សម្តេចប៉ាប ហ្វ្រង់ស៊ីស្កូនៅថ្ងៃទី ០៦ ខែ មករា បានចេញនូវសារលិខិតមួយ សម្រាប់ទិវាសាសនទូតពិភពលោកឆ្នាំ ២០២២ ដោយបានជំរុញឱ្យគ្រីស្តបរិស័ទទាំងអស់ប្រកាសដំណឹងល្អ និងអំពីព្រះហឫទ័យរបស់ព្រះជាម្ចាស់នៅក្នុងការសង្គ្រោះមនុស្សជាតិនៅក្នុងគ្រប់ទិដ្ឋភាពនៃជីវិតប្រចាំថ្ងៃ។
វ៉ាទីកង់ញូវបានរាយការណ៍ថា ខ្លឹមសារសំខាន់ដែលសង្កត់ធ្ងន់នៅក្នុងសារនោះ គឺសម្តេចប៉ាប បញ្ជាក់អំពីតួនាទីរបស់គ្រីស្តបរិស័ទ ដែលផ្តោតលើប្រធានបទ៖ «អ្នកនឹងក្លាយជាសក្ខីភាពរបស់អង្គព្រះគ្រីស្ត»។
សម្តេចប៉ាបបានឆ្លុះបញ្ចាំងពីមូលដ្ឋានគ្រឹះមួយចំនួននៃ «ជីវិត និងបេសកកម្មរបស់គ្រីស្តបរិស័ទគ្រប់រូប»។ ទ្រង់មានបន្ទូលថា «ព្រះជាម្ចាស់ទ្រង់ត្រាស់ហៅគ្រីស្តបរិស័ទគ្រប់រូប ដើម្បីជាសក្ខីកម្មជាមួយព្រះគ្រីស្ត»។
សម្តេចប៉ាប បានមានបន្ទូលថា ព្រះគ្រីស្តគឺជាមនុស្សដំបូងគេដែលត្រូវបានបញ្ជូនទៅប្រកាសដំណឹងល្អមកមនុស្សជាតិ ក្នុងនាមជាអ្នកប្រកាសដំណឹងល្អរបស់ព្រះជាម្ចាស និងជា«សាក្សីដ៏ស្មោះត្រង់របស់ទ្រង់»។
សម្តេចប៉ាបបានមានបន្ទូលបន្តថា ក្រោយមក គ្រប់គ្រីស្តបរិស័ទទាំងអស់ អាចធ្វើជាសាសនទូត និងជាសាក្សីដល់ព្រះគ្រីស្ត ដោយឡែកព្រះសហគមន៍ ជាសហគមន៍របស់ព្រះគ្រីស្ត គ្មានបេសកកម្មណាផ្សេងក្រៅពីការនាំយកដំណឹងល្អមកកាន់ពិភពលោកទាំងមូល ប្រកាសអំពីអត្តសញ្ញាណរបស់ព្រះសហគមន៍ និង ព្រះជាម្ចាស់ ។
សម្តេចប៉ាបបានមានបន្ទូលបន្ថែមថា គ្រីស្តបរិស័ទម្នាក់ៗដែលបានទទួលបានអគ្គសញ្ញាជ្រមុជទឹករួចហើយ គឺត្រូវបានព្រះជាម្ចាស់ត្រាស់ហៅឱ្យបំពេញបេសកកម្មរបស់ព្រះសហគមន៍ សូម្បីតែសកម្មភាពធម្មតាក្នុងជីវិតប្រចាំថ្ងៃក៏ដោយ។
