រាជរដ្ឋាភិបាលកម្ពុជា តាមរយៈលោក សាយ សំអាល់ រដ្ឋមន្រ្តីក្រសួងបរិស្ថាន បានបំពាក់មេដាយថ្នាក់ «ជាតូបការ» ជូនលោកអភិបាលព្រះសហគមន៍ភូមិភាគភ្នំពេញលោក អូលីវីយ៉េជ្មិតហស្លេរ ដើម្បីតបស្នងទៅនឹងកិច្ចការដែលលោកបានជួយអភិវឌ្ឍស្ទើរគ្រប់វិស័យទាំងអស់នៅក្នុងខេត្តតាកែវ កាលពីថ្ងៃទី៨ ខែមីនា ឆ្នាំ២០២២ នាវិទ្យាស្ថានសន្តប៉ូល ក្នុងភូមិអង្គគគី ស្រុកត្រាំកក់។
ថ្លែងប្រាប់សារព័ត៌មាន លោក អូលីវីយ៉េ បានឱ្យដឹងថា នេះជាមេដាយជាតូបការ ហើយនេះជាអ្វីដែលជាសសមិទ្ធិលក្នុងការប្រមូលនូវគ្រប់ស្នាដៃក្នុងព្រះសហគមន៍ តាំងពីឆ្នាំ ២០១០ រហូតដល់ ២០២២ នៅក្នុងខេត្តតាកែវនេះ។
លោកមានប្រសាសន៍ថា ៖ «យើងបានជួយអភិវឌ្ឍទៅលើវិស័យជាច្រើន ទាំងវិស័យអប់រំ វិស័យសង្គម ការជួយជនពិការ សិប្បកម្ម សិល្បៈ សុខភាព និងវិស័យសាសនា ដែលណែនាំឱ្យមនុស្សនានាដែលអស់សង្ឃឹមឱ្យមានសង្ឃឹមឡើងវិញ។ ដូចនេះអ្វីៗទាំងអស់បានធ្វើឲ្យរាជរដ្ឋាភិបាលទទួលស្គាល់»។
ទាក់ទងនឹងសមិទ្ធិផលដែលលោកទទួលបាននេះដែរ លោកអភិបាលក៏បានបញ្ជាក់ផងដែរថា ទាំងអស់នេះមិនមែនស្នាដៃលោកផ្ទាល់តែឯងនោះទេ ប៉ុន្តែជាស្នាដៃរបស់ព្រះសហគមន៍កាតូលិក ជាពិសេសនៅក្នុងខេត្តតាកែវតែម្តង។
លោកអូលីវីយ៉េ បានថ្លែងថា ៖ «ខ្ញុំសូមអរគុណដល់សហការីរបស់ខ្ញុំទាំងអស់ ដែលបានធ្វើឱ្យគ្រប់សកម្មភាពរបស់យើង ទាំងការអប់រំ ទាំងការអភិវឌ្ឍ និងទាំងសិល្បៈ ដែលទទួលជោគជ័យបាននេះ។ នេះជាការអស្ចារ្យនិងជោគជ័យសម្រាប់យើងទាំងអស់ និងជាកម្លាំងមួយពិសេសថ្មីដើម្បីឱ្យយើងទៅមុខទៀត»។
នាឱកាសនោះដែរ វិទ្យាស្ថានសន្តប៉ូល ក៏បានប្រារព្ធបើកបវេសនកាលឆ្នាំសិក្សាថ្មី «ឆ្នាំបៃតង» ជាផ្លូវការក្រោមអធិបតីភាពលោក សាយ សំអាល់, លោក អ៊ូច ភា អភិបាលខេត្តតាកែវ និងប្រគល់សញ្ញាបត្រជូននិស្សិតសញ្ញាបត្របរិញ្ញាបត្ររង និងបរិញ្ញាបត្រចំនួន១១៤នាក់ផងដែរ។
ស្ថាបនិកវិទ្យាស្ថានសន្តប៉ូល លោកអភិបាល អូលីវីយ៉េ បានលើកឡើងថា នៅក្នុងឆ្នាំសិក្សា២០២១ ដោយសារការរាលដាលនៃមេរោគកូវីដ១៩ វិទ្យាស្ថានមិនបានបើកបវេសនកាលត្រឹមត្រូវទេ គឺមានតែសាស្រ្តាចារ្យដែលបានបង្រៀនតាមអនឡាញ ដើម្បីឱ្យនិស្សិតបន្តការសិក្សា ដោយទទួលបានលទ្ធផលជោគជ័យ។ លោកមានប្រសាសន៍ថា ៖ «ឆ្នាំនេះខ្ញុំបានប្រកាសឆ្នាំបៃតង ដោយសារយើងមើលកូវីដ១៩ និងពណ៌បៃតងជាពណ៌នៃសេចក្ដីសង្ឃឹម។ ដូច្នេះនៅក្នុងឆ្នាំបៃតងនេះ ឱ្យយើងមើលគ្រប់វិស័យ សូមឱ្យការសិក្សាជោគជ័យ មានទំនាក់ទំនងប្រាកដ មិនមែនតាមហ្សូម និងអនឡាញ ប៉ុន្តែឱ្យយើងខិតខំការពារថែរក្សាបរិស្ថាន ដាំបន្លែ យកចិត្តទុកដាក់នឹងសុខភាពក៏ដូចជាទេពកោសល្យដើម្បីឱ្យយើងទៅជាមនុស្សដ៏ពេញលក្ខណៈ។ នៅពេលយើងនិយាយពីពណ៌បៃតង ជាពណ៌ដែលមើលពីអនាគត និងក្ដីសង្ឃឹមរបស់យើង»។
