ប្រាជ្ញាញាណ (១៩)

ប្រជាជនអ៊ីស្រាអែលឆ្លងសមុទរក្រហម
១ព្រះ​អង្គ​ប្រហារ​ជន​ពាល ដោយ​ព្រះ​ពិរោធ​ ដ៍ខ្លាំង​ក្លា​ឥត​ត្រា​ប្រណី​ រហូត​ដល់​ស្ងប់​ព្រះ​ហប្ញ​ទ័យ​ ដ្បិត​ព្រះ​អង្គ​ជ្រាប​ជាមុន​នូវ​អំពើ​ដែល​ពួក​គេ​បម្រុង​នឹង​ប្រព្រឹត្ត ២គឺ​បន្ទាប់​ពី​ពួក​គេ​អនុញ្ញាត​ជន​ជាតិ​អ៊ីស្រា​អែល​ចាក​ចេញ​ទៅ ព្រម​ទាំង​ដេញ​ប្រញាប់​ទៀត​នោះ។ ជន​ជាតិ​អេស៊ីប​ដូរ​គំនិត​ ហើយ​បែរ​ជា​ដេញ​តាម​ ឬ​ជា​រាស្ត្រ​របស់​ព្រះ​អង្គ​ទៅ​វិញ។ ៣ក្នុង​ពេល​ដែល​ពួក​គេ​នៅ​កាន់​ទុក្ខ ហើយ​សោក​សង្រេង ក្បែរ​ផ្នូរ​កូន​របស់​ខ្លួន ពួក​គេ​មាន​គំនិត​មួយ​ផ្សេង​ទៀត ជា​គំនិត​លេលា គឺ​នាំគ្នា​ដេញ​តាម​អស់​អ្នក​ដែល​ខ្លួន​បាន​អង្វរ​ករ ឲ្យ​ចាក​ចេញ​កាល​ពី​មុន។ ពួគ​គេ​ដេញ​តាម​អ្្នក​ទាំង​នោះ ដូច​ដេញ​តាម​ជន​ដែល​រត់​ចោល​ស្រុក។ ៤តាម​ពិត​ពួក​គេ​ត្រូវ​តែ​ធ្វើ​បែប​នេះ ហើយ​គេ​ក៍​ត្រូវ​តែ​បំភ្លច​អ្វីៗ ដែល​បាន​កើត​ពីមុន​ដែរ ដើម្បី​ឲ្យ​ពួក​គេ​ទទួល​ទារុណ​កម្ម សព្វ​គ្រប់​ឥត​ខ្វះ​ត្រង់​ណា​ឡើយ។ ៥ប្រជា​ជន​របស់​ព្រះ​អង្គ​បាន​ធ្វើ​ដំណើរ​កាត់​សមុទ្រ យ៉ាង​អស្ចារ្យ រីឯ​ពួក​គេ​វិ​ញ ត្រូវ​ស្លាប់​តាម​របៀប​គួរ​ឲ្យ​ឆ្ងល់។

