អេសាយ (២៩)

ព្រះបន្ទូលស្ដីអំពីក្រុងយេរូសាឡឹម
១ ក្រុងអារីអែល ក្រុងអារីអែល
ជាបុរីដែលស្ដេចដាវីឌបោះទ័ព
មុខជាត្រូវវេទនាពុំខាន!
ទោះបីអ្នកខំធ្វើពិធីបុណ្យរៀងរាល់ឆ្នាំក្ដី
២ ក៏យើងនឹងកំទេចក្រុងនេះចោលដែរ។
ពេលនោះ នឹងមានសំឡេងយំសោក សំរែកថ្ងូរ
ហើយទីក្រុងទាំងមូលនឹងប្រៀបដូចជា
អាសនៈធ្វើយញ្ញបូជា។
៣ យេរូសាឡឹមអើយ យើងនឹងបោះទ័ពជុំវិញអ្នក
យើងនឹងអោយកងទ័ពឡោមព័ទ្ធអ្នក
យើងនឹងដំឡើងគ្រឿងសឹកវាយសំរុកអ្នក។
៤ ពេលនោះ អ្នកនឹងធ្លាក់ខ្លួនយ៉ាងទាបបំផុត
ពាក្យសំដីរបស់អ្នកលេចឮពីក្នុងដី
ពាក្យពេចន៍របស់អ្នកលេចចេញពីធូលីដី
សំឡេងរបស់អ្នកឮពីក្នុងដីមកដូចសំឡេងខ្មោច
ហើយពាក្យដែលអ្នកនិយាយខ្សឹបៗ
ក៏លេចឮពីធូលីដីមកដែរ។
៥ ខ្មាំងសត្រូវរបស់អ្នកនឹងមានចំនួន
ច្រើនឥតគណនា ដូចធូលីដី
សត្រូវដ៏កាចសាហាវនេះនឹងប្រៀបដូចជា
កំទេចចំបើងដែលហុយឡើង។
៦ រំពេចនោះ ព្រះអម្ចាស់នៃពិភពទាំងមូល
យាងមកជួយអ្នក ដោយប្រើផ្គរលាន់
ព្រះអង្គធ្វើអោយផែនដីរញ្ជួយ
អោយមានរន្ទះបាញ់
មានខ្យល់ព្យុះសង្ឃរាបក់បោកយ៉ាងខ្លាំង
ព្រមទាំងមានភ្លើងឆេះដ៏សន្ធោសន្ធៅផង។
៧ កងទ័ពដ៏ច្រើនឥតគណនា
របស់ប្រជាជាតិទាំងឡាយដែលលើកគ្នាមក
ច្បាំង ឡោមព័ទ្ធ និងចង់កំទេច
យេរូសាឡឹមដែលជាអាសនៈរបស់ព្រះជាម្ចាស់
មុខជាត្រូវបាត់សូន្យទៅវិញ ដូចគេយល់សប្ដិ
និងដូចសុបិននិមិត្តនៅពេលយប់ដែរ។
៨ ពេលនោះ កងទ័ពប្រជាជាតិទាំងប៉ុន្មាន
ដែលលើកគ្នាមកវាយលុកភ្នំស៊ីយ៉ូន
នឹងប្រៀបដូចជាអ្នកដែលគ្មានអាហារបរិភោគ
ហើយយល់សប្ដិឃើញថាខ្លួនកំពុងតែបរិភោគ
តែគេភ្ញាក់ឡើងក្រពះនៅទទេ។
អ្នកដែលស្រេកទឹក យល់សប្ដិឃើញថាខ្លួន
កំពុងផឹកទឹក
តែគេភ្ញាក់ឡើងអស់កម្លាំង ស្ងួតបំពង់ក។
៩ ចូរស្រឡាំងកាំង ហើយភ្ញាក់ផ្អើលទៅ
ចូរបិទភ្នែក ធ្វើជាមនុស្សខ្វាក់ទៅ!
ចូរស្រវឹង តែមិនមែនស្រវឹងស្រាទេ
ចូរដើរទ្រេតទ្រោត តែមិនមែនដោយសារ
អំណាចរបស់គ្រឿងស្រវឹងណាដែរ
១០ដ្បិតព្រះអម្ចាស់បានធ្វើអោយ
វិញ្ញាណរបស់អ្នករាល់គ្នាស្ពឹកស្រពន់
ព្រះអង្គបិទភ្នែកអ្នករាល់គ្នា ដែលជាព្យាការី
ព្រះអង្គបាំងមុខអ្នករាល់គ្នាដែលជាគ្រូទាយ។
១១ ចំពោះអ្នករាល់គ្នា
អត្ថន័យនៃនិមិត្តហេតុដ៏អស្ចារ្យទាំងនេះ
ប្រៀបបាននឹងសេចក្ដីដែលមានចែងទុក
ក្នុងសៀវភៅមួយបិទត្រាជិត
ហើយគេយកទៅអោយមនុស្សម្នាក់ដែល
ចេះអក្សរទាំងពោលថា «ចូរអានទៅ!»
តែអ្នកនោះតបមកវិញថា «ខ្ញុំអានពុំកើតទេ
ព្រោះសៀវភៅនេះមានបិទត្រា!»។
១២គេក៏យកសៀវភៅនោះទៅអោយមនុស្សម្នាក់
ទៀតដែលមិនចេះអក្សរ
ទាំងពោលថា «ចូរអានទៅ!»
