ក្នុងលិខិតចុះថ្ងៃទី១២ ខែឧសភានេះ សម្តេចតេជោ ហ៊ុនសែន ផ្ញើជូន ដូនជីតេរេស រ៉ាហ្វាអែឡា ពេទ្រីនី (Raffaella Petrini) ជាប្រមុខនៃរាជធានីបុរីវ៉ាទីកង់ សម្តេចតេជោហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាបានគាំទ្រ ព្រះរាជសុន្ទរកថា របស់សម្តេប៉ាបឡេអូទី១៤ ទាក់ទងនឹងការអំពាវនាវរបស់ព្រះអង្គឱ្យ «ការប្រកាន់យកសន្តិភាព » ដែលបានធ្វើឡើងកាលពីថ្ងៃទី៨ ខែឧសភាកន្លងទៅ ក្រោយពេលព្រះអង្គត្រូវបានបោះឆ្នោតជ្រើសរើសជាសម្តេចប៉ាបទី២៦៧ បន្តវេនពីសន្តសិលា។ ក្នុងសារលិខិតសម្តេចតេជោ បានរៀបរាប់ថា «អស់រយៈពេលជិតបីទសវត្សរ៍មកហើយ ដែលព្រះរាជាណាចក្រកម្ពុជា បានរស់នៅក្នុងសន្តិភាព និងភាពរីកចម្រើន បន្ទាប់ពីបានទទួលរងការបំផ្លិចបំផ្លាញដោយអំពើអយុត្តិធម៌ និងអំពើហិង្សា។ ការអំពាវនាវរបស់សម្តេចប៉ាប បានរន្ទឺយ៉ាងខ្លាំងក្លាក្នុងដួងចិត្តរបស់សហគមន៍កាតូលិកខ្មែរគ្រប់រូប។» សម្តេចតេជោបានបន្ថែមថា ក្នុងឋានៈជាប្រធានព្រឹទ្ធសភា នៃព្រះរាជាណាចក្រកម្ពុជា ជានិច្ចកាល សម្តេច តែងតែគាំទ្រដល់រាល់កិច្ចខិតខំប្រឹងប្រែងរបស់ប្រជាជាតិ និងប្រជាជននានា លើសកលលោក «ដើម្បីសន្តិភាព យុត្តិធម៌ និងការផ្សះផ្សារជាតិ»។ ក្នុងនោះដែរសម្តេចប្រធានព្រឹទ្ធសភាកម្ពុជាក៏បានជូនពរដល់សម្តេចប៉ាបឡេអូ សូមឲ្យទទួលបានព្រះពរពីព្រះជាម្ចាស់ ទាំងកម្លាំងកាយនិងប្រាជ្ញាផងដែរ។ សម្តេចប៉ាបឡេអូទី១៤ បានមានបន្ទូលកាលពីថ្ងៃទី៨ ខែឧសភានៅទីលានសន្តសិលា ទៅកាន់គ្រីស្តបរិស័ទរាប់ម៉ឺននាក់ដែលកំពុងរង់ចាំសេចក្តីប្រកាសអំពីលទ្ធផលបោះឆ្នោតជ្រើសរើសសម្តេចប៉ាបថ្មី បន្ទាប់ពីអតីតសម្តេចប៉ាបហ្វ្រង់ស៊ីស្កូបានចូលទិវង្គតកាលពីថ្ងៃទី២១ ខែមេសាកន្លងទៅ។ សម្តេចប៉ាបឡេអូទី១៤ ជាសម្តេច ប៉ាបដំបូងគេដែលមានដើមកំណើតអាមេរិក សម្តេចបានមានបន្ទូលលើកដំបូង គឺទាក់ទងនឹងការប្តេជ្ញាចិត្ត ដើម្បីដឹកនាំ និងណែនាំប្រជាជននិងព្រះសហគមន៍នៅក្នុងសកលលោកឲ្យ «រួមគ្នាកសាងទំនាក់ទំនង និងការចូលរួមគ្នាជាប្រជាជនតែមួយដោយសន្តិភាព»។ ក្នុងនោះដែរសម្តេចប៉ាបមានបន្ទូលសូមឲ្យគ្រីស្តបរិស័ទរួមគ្នាដើម្បីធ្វើជាព្រះសហគមន៍នៃសាសនទូត ព្រះសហគមន៍ដែលជាស្ពាននិងចេះទំនាក់ទំនង ព្រះសហគមន៍ដែលតែងតែបើកដៃស្វាគមន៍អស់មនុស្សដែលមានសេចក្តីត្រូវការការសង្គ្រោះ ត្រូវការវត្តមាននិងសេចក្តីស្រឡាញ់របស់យើង ហើយដែលតែងតែត្រៀមខ្លួនរួចជាស្រេចក្នុងការសន្ទនា៕

ដោយកែវ កញ្ញា