លោកឪពុក អាទូរ៉ូ សូសា (Fr Arturo Sosa SJ) ជាប្រធានក្រុមគ្រួសារបព្វជិត សហជីវិនព្រះយេស៊ូ បាន ជ្រើសតាំង លោកឪពុក ដូមីនីក វូ គីម ង្វៀន ជាប្រធានក្រុមសហជីវិនព្រះយេស៊ូប្រចាំតំបន់អូស្រ្តាលី (Provincial of the Australian province)។ នេះបើតាមការចុះផ្សាយរវស់វិបសាយ Australian Jesuit : Jesuit.org.au។ ប្រភពដដែលបានបន្តថា លោកឪពុក វូ ង្វៀន នឹងចូលបំពេញមុខងារថ្មីនេះ នៅខែមករា ឆ្នាំ២០២១។
លោកឪពុក វូ ង្វៀន កើតនៅសៃហ្គន បន្ទាប់មកបានទទួលសិទ្ធិជ្រកកោនជាជនភៀសខ្លួន រួមជាមួយ ក្រុមគ្រួសារ នៅប្រទេសអូស្ត្រាលី។ លោកចូលរួមក្នុងក្រុមគ្រួសារ បព្វជិតសហជីវិន ក្នុងឆ្នាំ១៩៩៤ និងទទួលអគ្គសញ្ញាតែងតាំងជាបូជាចារ្យ ក្នុងឆ្នាំ២០០៤ ហើយបានថ្វាយពាក្យសច្ចានិរន្តរ៍ នៅឆ្នាំ២០១៤។ លោក បានសិក្សា ផ្នែកវិទ្យាសាស្ត្រ ទេវវិទ្យា និងការអប់រំ។
លោកបានមកបម្រើការងារនៅប្រទេសកម្ពុជាតាំងពីឆ្នាំ ២០១៥ ហើយបច្ចុប្បន្នជាលេខាធិការផ្នែកអប់រំ បឋមសិក្សានិងមធ្យមសិក្សា នៃក្រុមសហជីនព្រះយេស៊ូ នៅប្រទេសកម្ពុជា និងជានាយកសាលា សន្ត សាវីយេ នៅស្វាយស៊ីសុផុន ខេត្តបន្ទាយមានជ័យ ។
លោកឪពុក ដូមីនីក វូ គីម ង្វៀន ធ្លាប់បម្រើការងារនៅប្រទេសទីម័រខាងកើតនិងបានបញ្ចប់ការសិក្សាក្រោយឧត្តមសិក្សាផ្នែកអប់រំសិក្សានៅបូស្តុនឆ្នាំ ២០០៩-២០១១ ។