តែអ្នកនោះតបមកវិញថា
«ខ្ញុំមិនចេះអក្សរទេ!»។
១៣ព្រះអម្ចាស់មានព្រះបន្ទូលថា:
ប្រជារាស្ត្រនេះចូលមកជិតយើង
ហើយលើកតម្កើងយើងត្រឹមតែពាក្យសំដី
និងបបូរមាត់ប៉ុណ្ណោះ
តែចិត្តរបស់គេនៅឆ្ងាយពីយើងណាស់
រីឯការដែលពួកគេគោរពកោតខ្លាចយើង
គ្រាន់តែជាទំនៀមទម្លាប់
ដែលគេរៀនពីមនុស្សប៉ុណ្ណោះ។
១៤ហេតុនេះហើយបានជាយើងធ្វើអោយ
ប្រជារាស្ត្រនេះរឹតតែងឿងឆ្ងល់តទៅទៀត
ដោយប្រើការអស្ចារ្យ
និងប្ញទ្ធិបាដិហារិយ៍ផ្សេងៗ
យើងនឹងរំលាយប្រាជ្ញារបស់ពួកអ្នកប្រាជ្ញ
ហើយធ្វើអោយតម្រិះរបស់ពួកអ្នកចេះដឹង
ប្រែជាឥតបានការទៅវិញ។
១៥អស់អ្នកដែលគេចខ្លួនពីព្រះអម្ចាស់
ដើម្បីលាក់គំរោងការរបស់ខ្លួន
មុខជាត្រូវវេទនាពុំខាន។
អ្នកទាំងនោះប្រព្រឹត្តអំពើផ្សេងៗនៅក្នុង
ទីលាក់កំបាំង ទាំងពោលថា
«គ្មាននរណាឃើញយើង
គ្មាននរណាដឹងថាយើងកំពុងតែធ្វើអ្វីទេ!»។
១៦អ្នករាល់គ្នាគិតដូច្នេះខុសទាំងស្រុង!
តើគេអាចចាត់ទុកដីឥដ្ឋ
ស្មើនឹងជាងស្មូនកើតឬ?
ក្អមមិនអាចនិយាយអំពីជាងស្មូនថា
«អ្នកនោះមិនបានសូនខ្ញុំមកទេ»
ថូក៏មិនអាចនិយាយអំពីជាងស្មូនថា
«គាត់គ្មានប្រាជ្ញា» ដែរ។
ពិភពលោកថ្មីដ៏ប្រសើររុងរឿង
១៧បន្តិចទៀតព្រៃព្រឹក្សាលើភ្នំលីបង់
នឹងក្លាយទៅជាចំការដំណាំ
ហើយចំការដំណាំក្លាយទៅជាព្រៃវិញ។
១៨ នៅថ្ងៃនោះមនុស្សថ្លង់នឹងឮព្រះបន្ទូល
ដែលមានចែងទុកនៅក្នុងគម្ពីរ
ហើយមនុស្សខ្វាក់នឹងមើលឃើញ
គឺគេរួចផុតពីភាពងងឹត
លែងស្ថិតនៅក្នុងភាពអន្ធការទៀតហើយ។
១៩ព្រះអម្ចាស់នឹងប្រោសអោយមនុស្សទន់ទាប
មានអំណរសប្បាយកាន់តែខ្លាំងឡើងៗ
ហើយព្រះដ៏វិសុទ្ធរបស់ជនជាតិអ៊ីស្រាអែល
នឹងប្រោសអោយមនុស្សក្រីក្រ
បានត្រេកអរសប្បាយដ៏លើសលប់ដែរ។
២០ស្ដេចដែលកាន់អំណាចផ្ដាច់ការ
នឹងត្រូវវិនាសសូន្យ
ហើយអ្នកដែលមើលងាយព្រះជាម្ចាស់
ក៏នឹងសាបសូន្យអស់ដែរ។
អស់អ្នកដែលចូលចិត្តធ្វើបាបអ្នកដទៃ
នឹងត្រូវបាត់បង់ជីវិតជាពុំខាន
២១ព្រោះពួកគេពោលពាក្យចោទប្រកាន់អ្នកដទៃ
ធ្វើអោយគេទទួលទោស
ពួកគេប្រើឧបាយកល
ធ្វើអោយចៅក្រមកាត់ក្ដីខុស
ហើយចោទប្រកាន់មនុស្សស្លូតត្រង់
ដោយគ្មានមូលហេតុត្រឹមត្រូវ។
២២ហេតុនេះហើយបានជាព្រះអម្ចាស់
ដែលជាព្រះរបស់ពូជពង្សលោកយ៉ាកុប
និងជាព្រះដែលបានលោះលោកអប្រាហាំ
មានព្រះបន្ទូលថា
ចាប់ពីពេលនេះតទៅ ពូជពង្សលោកយ៉ាកុប
នឹងលែងអាម៉ាស់ទៀតហើយ
គេក៏លែងតក់ស្លុតទៀតដែរ
២៣ដ្បិតពេលណាកូនចៅរបស់គេឃើញ
កិច្ចការដ៏អស្ចារ្យដែលយើងនឹងប្រព្រឹត្ត
ចំពោះពួកគេ នោះពួកគេនឹងទទួលស្គាល់
នាមដ៏វិសុទ្ធរបស់យើង
ពួកគេនឹងទទួលស្គាល់ថា
យើងជាព្រះដ៏វិសុទ្ធរបស់លោកយ៉ាកុប
ហើយពួកគេនឹងកោតខ្លាចយើង
ដែលជាព្រះរបស់ជនជាតិអ៊ីស្រាអែល។
២៤ពេលនោះ ពួកដែលវង្វេងស្មារតី
បែរជាចាប់ផ្ដើមមានប្រាជ្ញា
ហើយអស់អ្នកដែលតែងតែរឹងចចេស
បែរជាសុខចិត្តទទួលពាក្យប្រៀនប្រដៅ។