ឬសន្ដយ៉ូហាន
ជាបព្វជិតដែលគោរពព្រះជាម្ចាស់

លោកយ៉ូហាន ស៊ីយូដាដ ( ១៤៩៥-១៥៥០ ) ជាជាតិព័រទុយហ្គាល់ម្នាក់។ លោក​ប្រកប​អាជី​វ​កម្ម​ជាអ្នកគង្វាលសត្វ ជាអ្នកធ្វើដំណើរ ជាទាហាន ជាឈ្មួញតៗគ្នា។ កាលលោកអាយុបាន ៤២ ឆ្នាំ លោក​ប្រែចិត្តគំនិតជឿលើព្រះគ្រីស្ត ហើយចូលបួស។ លោកបង្កើតមន្ទីពេទ្យមួយនៅក្នុងក្រេណាដ ព្រម​ទាំង​ក្រុមគ្រួសារបព្វជិតដែលមានមុខងារព្យាបាលអ្នកជំងឺ។

សូមថ្លែងព្រះគម្ពីរព្យាការីអេសាយ អស ៥៥,១០-១១

ព្រះអម្ចាស់មានព្រះបន្ទូលថា៖ «ទឹកភ្លៀង និងទឹកសន្សើម ធ្លាក់ពីលើមេឃមកស្រោច​ស្រពផែនដី។ ទឹកទាំងនោះមិនវិលត្រឡប់ទៅវិញ ដរាបណាទាល់តែបានធ្វើឱ្យដំណាំ​ដុះឡើង និងបង្កើតភោគផល ផ្តល់ពូជបន្តសម្រាប់អ្នកសាបព្រោះ និងផ្តល់អាហារឱ្យគេបរិភោគ។ រីឯពាក្យរបស់យើងក៏ដូច្នោះដែរ គឺពាក្យដែលចេញពីមាត់របស់យើងនឹងមិន​វិលត្រឡប់មករកយើងវិញ ដរាបណាទាល់តែបាបសម្រេចការតាមបំណងចិត្តរបស់យើង​ជាមុនសិន គឺបំពេញកិច្ចការដែលយើងចាត់ឱ្យធ្វើមករួចរាល់សព្វគ្រប់។

ទំនុកតម្កើងលេខ ៣៤ (៣៣), ៤-៧.១៦-១៩ បទកាកគតិ

ពិធីអបអរសាទរព្រះគម្ពីរដំណឹងល្អតាម រម ៨,១៥

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៦,៧-១៥

នៅគ្រានោះ ក្រុមសាវ័កជួបជុំគ្នាជាមួយព្រះយេស៊ូនៅលើភ្នំ ព្រះអង្គមានព្រះបន្ទូលទៅគេថា៖«ពេលអ្នករាល់គ្នាទូលទៅព្រះបិតា កុំពោលពាក្យច្រំដែលៗឥតប្រយោជន៍ ដូចសាសន៍ដទៃឡើយ គេនឹកស្មានថា បើពោលពាក្យយ៉ាងច្រើនដូច្នេះ ព្រះរបស់គេនឹងស្តាប់គេ។ កុំធ្វើដូចគេឡើយ ដ្បិតព្រះបិតារបស់អ្នករាល់គ្នាជ្រាបនូវអ្វីៗដែលអ្នករាល់គ្នាត្រូវការ មុនអ្នករាល់គ្នាទូលសុំព្រះអង្គទៅទៀត។ អ្នករាល់គ្នាត្រូវទូលព្រះអង្គដូចតទៅ៖ ឱព្រះបិតាយើងខ្ញុំដែលគង់នៅស្ថានបរមសុខអើយ! សូមសម្តែងព្រះបារមីឱ្យមនុស្សលោកស្គាល់ព្រះនាមរបស់ព្រះអង្គ សូមឱ្យព្រះរាជ្យព្រះអង្គបានមកដល់ សូមឱ្យព្រះហប្ញទ័យរបស់ព្រះអង្គបានសម្រេចនៅលើផែនដី ដូចនៅស្ថានបរមសុខដែរ។ សូមប្រទានអាហារ ដែលយើងខ្ញុំត្រូវការនៅថ្ងៃនេះ សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យអស់អ្នក ដែលបានប្រព្រឹត្តខុសនឹងយើងខ្ញុំ។ សូមកុំបណ្តោយឱ្យយើងខ្ញុំចាញ់ការល្បួងឡើយ តែសូមរំដោះយើងខ្ញុំឱ្យរួចពីមារកំណាច។ បើអ្នករាល់គ្នាអត់ទោសឱ្យមនុស្សលោក ព្រះបិតារបស់អ្នករាល់គ្នាដែលគង់នៅស្ថានបរមសុខ ទ្រង់ក៏អត់ទោសឱ្យអ្នករាល់គ្នាដែរ។ ប៉ុន្តែ បើអ្នករាល់គ្នាមិនអត់ទោសឱ្យមនុស្សលោកទេនោះ ព្រះបិតារបស់អ្នករាល់គ្នា ក៏មិនអត់ទោសឱ្យអ្នករាល់គ្នាដែរ»។