ទំនុកតម្កើង(១៩)

លោកទាំងមូលថ្លែងពីសិរីរុងរឿងរបស់ព្រះអម្ចាស់​
១ ទំនុកពីសៀវភៅរបស់គ្រូចំរៀង។
ទំនុករបស់ស្ដេចដាវីឌ។
២ ផ្ទៃមេឃថ្លែងអំពីសិរីរុងរឿង របស់ព្រះជាម្ចាស់
អាកាសវេហាស៍ប្រកាសអំពីស្នាព្រះហស្ដ របស់ព្រះអង្គ។
៣ ថ្ងៃមួយតំណាលប្រាប់ថ្ងៃមួយទៀត
យប់មួយប្រាប់យប់មួយទៀតអោយបានដឹង
៤ តែមិនមែនដោយប្រើភាសា ឬពាក្យសំដីទេ
ហើយក៏មិនឮសូរស័ព្ទអ្វីដែរ។
៥ ប៉ុន្តែ សេចក្ដីថ្លាថ្លែងរបស់វា ត្រាច់ចរលើផែនដីទាំងមូល
ហើយសំឡេងរបស់វាលាន់ឮរហូតដល់ជើងមេឃ
ជាកន្លែងដែលព្រះជាម្ចាស់បានដំឡើងពន្លា សំរាប់ព្រះអាទិត្យ។
៦ រីឯព្រះអាទិត្យក៏រះឡើង ប្រៀបបីដូចជាកូនកំលោះចេញមកសំពះផ្ទឹម
និងប្រៀបបីដូចជាវីរបុរសដ៏ខ្លាំងពូកែមួយរូប ចេញមករត់ប្រណាំងដោយអរសប្បាយ។
៧ ព្រះអាទិត្យចរយាត្រាពីជើងមេឃម្ខាង ឆ្ពោះទៅជើងមេឃម្ខាងទៀត
គ្មាននរណា អាចបំបាំងកំដៅរបស់ព្រះអាទិត្យបានឡើយ។

វិន័យរបស់ព្រះជាម្ចាស់
៨ វិន័យ*របស់ព្រះអម្ចាស់ល្អឥតខ្ចោះ ធ្វើអោយមានកម្លាំងចិត្តឡើងវិញ
ព្រះបណ្ដាំរបស់ព្រះអម្ចាស់គួរជាទីទុកចិត្ត ធ្វើអោយមនុស្សល្ងិតល្ងង់បែរទៅជាមានប្រាជ្ញា
៩ ព្រះព្រះបញ្ជារបស់ព្រះអម្ចាស់សុទ្ធតែត្រឹមត្រូវ ធ្វើអោយចិត្តមានអំណរសប្បាយ
បទបញ្ជារបស់ព្រះអម្ចាស់ ល្អត្រចះត្រចង់ បំភ្លឺចិត្តគំនិតអោយបានយល់។
១០ ការគោរពកោតខ្លាចព្រះអម្ចាស់ជាអំពើមួយ ល្អបរិសុទ្ធណាស់ ហើយស្ថិតស្ថេររហូតតទៅ។
ការវិន័យរបស់ព្រះអម្ចាស់ សុទ្ធតែត្រឹមត្រូវ និងសុចរិតទាំងអស់
១១ គួរអោយប្រាថ្នាជាងមាសសុទ្ធដ៏ច្រើន
ព្រមទាំងផ្អែមជាងទឹកឃ្មុំដែលហូរ ចេញពីសំបុកទៅទៀត។
១២ សេចក្ដីទាំងនេះបានបំភ្លឺទូលបង្គំ ជាអ្នកបំរើរបស់ព្រះអង្គ
ហើយដោយការប្រព្រឹត្តតាម ទូលបង្គំបានទទួលផលយ៉ាងបរិបូណ៌។
១៣ គ្មាននរណាម្នាក់អាចមើលឃើញកំហុស ដែលខ្លួនប្រព្រឹត្តដោយ អចេតនានោះបានឡើយ
សូមលើកលែងទោសអោយទូលបង្គំ នូវកំហុសណាដែលទូលបង្គំមើល មិនឃើញនោះផង។
១៤ សូមការពារទូលបង្គំអោយរួចពីចិត្តអួតបំប៉ោង
សូមកុំអោយចិត្តអួតបំប៉ោងនេះ ធ្វើជាម្ចាស់លើទូលបង្គំបានឡើយ
ធ្វើដូច្នេះ ទូលបង្គំនឹងបានឥតសៅហ្មង ឥតជាប់ជំពាក់នឹងអំពើបាបដ៏ធ្ងន់នេះទេ។
១៥ ព្រះអម្ចាស់អើយ សូមប្រោសប្រណី ទទួលពាក្យដែលទូលបង្គំទូលថ្វាយ
ព្រមទាំងទទួលគំនិតដែលទូលបង្គំរិះគិត នៅចំពោះព្រះភក្ត្រព្រះអង្គនេះផង
ដ្បិតព្រះអង្គជាថ្មដា និងជាព្រះដែលការពារទូលបង្គំ!។