អួន សារាយ មកពីព្រះសហគមន៍តាហែននៃក្រុមជ័យលាភីលេខ១ខាងនារី បាននិយាយថា គាត់រីករាយដែលបានចូលរួមក្នុងកម្មវិធីប្រកួតបាល់ទាត់នេះ ហើយអ្វីដែលពិសេសនោះ គឺគាត់បានស្គាល់មនុស្សជាច្រើនមកពីកន្លែងផ្សេងៗ រួមនឹងរបៀបលេងបាល់ផងដែរ។
«មកជួបជុំមិត្តភក្តិទាំងអស់គ្នា បានស្គាល់ក្រុមច្រើន។ ខ្ញុំចូលរួមក្នុងកម្មវិធីនេះ ស្គាល់ទិកនិកលេង និងក្រុមកីឡាផ្សេងៗ។» សារាយបញ្ជាក់។
ឡី ឆវ័ន ពីព្រះសហគមន៍បាត់ដំបងជ័យលាភីលេខ១ខាងបុរស បានឲ្យដឹងថា គាត់និងក្រុមបាល់ទាត់របស់គាត់ចូលរួមក្នុងកម្មវិធីនេះ ដើម្បីបង្កើតមិត្តភាព ស្គាល់មនុស្សកាន់តែច្រើន និងជាសារមួយដើម្បីបញ្ចៀសគ្រឿងញាណក្នុងសហគមន៍ ដោយសារការលេងកីឡា។
កម្មវិធីប៊ីសបខាប់នេះត្រូវបានធ្វើឡើងកាលពីឆ្នាំ២០១០ ក្រោមការផ្តួចផ្តើមរបស់លោកអភិបាលទេពច័ន្ទពិសិដ្ឋ (គីគេ) នៃព្រះសហគមន៍កាតូលិកភូមិភាគបាត់ដំបង។
លោកអភិបាលមានប្រសាសន៍អំពីគោលដៅនៃកម្មវិធីយ៉ាងនេះថា «ឲ្យកូនក្មេង យុវជន ចូលរួម បង្កើតមិត្តភាព ចេះតស៊ូ បង្កើតក្រុមដែលចេះសាមគ្គីគ្នា និងឲ្យព្រះសហគមន៍មានការរីកចម្រើន។»
ការរៀបចំកម្មវិធីនេះ ក៏បានធ្វើឲ្យមនុស្សជាច្រើនបានស្គាល់ព្រះសហគមន៍ផងដែរ។ នេះបើតាមការបញ្ជាក់របស់លោកអភិបាលច័ន្ទពិសិដ្ឋ។ លោកបានឲ្យដឹងថា «គេចាប់ផ្តើមស្គាល់ព្រះសហគមន៍ដោយសារប៊ីសបខាប់។ យើងមានពីសកលវិទ្យាល័យ នគរបាលគេចូលរួម។ គេចាប់ផ្តើមស្គាល់ពេទ្យយាយជី ព្រះសហគមន៍។»
លោកអភិបាលមានប្រសាសន៍ទៀតថា កម្មវិធីនេះដែរ ក៏ផ្តល់ឱកាសឲ្យកុមារនិងយុវជននៅតាមភូមិអាចបញ្ចេញសមត្ថភាពនិងសកម្មភាពរបស់ពួកគេ ចូលរួមជាមួយគ្នាជាក្រុម ដើម្បីបង្កើតមិត្តភាព ដែលមានគុណតម្លៃច្រើនដែលត្រូវនឹងព្រះគម្ពីរនិងទិសដៅរបស់ព្រះសហគមន៍។
តាមការបញ្ជាក់របស់លោកអភិបាល ក្នុងឆ្នាំនេះ គឺមានតែសមាជិកក្រុមក្នុងព្រះសហគមន៍នានា និងមណ្ឌល សាលារបស់ព្រះសហគមន៍ ក្នុងភូមិភាគបាត់ដំបងចូលរួមប៉ុណ្ណោះ ដើម្បីឲ្យយើងស្គាល់គ្នាកាន់តែច្រើនឡើង ដែលធ្វើឲ្យទិសដៅដែលយើងគ្រោងទុកកើតជារូបរាង។
លោកអភិបាលរំលឹកថា ការចូលរួមរបស់កុមារនិងយុវជន គឺជារបៀបមួយដែលឲ្យព្រះសហគមន៍ដឹងថា ព្រះសហគមន៍កំពុងមានដំណាក់កាលទៅមុខ។ «យើងកំពុងបំពេញតួនាទីដែលយើងមាន គឺលើកទឹកចិត្តកូនក្មេងឲ្យចូលរួម ឲ្យដឹងថា គេមានតម្លៃចំពោះអ្វីៗដែលគេបានបង្កើត។»
កម្មវិធីប្រកួតបាល់ទាត់ពានរង្វាន់លោកអភិបាលព្រះសហគមន៍ភូមិភាគបាត់ដំបង ប្រព្រឹត្តទៅកាលពីថ្ងៃទី២ ខែកក្កដា ឆ្នាំ២០២២ នៅព្រះសហគមន៍កាតូលិកពេទ្យយាយជី នាក្រុងបាត់ដំបង ខេត្តបាត់ដំបង។ ក្នុងឆ្នាំនេះមានក្រុមប្រកួតចំនួន ១៩ក្រុម ក្នុងនោះមានក្រុមនារីចំនួន៧ក្រុម និងអ្នកជ័យលាភីលេខមួយគឺមានផ្នែកបុរស គ្រីស្តបរិស័ទបាត់ដំបង.និងផ្នែកនារី ក្រុមសសរសន្តិភាពតាហែន៕
កែវ កញ្ញា