៦ពេល​នោះ ព្រះ​អង្គ​សូន្យ​សត្វ​លោក​សា​ជាថ្មី​តាម​ប្រភេទ​រៀងៗ​ខ្លួន ហើយ​សត្វ​លោក​ទាំង​នោះ​ធ្វើ​តាម​បញ្ជា​របស់​ព្រះ​អង្គ ដើម្បី​ការពារ​បុត្រ​ធីតា​របស់​ព្រះ​អង្គ​ឲ្យ​ចៀស​ផុត​ពី​គ្រោះ​កាច​នានា។ ៧ពួក​គេ​ឃើញ​ពពក​គ្រប​បាំង​កន្លែង​បោះ​ជំរំ ដី​គោក​លេច​ចេញ​ពី​កន្លែង​មាន​សុទ្ធ​តែ​ទឹក គឺ​បាត​សមុទ្រ​ក្រហម​ ប្រែ​ទៅ​ជា​ផ្លូវ​ដែល​អាច​ដើរ​បាន​ស្រួល ហើយ​រលក​ដ៍ខ្លាំង​ក្លា​ប្រែ​ទៅ​ជា​វាល​ស្មៅ​ដ៍​ខៀវ​ខ្ចី។ ប្រជា​រាស្រ្ត​ទាំង​មូល​ដើរ​កាត់​តាម​នោះ ទាំង​ឃើញ​ប្ញទ្ធិ​បាដិ​ហារិយ៍​ដ៍​អស្ចារ្យ ដោយ​មាន​ព្រះ​បារមី​របស់​ព្រះ​អង្គ​ជួយ​ការពារ។ ៩បពិត្រ​ព្រះ​អម្ចាស់! ប្រជា​រាស្ត្រ​របស់​ព្រះ​អង្គ ប្រៀប​ដូច​ជា​ហ្វូង​សេះ ដែល​កំពុង​ស៊ី​ស្មៅ នឹង​លោត​ដូច​កូន​ចៀម ទាំង​សរសើរ​តម្តើង​ព្រះ​អង្គ ដែល​បាន​រំដោះ​គេ ១០ដ្បិត​ពួក​គេ​នៅ​នឹក​ចាំ​ពី​ព្រឹត្តិ​ការណ៍ ដែល​កើត​ឡើង​ក្នុង​ពេល​ពួកគេ​រស់នៅ​លើ​ទឹក​ដី​បរទេស គឺ​ពេល​នោះ​ដី​បាន​បង្កើត​តែ​មូស គឺ​មិន​បង្កើត​សត្វ​ឯទៀតៗ​ទេ​ ទន្លេ​ខ្ជាក់​តែ​កង្កែប​ដ៍​ច្រើន​ឥត​គណនា​ជំនួស​ត្រី។ ១១ក្រោយ​មក​ទៀត នៅ​ពេល​គេ​ឃ្លាន​ពេក ហើយ​នាំគ្នា​តវា​សុំ​អាហារ​ឆ្ងាញ់​ពិសារ គេ​ឃើញ​បក្សា​បក្សី​មួយ​ប្រភេទ​ថ្មី ១២គឺ​មាន​ក្រួច​ហោះ​ចេញ​ពី​សមុទ្រ ដើម្បី​បំពេញ​បំណង​ប្រាថ្នា​របស់​ពួក​គេ។

ជនជាតិងអេស៊ីបស្អប់ជនជាតិដទៃ
១៣ផ្ទុយ​ទៅ​វិញ អ្នក​បាប​ទទួល​ទារុណ​កម្ម ដោយ​មាន​រន្ទះ​បាញ់​ខ្លាំងៗ ជាទី​សម្គាល់​ផ្តល់​ដំណឹង​ជាមុន។ ពួកគេ​ទទួល​ទោស​ដូច្នេះ ពិត​ជា​យុត្តិធម៌ ស្រប​តាម​អំពើ​អាក្រក់​របស់​ខ្លួន ដ្បិត​ពួកគេ​ស្អប់​ជន​បរទេស​បំផុត។ ១៤កាល​ពី​ដើម​អ្នក​ក្រុង​សូដូម មិន​ព្រម​ទទួល​អ្នក​ដំណើរ ដែល​ខ្លួន​មិន​ស្គាល់ រីឯ​ជន​ជាតិ​អេស៊ីប​នេះ បែរជា​យក​ភ្ញៀវ​ដែល​បាន​នាំ​ផល​ប្រយោជន៍​ដល់​គេ ធ្វើ​ជា​ទាសករ​ទៅ​វិញ។ មិន​តែ​ប៉ុណ្ណោះ​សោត អ្នក​ក្រុង​សូដូម​ទទួល​ទោស ព្រោះ​ពួកគេ​មិន​បាន​ស្វាគមន៍​ភ្ញៀវ ដោយ​រាក់​ទាក់។ ១៦រីឯ​ជន​ជាតិ​អេស៊ីប​វិញ ក្រោយ​ពី​បាន​អបអរ​សាទរ​ទទួល​អ្នក​ដែល​មក​ថ្មីៗ ហើយ​មាន​សិទ្ធិ​ស្មើៗ​គ្នា ពួកគេ​បែរ​ជា​ជិះ​ជាន់​សង្កត់​សង្កិន​ភ្ញៀវ ដោយ​ឲ្យ​ធ្វើការ​ជា​ទម្ងន់។ ពួក​គេ​ត្រូវ​ខ្វាក់​ដូច​អ្នក​ក្រុង​សូដូម ត្រូវ​ខ្វាក់​នៅ​មាត់​ទ្វារ​ផ្ទះ​របស់​មនុស្ស​សុចរិត ពេល​នោះ​គេ​ងងឹត​មើល​អ្វី​លែង​ឃើញ ម្នាក់ៗ​រក​ផ្លូវ​ទៅ​កាន់​ផ្ទះ​រៀងៗ​ខ្លួន។

