ព័ត៌មានភូមិភាគភ្នំពេញ

សម្តេច ហ៊ុន សែន ៖ គ្រីស្តបរិស័ទត្រូវរួមគ្នាការពារសន្តិភាព សន្តិសុខ សណ្ដាប់ធ្នាប់ក្នុង​សង្គមឲ្យបានគង់វង្ស​

«គ្រីស្តបរិស័ទត្រូវរួមគ្នាការពារសន្តិភាព សន្តិសុខ សណ្ដាប់ធ្នាប់ក្នុង​សង្គមឲ្យបានគង់វង្ស» នេះជាប្រសាសន៍របស់សម្តេច ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា ទៅកាន់ ថ្នាក់ដឹកនាំគ្រីស្តបរិស័ទជាង៣០០០​នាក់ ក្នុងនោះ​រួម​មាន​ ថ្នាក់ដឹកនាំ ព្រះវិហារ សមាគម ក្រុមប្រឹក្សា ព្រះសហគមន៍នានាទូទាំងប្រទេសកម្ពុជា បានមកជួបជុំគ្នា នៅក្នុងពិធីសំណេះ​សំណាល និងពិសាអាហារសាមគ្គី ដែលមានសម្តេច ហ៊ុន សែនជាអធិបតីដ៏ខ្ពង់ខ្ពស់ កា​ល​ពីថ្ងៃទី ១២ ខែតុលា ឆ្នាំ២០១៩ នៅមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ។

សម្តេចបានអំពាវនាវថា៖  «គ្រីស្តបរិស័ទត្រូវរួមគ្នាការពារសន្តិភាព សន្តិសុខ សណ្ដាប់ធ្នាប់ក្នុង​សង្គមឲ្យបានគង់វង្ស ពីព្រោះបើមិនមានសន្តិភាពទេ កុំនិយាយពីការរីកចម្រើនខាងសាសនាឲ្យសោះ មានសន្តិភាព យើងអាចធ្វើអ្វីៗបានគ្រប់យ៉ាង»។ សម្តេចតេជោក៏បាន អំពាវនាវផងដែរឲ្យគ្រីស្តបរិស័ទ ត្រូវចូលរួមអនុវត្តឲ្យបានខ្ចាប់ខ្ចួន នូវគោលនយោបាយភូមិឃុំមានសុវត្ថិភាព។ មួយទៀត តាមសហគមន៍ ឬតាមវិហារសាសនា ត្រូវចូលរួមក្នុងយុទ្ធនាការកាត់បន្ថយ និងលុបបំបាត់បញ្ហាគ្រឿងញៀនខុសច្បាប់ផ្សេងៗ។ មួយទៀត ត្រូវយកចិត្តទុកដាក់លើបញ្ហាចរាចរណ៍ ដែលជាបញ្ហាសំខាន់ក្នុងប្រទេសរបស់យើង។ ដូច្នេះក្នុងពេលធ្វើដំណើរនៅលើដងផ្លូវ ត្រូវគោរពច្បាប់ចរាចរណ៍ទាំងអស់គ្នា។ ថ្ងៃនេះ ថ្ងៃស្អែក​កុំឲ្យ​មានគ្រោះថ្នាក់ចរាចរណ៍។

សម្តេចតេជោបន្តថា  គ្រីស្តបរិស័ទត្រូវបន្តការយកចិត្តទុកដាក់លើការធ្វើសុខដុមនីយកម្មសាសនា កិច្ចសន្ទនាអន្តរជំនឿ (គ្រីស្តសាសនា និងគ្រីស្តសាសនា) និង មានទំនាក់ទំនងល្អជានិច្ច ជាមួយសាសនាដទៃទៀតផងដែរ។ និងចុងក្រោយគឺ ត្រូវបន្តធ្វើការបណ្តុះបណ្តាលធនធានមនុស្សឲ្យបានច្រើនបន្ថែមទៀត ដើម្បីងាយស្រួលចូលរួមចំណែកក្នុងសង្គម និងអភិវឌ្ឍ​លើវិស័យផ្សេងៗ​ទៀត​ជាមួយរាជរដ្ឋាភិបាលកម្ពុជា។

សម្តេចតេជោ ហ៊ុន សែន បានបង្ហាញនូវក្តីរីករាយសប្បាយចិត្ត ដែលបានអញ្ជើញចូលរួមសំណេះសំណាល និងពិសាអាហារសាមគ្គីជាមួយបងប្អូនគ្រីស្តបរិស័ទនាពេលនេះ។ នេះជាលើកទី៤ ហើយដែលសម្តេចតេជោ បានអញ្ជើញជួបសំណេះសំណាលជាមួយថ្នាក់ដឹកនាំ និងបងប្អូនគ្រីស្តបរិស័ទ ដើម្បីសុខដុមនីយកម្មវិស័យគ្រីស្តសាសនានៅក្នុងប្រទេសកម្ពុជា។ 

