ទំនុកតម្កើង(៥៩)

សូមរំដោះទូលបង្គំអោយរួចពីកណ្ដាប់ដៃរបស់ខ្មាំងសត្រូវ!
១ ទំនុកពីសៀវភៅរបស់គ្រូចំរៀង។ បទ «សូមកុំបំផ្លាញ»។
ទំនុករបស់ស្ដេចដាវីឌ។ នៅពេលដែលស្ដេចសូលចាត់គេអោយទៅព័ទ្ធ
ដំណាក់ស្ដេចដាវីឌដើម្បីធ្វើ គុតព្រះអង្គ។
២ ព្រះនៃទូលបង្គំអើយ! សូមរំដោះទូលបង្គំអោយរួចពី ខ្មាំងសត្រូវរបស់ទូលបង្គំផង
សូមការពារទូលបង្គំអោយរួចពីកណ្ដាប់ដៃ របស់អស់អ្នកដែលប៉ុនប៉ងធ្វើបាបទូលបង្គំ។
៣ សូមរំដោះទូលបង្គំអោយរួចពីកណ្ដាប់ដៃ របស់អស់អ្នកដែលប្រព្រឹត្តទុច្ចរិត
សូមសង្គ្រោះទូលបង្គំអោយរួចផុត ពីមនុស្សស្រេកឈាម។
៤ ព្រះអម្ចាស់អើយ! ទោះបីទូលបង្គំពុំបានប្រព្រឹត្តអ្វីខុស ឬប្រព្រឹត្តអំពើបាបណាមួយក៏ដោយ
ក៏ពួកគេនាំគ្នាពួនស្ទាក់ចាំប្រហារជីវិតទូលបង្គំ
មនុស្សមានអំណាចឃុបឃិតគ្នា ប្រឆាំងនឹងទូលបង្គំដែរ។
៥ ទោះបីទូលបង្គំគ្មានកំហុសអ្វីក៏ដោយ ពួកគេខំរូតរះរៀបចំខ្លួនប្រឆាំងនឹងទូលបង្គំ
ឱព្រះអង្គអើយ សូមតើនឡើង យាងមករកទូលបង្គំ សូមទតមកទូលបង្គំផង។
៦ ឱព្រះជាអម្ចាស់អើយ ព្រះអង្គជាព្រះនៃពិភពទាំងមូល ព្រះអង្គជាព្រះនៃជនជាតិអ៊ីស្រាអែល
សូមតើនឡើង ដាក់ទោសប្រជាជាតិទាំងអស់នោះ
សូមកុំប្រណីសន្ដោសពួកក្បត់ដ៏ទុច្ចរិត ទាំងនោះឡើយ!។ – សំរាក
៧ ពួកគេនាំគ្នាវិលមកវិញនៅពេលល្ងាច ហើយនាំគ្នាលូដូចឆ្កែ
គេដើរក្រវែលជុំវិញទីក្រុង។
៨ មាត់របស់គេពោរពេញទៅដោយ ពាក្យសំដីអាក្រក់
ពាក្យសំដីរបស់គេប្រៀបបាននឹងដាវ គេគិតថា គ្មាននរណាស្ដាប់ឮទេ?
៩ ចំណែកឯព្រះអង្គវិញ ឱព្រះអម្ចាស់អើយ
ព្រះអង្គសើចចំអកអោយពួកគេ ព្រះអង្គចំអកអោយប្រជាជាតិទាំងនោះ។
១០ទូលបង្គំសម្លឹងមើលទៅព្រះអង្គ ព្រោះព្រះអង្គជាកម្លាំងនៃទូលបង្គំ
ព្រះជាម្ចាស់ជាកំពែងការពារទូលបង្គំ។
១១ព្រះរបស់ខ្ញុំដែលប្រកបដោយព្រះហឫទ័យ មេត្តាករុណា ទ្រង់យាងមករកខ្ញុំ
ព្រះអង្គអោយខ្ញុំបានសប្បាយ ដោយឃើញខ្មាំងសត្រូវបរាជ័យ។
១២ ឱព្រះអម្ចាស់ជាខែលការពារយើងខ្ញុំអើយ
សូមកុំប្រហារពួកគេឡើយ ក្រែងលោប្រជាជនទូលបង្គំ ភ្លេចអំពីជ័យជំនះរបស់ព្រះអង្គ
តែសូមអង្រួន និងច្រានទំលាក់ពួកគេ ដោយសារឫទ្ធានុភាពរបស់ព្រះអង្គ!។
១៣ពេលហារមាត់និយាយ គេពោលចេញមក សុទ្ធតែពាក្យសំដី ពោរពេញទៅដោយអំពើបាប
ដូច្នេះ សូមអោយពួកគេជាប់អន្ទាក់ ដោយសារតែចិត្តអួតអាងរបស់ខ្លួន!
ដ្បិតពួកគេគិតតែពីជេរប្រទេចផ្ដាសា និងនិយាយកុហក។
១៤សូមបំផ្លាញពួកគេ អោយវិនាសអន្តរាយយ៉ាងទាន់ហន់ទៅ
សូមបំផ្លាញពួកគេអោយវិនាសសូន្យទៅ!
ពេលនោះ មនុស្សគ្រប់ៗគ្នានឹងដឹងថា ព្រះជាម្ចាស់គ្រប់គ្រងនៅស្រុកអ៊ីស្រាអែល
ហើយព្រះអង្គក៏គ្រប់គ្រង រហូតដល់ស្រុកដាច់ស្រយាលនៃផែនដីដែរ។ – សំរាក
១៥ពួកគេនាំគ្នាវិលមកវិញនៅពេលល្ងាច ហើយនាំគ្នាលូដូចឆ្កែ
គេដើរក្រវែលជុំវិញទីក្រុង។
១៦ពួកគេដើរចុះដើរឡើង ស្វែងរកអាហារ
ក៏ប៉ុន្តែ គេនាំគ្នាគ្រហឹម ព្រោះស៊ីមិនឆ្អែត។
១៧រីឯទូលបង្គំវិញ ទូលបង្គំច្រៀងសរសើរព្រះចេស្ដារបស់ព្រះអង្គ
នៅពេលព្រឹកទូលបង្គំថ្លែងពីព្រះហឫទ័យ មេត្តាករុណារបស់ព្រះអង្គ
ដ្បិតព្រះអង្គជាកំពែងការពារទូលបង្គំ និងជាជំរកនៅពេលទូលបង្គំមានអាសន្ន។
១៨ឱព្រះដ៏ជាកម្លាំងនៃទូលបង្គំអើយ ទូលបង្គំនឹងស្មូត្រទំនុកតម្កើងថ្វាយព្រះអង្គ
ដ្បិតព្រះអង្គជាកំពែងការពារទូលបង្គំ ជាព្រះដែលមានព្រះហឫទ័យ មេត្តាករុណាទូលបង្គំ។