ព្រះជាម្ចាស់ប្រោសធាតុទាំងអស់​ឲ្យរស់នៅជាមួយគ្នាយ៉ាងស្រួល
១៨ឧបមា​ថា ពិណ ទោះបី​តន្រ្តីករ​ដូរ​ចង្វាក់ និង​តែង​បទ​ផ្សេង​ក្តី ក៏​សម្លេង​របស់​ខ្សែ​នីមួយៗ នៅ​តែ​ដែល។ យ៉ាង​ណា​មិញ ធាតុ​ទាំង​ប្រាំ​ដែល​ផ្សំ​គ្នា​បង្កើត​បាន​ជា​ពិភព​លោក ទោះបី​មាន​លក្ខណៈ​ប្លែក​គ្នា​ក្តី ក៏នៅ​ផ្សំគ្នា​តាម​របៀប​ថ្មី​បាន​ដែរ។ ប្រសិន​បើ​យើង​ពិនិត្យ​មើល​ព្រឹត្តិ​ការណ៍ ដែល​កើត​មាន​នៅ​គ្រា​នោះ យើង​មុខ​ជា​យល់​សេចក្តី​នេះ​យ៉ាង​ច្បាស់។ ១៩សត្វ​ដែល​ធ្លាប់​រស់នៅ​លើ​គោក​ បែរ​ជា​ទៅ​រស់​នៅ​ក្នុង​ទឹក រីឯ​សត្វ​ដែល​ធ្លាប់​ហែល​ក្នុង​ទឹក​ បែរ​ជា​ដើរ​នៅ​លើ​គោក​វិញ។ ២១អណ្តាត​ភ្លើង​មិន​ឆាប​ឆេះ​សត្វ​ដ៏ទន់​ខ្សោយ ដែល​ដើរ​វិល​វល់​ក្នុង​ភ្លើង​នោះ​ឡើយ។ អណ្តាត​ភ្លើង​ក៏​មិន​ធ្វើ​ឲ្យ​អាហារ​ទិព្វ​រលាយ​ដែរ ទោះបី​អាហារ​ទិព្វ​នេះ​តែង​តែ​រលាយ ដូច​ទឹក​កក​ក៏​ដោយ។

អវសានកថា
២២បពិត្រ​ព្រះ​អម្ចាស់! ព្រះ​អង្គ​លើក​តម្កើង​ប្រជា​រាស្រ្ត​របស់​ព្រះ​អង្គ ឲ្យ​មាន​សិរី​រុង​រឿង​ក្នុង​គ្រប់​ប្រការ! ព្រះអង្គ​បាន​ជួយ​ទំនុក​បំរុង​ប្រជា​រាស្រ្ត​របស់​ព្រះអង្គ គ្រប់​ពេល​វេលា គ្រប់​ទី​កន្លែង​ផង។