បេក្ខជនជនជាតិដើមភាគតិចពូណងចំនួន១១នាក់ បានគោះទ្វារសុំចូលក្នុងព្រះសហគមន៍ ដោយមានការស្វាគមន៍ពីលោកបូជាចារ្យ ផាន បូរី និងលោកបូជាចារ្យ អាឡិចសាន់ដ្រូ មុតទិ រួមនឹងគ្រីស្តបរិស័ទជាច្រើននាក់ កាលពីថ្ងៃទី១៩ខែមិថុនា ឆ្នាំ២០២២នេះ នៅព្រះវិហារសន្តយ៉ាកុប-ដាក់ដាំ ក្នុងឃុំដាក់ដាំ ស្រុកអូររាំង ខេត្តមណ្ឌលគិរី។
នៅក្នុងពិធីនេះ លោកបូជាចារ្យផានបូរី បានសួរសំណួរមួយចំនួនដើម្បីបញ្ជាក់ពីឆន្ទៈរបស់បេក្ខជន ទាក់ទងនឹងការសែនព្រែន បញ្ជាន់អារក្សអ្នកតា មន្តអាគមន៍ជាដើម ហើយប្រែចិត្តជឿសង្ឃឹមលើព្រះជាម្ចាស់ ដែលមានព្រះបិតា ព្រះបុត្រា និងព្រះវិញ្ញាណដ៏វិសុទ្ធជាព្រះត្រៃឯក។ បងប្អូនទាំង១១រូបបាននិយាយខ្លាំងៗថា សុខចិត្តលះបង់ជំនឿចាស់ចោលទាំងអស់ ហើយងាកមករកព្រះជាម្ចាស់ដែលមានព្រះជន្មគង់នៅអស់កល្បជានិច្ចវិញ។
«មូលហេតុដែលខ្ញុំចង់ចូលព្រះសហគមន៍គឺនាងខ្ញុំបានផ្លាស់ប្តូរជីវិតពីការចួបទុក្ខលំបាកនូវជីវិតមួយដែលសែនអារក្សអ្នកតា ហើយខ្ញុំចង់ផ្លាស់ប្តូរជិវិតដោយផ្ញើជីវិតទៅព្រះយេស៊ូគ្រីស្ត។» នេះជាការលើកឡើងរបស់យុវតីស្រនសាឡាន់ អាយុ១៥ឆ្នាំ កំពុងរៀនថ្នាក់ទី៨ ដែលជាបេក្ខជនសុំចូលក្នុងព្រះសហគមន៍នៅថ្ងៃនេះ។
សាឡាន់បន្ថែមថា នាងនឹងចូលរួមប្រកាសដំណឹងល្អរបស់ព្រះជាម្ចាស់ដល់មនុស្សឯទៀតៗដែលមិនទាន់ស្គាល់ដំណឹងល្អ និងត្រូវស្រឡាញ់បងប្អូនឯទៀតៗដូចស្រឡាញ់ខ្លួនឯង និងត្រូវស្រលាញ់ព្រះជាម្ចាស់ឲ្យអស់ពីកំលាំងកាយចិត្តនិងស្មារតី។
សាឡាន់បញ្ជាក់ថា «ការប្រកាសដំណឹងល្អ គឺចុះសួរសុខទុក្ខគេ និងតាមការរស់នៅរបស់យើង។»
លោកព្រិច ជុន ជាគ្រូអប់រំជំនឿនៅក្នុងព្រះសហគមន៍នេះ មានប្រសាសន៍ថា កម្មវិធីអប់រំជំនឿនាពេលបច្ចុប្បន្ននេះ គឺភាគច្រើនមានយុវជនចូលរួម ដែលវគ្គមុនៗគឺមានមនុស្សចាស់ៗច្រើនជាង។ លោកបន្ថែមថា ពួកគាត់ជាអ្នកភូមិរស់នៅជិតៗនិងនៅឃុំក្បែរគ្នា។
លោកព្រិចជុន ឲ្យដឹងទៀតថា «ពួកគាត់ជឿ ដោយសារជំងឺ ដោយសារខ្វះទីពឹង ដោយកាលពីមុនគេសែន ហើយពេលនេះ គេខ្វះរបស់សែន ដូច្នេះ គេក៏ស្វែងរកព្រះយេស៊ូ។»
«ខ្ញុំអាចសង្ឃឹមថា (ព្រះសហគមន៍)នឹងអាចរីកចម្រើន។ ទោះបីយ៉ាងណាក៏ដោយសម្រាប់ខ្ញុំជាគ្រូអប់រំជំនឿ ខ្ញុំនឹងព្យាយាមរកពាក្យពេជន៍ រកអត្ថន័យពន្យល់ឲ្យបងប្អូនងាយស្តាប់បាន ទោះបីខ្ញុំអត់សូវចេះ តែខំប្រឹងអស់ពីសមត្ថភាព។»
ព្រះវិហារសន្តយ៉ាកុប នៃព្រះសគមន៍ដាក់ដាំបង្កើតឡើងក្នុងឆ្នាំ១៩៨៦ ដែលមានគ្រួសារគ្រីស្តបរិស័ទប្រមាណ៥គ្រួសារដែលបានធ្វើមាតុភូមិនិវត្តន៍មកពីប្រទេសវៀតណាម ដោយសារតែសង្គ្រាមស៊ីវិលនៅក្នុងប្រទេស។
បច្ចុប្បន្នព្រះសហគមន៍មួយនេះ មានគ្រីស្តបរិស័ទជាង១០០នាក់ ហើយចំនួននៃការចូលរួមក្នុងព្រះវិហារជាប្រចាំ គឺមានប្រមាណ៨០-៩០ភាគរយនៃចំនួនអ្នកជឿ។ នេះបើតាមប្រសាសន៍របស់លោកបូជាចារ្យ ផាន បូរី អ្នកទទួលខុសត្រូវនៅព្រះសហគមន៍នេះ៕
ដោយ កែវ កញ្ញា