សម្តចតេជោ ហ៊ុន សែន បានមានប្រសាសន៍ថា សាសនាធំៗនៅកម្ពុជាមាន៣ធំៗរួមមាន៖ ព្រះពុទ្ធសាសនា ដែលជាសាសនារបស់រដ្ឋ មានឥស្លាមសាសនា និងគ្រីស្តសាសនា។ សាសនាទាំងអស់ អាចរស់នៅជាមួយគ្នាបានដោយមិនមានជម្លោះសាសនានោះទេ ហើយរាជរដ្ឋាភិបាលតែងតែផ្តល់ឱកាសនិងគាំទ្រចំពោះសាសនាទាំងអស់នោះដោយមិនមានការបំបិទសិទ្ធអ្នកកាន់សាសនាអ្វីឡើយ។​កម្ពុជាពិតជាមានមោទនភាពចំពោះសាសនាទាំងអស់ដែលបានរស់នៅមិនមានជម្លោះនឹងគ្នា ហើយក៏មិនមានការវាយប្រហារខាងណានោះទេ។ សម្រាប់ប្រទេសកម្ពុជាបងប្អូនជឿទៅលើសាសនាមួយណា គឺជាសិទ្ធសេរីភាពរបស់បងប្អូន។ 

សម្ដេចតេជោនាយករដ្ឋមន្ត្រី បានមានប្រសាសន៍ទៀតថា សាសនាទាំងអស់នៅក្នុងប្រទេសកម្ពុជាបានរស់ឡើងវិញក្រោយពីរបបប្រល័យពូជសាសន៍ ប៉ុល ពត បានដួលរលំ។

តាមរបាយការណ៍របស់ឯកឧត្តម ទេសរដ្ឋមន្ត្រី ហ៊ឹម ឆែម រដ្ឋមន្ត្រីក្រសួងធម្មការ និងសាសនា បានឱ្យដឹងថា បច្ចុប្បន្នប្រជាពលរដ្ឋខ្មែរដែលបានជឿលើព្រះយេស៊ូគ្រីស្ត មានចំនួនសរុប ១១៤,៤០២នាក់។​ លោកបន្តថា គ្រីស្តសាសនាបានដើរតួនាទីយ៉ាងសំខាន់ ក្នុងការជួយពង្រឹង និងអប់រំសីលធម៌ ចរិយាធម៌សង្គម និងចូលរួមយ៉ាងសកម្មក្នុងការកសាង និងអភិវឌ្ឍសង្គមកម្ពុជា ឱ្យមានសុខសន្តិភាព ស្ថិរភាព រស់នៅប្រកបដោយភាពថ្លៃថ្នូរ និងសុខដុមរមនាជាមួយគ្នា វៀរចាកផុតពីការរើសអើង ប្រកាន់ពូជសាសន៍ ពណ៌សម្បុរ និន្នាការជំនឿសាសនា អំពើប្រទូសរ៉ាយ អំពើហិង្សាផ្សេងៗ ទាំងនៅក្នុងគ្រួសារ សហគមន៍ ក៏ដូចជានៅក្នុងសង្គមជាតិទាំងមូល។

ទាក់ទងនឹងការអំពាវនាវរបស់សម្តេចនាយក​រដ្ឋមន្ត្រី ​អំពីសុខដុមរមនាសាសនា លោក បូ រ៉ាវុធ តំណាងគ្រីស្តបរិស័ទកាតូលិក មកពីបាត់ដំបងបានឲ្យថា ពិតប្រាកដ១០០% មានសុខដុមរមនា ខាងសាសនា ក្នុងតំបន់របស់លោក គឺមានសេចក្តីសុខ និងគ្មានវិវាទអ្វីនោះទេ។ ចំពោះទំនាក់ទំនងជាមួយអាជ្ញាធរទៀតសោត គឺគ្មានបញ្ហាអ្វីសោះឡើយ។ លោកបញ្ជាក់ថា ពេលយើងសុំច្បាប់ប្រារព្ធបុណ្យទានម្តងៗ គឺអាជ្ញាធរតែងជួយគាំពារយើងជានិច្ច។ លិខិតស្នាមនានាទាក់ទងនឹងបេសកជន សាសនទូត មានការធានា ត្រឹមត្រូវតាមច្បាប់ អាជ្ញាធរតែយកចិត្តទុកដាក់ គាំពារជានិច្ចផងដែរ។ ចំពោះកិច្ចសន្ទនា អន្តរជំនឿ ឬអន្តរសាសនា គឺព្រះសហគមន៍ក្នុងភូមិភាគបាត់ដំបងបានយកចិត្តទុកដាក់យ៉ាងខ្លាំង និងមានទំនាក់ទំនងល្អជានិច្ច។​   

ក្នុងពិធីដ៏វិសេសវិសាលនោះ តំណាងថ្នាក់ដឹកនាំគ្រីស្តបរិស័ទ មានព្រឹទ្ធាចារ្យ គ្រូគង្វាល និងបូជាចារ្យ បានប្រកាស​គោលជំហរយ៉ាងឱឡារិកគាំទ្រជានិច្ចនិងទាំងស្រុង ចំពោះគោលនយោបាយរបស់រាជរដ្ឋាភិបាល ដែលមានសម្តេចហ៊ុន សែនជានាយករដ្ឋមន្ត្រី ដែលសម្តេចបានខិតខំអស់ពីកម្លាំងកាយចិត្ត ដើម្បីពលរដ្ឋកម្ពុជាមានស្នាមញញឹម រីកចម្រើន និង សន្តិភាព។ ព្រមទាំងបានអធិដ្ឋានសូមព្រះជាម្ចាស់ ថែរក្សា និងប្រទានឲ្យប្រទានពរដល់មុខរាជរដ្ឋាភិបាលមានសុខភាពល្អ និងទទួលបានជោគជ័យជានិច្ច៕