ព័ត៌មានភូមិភាគភ្នំពេញ

ព្រះវិហារព្រះបេះដូងព្រះយេស៊ូ សម្ពោធជួងថ្មី

លោកបូជាចារ្យវីរៈជ័យ កាត់ខ្សែបូសម្ពោធជួងនៅ_ផ្លូវ_ត្រី 12-03-2019

កណ្តាលៈ ព្រះវិហារ​ព្រះបេះដូង​ព្រះយេស៊ូ នៅ​ផ្លូវត្រី​នៃមណ្ឌល​សកម្ម​ភាព​ទម្លេមេគង្គ បាន​រៀបចំ​កម្មវិធី សម្ពោធ​ជួង​ព្រះវិហារ​ ក្នុងឱកាសបុណ្យ​រំឭកដល់​លោក​បូជាចារ្យ​ហ្រ្វង់ស្វ័រ​ ត្រឿង ប៊ូយៀប​ នាព្រឹក​ថ្ងៃទី១២ មីនា ២០១៩ ក្នុង​ភូមិ​ថ្មគោ ស្រុក​ល្វាឯម ខេត្ត​កណ្ដាល​ ក្រោម​អធិបតីភាព​លោក អូលីវីយេ ជ្មីត​អីស្ល៊ែរ ដោយ​មាន​លោក​បូជាចារ្យ និង​គ្រីស្ត​បរិស័ទ​ជិត​ឆ្ងាយ​ចូល​រួម​រាប់​ពាន់​នាក់​។

ជួង​ថ្មី​នេះមានឈ្មោះ​​ថា​ “ព្រះបេះដូងព្រះយេស៊ូ”។ លោក ស្រ៊ីប្រាម៉ុង វីរៈជ័យ បូជាចារ្យ​ទទួលខុសត្រូវ​មណ្ឌល​សកម្ម​ភាព​ទម្លេមេគង្គ មាន​ប្រសាសន៍​ថា ជួង​នេះ​ជា​សញ្ញា​មួយ​ដើម្បី​បន្លឺ​ឡើង​ហៅ​គ្រីស្ត​បរិស័ទ​ឲ្យ​មក​ជួប​ជុំ​គ្នា​អធិដ្ឋាន​ក្នុង​វិហារ។ លោក​បូជាចារ្យ​បន្ត​ថា កាលពីមុន​​ព្រះសហគមន៍​នៅ​ទីនេះ ​មាន​ពេល​ខ្លះ​ពិបាក​ក្នុង​ការជួបជុំ​គ្នា្​ដោយ​អត់​មាន​សំឡេង​ដើម្បី​ប្រកាស​ហៅ និងពេល​ខ្លះ​មេក្រូ​របស់​វិហារ​​មិនឮជាដើម ដែល​ធ្វើ​ឲ្យ​ការ​ជួបជុំ​ត្រូវ​បាន​កាត់​ផ្តាច់។

លោកបូជាចារ្យ​បន្ថែម​ទៀត​ថា ជួងនេះ នឹង​វាយ​ចំនួន​៣​ដង​ដើម្បី​ផ្តល់​ដំណឹង​ដល់​គ្រីស្តបរិស័ទ។ «ទី​​មួយ​ ដើម្បី​រៀបចំខ្លួន​ ទីពីរ រៀបចំសូត្រធម៌ និងទីបី​ចាប់​ផ្តើម​ថ្វាយអភិបូជា»។

លោក​អភិបាល​ អូលីវីយេ បាន​ទូល​អង្វរព្រះជាម្ចាស់ ដើម្បី​ប្រទានពរដល់ជួង​ថ្មី​នេះ​ និង​សូម​ឲ្យ​អស់​អ្នក​ដែល​បាន​ឮសំឡេង​ជួង​នេះ​មក​ជួបជុំគ្នា​ដើម្បី​លើក​តម្កើង​សិរីរុង​រឿងរបស់ព្រះជាម្ចាស់​ និង​ប្រារព្ធពិធីកាច់នំប៉័ងដើម្បី​នឹក​រឭក​ដល់​ព្រះយេស៊ូ។

តាមប្រពៃណី និង​អត្ថន័យ​នៃ​ជួង​សម្រាប់ព្រះសហគមន៍​កាតូលិក លោក​បូជាចារ្យ វិរៈជ័យ បញ្ជាក់​ថា ជួង​ជា​សំឡេង​របស់ព្រះជាម្ចាស់​ដែល​ហៅបងប្អូនទាងអស់​មក​ព្រះវិហារ គឺ​ដូចជា​លោក​ម៉ូសេ​ដែល​បាន​ផ្លុំ​ត្រែ​ដើម្បី​ហៅប្រជាជន​ទាំងអស់ឲ្យ​មករួបរួមគ្នា​ជាមួយ​ព្រះជាម្ចាស់ផងដែរ។

ដាលីស