លោកអូលីវីយ៉េបានធ្វើការផ្តាំផ្ញើដល់និស្សិតទាំងអស់ផងដែរថា «តស៊ូ និងយកចិត្តទុកដាក់» ទោះបីមានកូវីដឬមិនមានកូវីដ តែតស៊ូដើម្បីរៀនសូត្រ តស៊ូដើម្បីរៀបចំអនាគត និងយកចិត្តទុកដាក់ទាំងការៀនសូត្រ ការធ្វើការងារ និងការរៀបចំអនាគត។
ជាមួយគ្នានេះដែរ លោក សាយ សំអាល់ បានធ្វើការសាទរចំពោះលោកអភិបាល អូលីវីយ៉េ ដែលព្រះមហាក្សត្រ សព្វព្រះរាជហឫទ័យប្រទានងារជា «ឯកឧត្តម» ហើយលោកក៏បានសាទរដល់និស្សិតដែលបានបញ្ចប់ការសិក្សាដោយជោគជ័យ ដែលជាការបើកទំព័រថ្មីនៅក្នុងជីវិតផ្ទាល់ខ្លួន។
លោកបានថ្លែងថា ៖ «ថ្ងៃនេះខ្ញុំសូមផ្សារភ្ជាប់ប្រសាសន៍៣របស់ឯកឧត្តមហ៊ុនម៉ាណែត ដែលជាជនគំរូមួយនៅកម្ពុជា ដោយកោតសរសើរលោកអភិបាលដែលបានរក្សានូវមរតកជំនាន់មុន ចូលរួមពូនជ្រុំកសាងនូវសមិទ្ធផលផ្សេងៗទៀតរួមទាំងបុគ្គលខ្លួនឯងមិនត្រឹមតែព្រះសហគមន៍តែប៉ុណ្ណោះទេ និងចូលរួមកសាងថ្នាលសម្រាប់អ្នកជំនាន់ក្រោយទៀតផងដែរ»។
ប្រទេសរឹងមាំផ្ដើមចេញពីយើងមុនគេ និងត្រូវរកឱ្យឃើញនូវទេពកោសល្យផ្ទាល់ខ្លួនឱ្យបាន នោះទើបយើងអាចរីកចម្រើន។ នេះបើតាមការបញ្ជាក់របស់លោក សាយ សំអាល់។
វិទ្យាស្ថានសន្តប៉ូល ជាគ្រឹះស្ថានឧត្តមសិក្សាកាតូលិកដំបូងគេបង្អស់តែមួយគត់នៅក្នុងប្រទេសកម្ពុជា។ វិទ្យាស្ថាននេះបង្កើតឡើងជាផ្លូវការនៅក្នុយងឆ្នាំ២០០៩ ក្រោមគំនិតផ្ដួចផ្ដើមនិងទទួលខុសត្រូវខ្ពស់របស់លោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ដែលជាស្ថាបនិក និងជាប្រធានក្រុមប្រឹក្សាភិបាលរបស់វិទ្យាស្ថានសន្តប៉ូល។
រយៈពេលជាង១០មកនេះ វិទ្យាស្ថានសន្តប៉ូលបានបណ្ដុះបណ្ដាលនិស្សិតលើបរិញ្ញាបត្រជំនាញ វិស្វកម្ម Software ទូរគមនាគមន៍និងបណ្ដាញ ជំនាញអក្សរសាស្ត្រអង់គ្លេស ជំនាញគ្រប់គ្រងទេសចរណ៍ ក្សេត្រសាស្ត្រ ជំនាញសង្គមកិច្ច។
រីឯបរញ្ញាបត្ររង វិទ្យាស្ថានបណ្ដុះបណ្ដាលលើជំនាញចំនួន៦ រួមមាន៖ អភិវឌ្ឍកម្មវិធីកុំព្យូទ័រ គ្រប់គ្រងប្រព័ន្ធនិងបណ្ដាញកុំព្យូទ័រ ផលិតកម្មដំណាំហូបផ្លែនិងបន្លែ វេជ្ជសាស្ត្រសត្វ ភាសាអង់គ្លេស សណ្ឋាគារ និងបដិសណ្ឋារកិច្ច៕
ដោយ៖ ដាលីស
