តីស្រឡាញ់។»
លោកបូជាចារ្យបូរី បានជម្រុញឲ្យគ្រីស្តបរិស័ទចេះការពារបរិស្ថាន ការពារធនធានធម្មជាតិ ដែលជាស្នាព្រះហស្តដ៏ឧត្តុងឧត្តមមកពីព្រះជាម្ចាស់។
កម្មវិធីដាំដើមឈើនៅព្រះសហគមន៍កែវ សីមា ត្រូវបានធ្វើជាលើកទី១ លើដីចម្ការរបស់ព្រះសហគមន៍ដែលមានទំហំប្រមាណ៣,៥ហិចតា សម្រាប់សាងសង់អគារសិក្សាអប់រំនិងព្រះវិហារ ធ្វើចម្ការ និងមួយផ្នែកទុកសម្រាប់ធ្វើជាព្រៃឈើប្រណិត។
លោកបូជាចារ្យបូរីបានបញ្ជាក់ថា ការចំណាយលើថ្លៃកូនឈើ និងដាំ បានមកពីការឧបត្ថម្ភពីសប្បុរសជន និងគ្រីស្តបរិស័ទ្ទនៅព្រះសហគមន៍កែវសីមាផ្ទាល់៕
ដោយហៀម សុកខុន
