ព័ត៌មានភូមិភាគភ្នំពេញ

កុមារនិងយុវជនយកវីរភាពរបស់លោកឪពុកបូស្កូជាគំរូ

សាលា​ដុនបូស្កូ​​បាន​រៀបចំ​កម្មវិធី​រំលឹក​អំពី​លោកឪពុក​បូស្កូ ដើម្បី​ឲ្យ​សិស្សានុសិស្ស​ទាំង​អស់​បាន​យល់​បន្ថែម​អំពី​គុណូបការៈ​និង​វីរភាព​របស់លោក​សម្រាប់​កុមារ និង​យុវជន។ កម្មវិធីនេះ​បាន​ធ្វើ​ឡើង​កាលពី​ថ្ងៃម្សិលមិញ (01-02-2019) ដែលមាន​សិស្សានុសិស្ស​បឋមសិក្សាមក​ពី​ភូមិច្រេសនិង​ទឹក​ថ្លា​ និង​វិទ្យាល័យទឹកថ្លាចូលរួម​ប្រមាណ​ជិត​២ពាន់នាក់ នៅ​សាលា​ដុន​បូស្កូ​ទឹកថ្លា។

បងស្រី អេង សារិន មាន​ប្រសាសន៍​ថា «កម្មវិធី​រំលឹក​បុណ្យ​លោកពុក​បូស្កូ ធ្វើ​ជារៀង​រាល់ឆ្នាំ​ គឺ​យើង​មាន​គោលបំណង​ឲ្យ​យុវជន​-នារីទាំងអស់ចង​ចាំ​លោពុក​បូស្កូ​។ ដោយសារ​តែ​លោកពុក​បូស្កូទើប​យើង​មាន​សាលា​ដុន​បូស្កូនៅថ្ងៃនេះ ហើយ​យើង​មាន​វត្ត​មាន​របស់​លោកគ្រូអ្នកគ្រូ បងស្រី ជាអ្នកគ្រប់គ្រង ហើយ​និង​សិស្សានុសិស្សទាំងអស់ ទាំងប្រុសទាំងស្រី តាំង​ពី​ថ្នាក់មត្តេយ្យរហូត​ដល់​វិទ្យាល័យ  រហូត​ដល់ថ្ងៃនេះ។ គឺយើង រំលឹកអំពី​គាត់។ ហើយ​យើង​ចង់​ឲ្យ​យុវជន-នារី ចេះ​អរគុណ​ព្រះជាម្ចាស់​ដែល​បាន​ប្រទាន​លោកពុក​បូស្កូ​មក​ឲ្យ​ពួកគេ។»

យុវតី​ ប៊ុនថង ប្រាជ្ញមាលា រៀននៅថ្នាក់ទី១២ ​និយាយ​ថា លោកពុក​បូស្កូ​ជាមនុស្ស​ម្នាក់ដែលមានឆន្ទៈ និងទស្សនវិស័យ​ទូលំទូលាយ មិន​អាត្មានិយម​ ។ ប្រាជ្ញមាលា «គឺគាត់មានសុបិនធំ គឺចង់ឲ្យយុវជននៅលើពិភពលោក រស់នៅតាមគំរូមួយដែលល្អ ជាបុគ្គលល្អសម្រាប់សង្គម សម្រាប់ខ្លួនឯង សម្រាប់គ្រួសារ។ គាត់បាននិយាយថា សុខចិត្តឲ្យយុវជនរត់ លេង ស្រែកអស់ពីអំណរសប្បាយ ប៉ុន្តែចៀសវាងពីការធ្វើអំពើបាប»។ 

មាលា​បន្ថែម​ថា «ខ្ញុំ​គិត​ថា គាត់​មាន​ឥទ្ធិពល​ខ្លាំង​សម្រាប់​យុវជន​យើង ទាំង​ការ​សិក្សា​និងការរស់នៅ»។

កុមារី គីម ស្រីលាភ   ជាសិស្ស​បឋមសិក្សា​នៅ​ទឹក​ថ្លាឲ្យ​ដឹងថា «លោកពុកដុនបូស្កូមានបួនចំណុចធំៗជាគំរូល្អរបស់ខ្ញុំ ចំណុចទី១ គាត់គឺជាកូនល្អ ទី២គាត់ជាសិស្សល្អ ទី៣គាត់គឺជាមិត្តល្អ និងទីបួនគាត់គឺជាយុវជនល្អនៅក្នុងសង្គម»

រីឯកុមារា​ ឆេង ប្រសិទ្ធ ឲ្យដឹងដែរថា «លោកពុកបូស្កូជាhero (វីរបុរស)របស់ខ្ញុំ ព្រោះគាត់ជាមនុស្សដែលចេះលះបង់នូវអ្វីដែលគាត់មាន គាត់ចេះទទួលខុសត្រូវនូវកំហុសរបស់គាត់ គាត់លះបង់អ្វីដែលគាត់មានទៅអ្នកដែលគាត់មិនធ្លាប់ស្គាល់ពីមុន ហើយគាត់ក៏ក្លាយជាមិត្តភក្តិជាមួយគ្នា។ គាត់លះបង់អ្វីៗឲ្យគេ ដោយមិនទាមទារពីគេវិញ»

នៅ​ក្នុងកម្មវិធីនេះ សិស្សានុសិស្សទាំងអស់​បាន​ចូលរួម​ជាមួយ​គ្នា​រយៈ​ពេល​ពេញ​មួយ​ថ្ងៃ ដោយ​មាន​ការ​ប្រកួត​កីឡា ការ​ប្រកួត​និយាយ​ភាសាអង់គ្លេសនិង​ខ្មែរអំពី​វីរភាព​របស់លោកពុកបូស្កូ ប្រកួត​ចម្រៀងដែល​ពួកគេ​និពន្ធ​ដោយ​ខ្លួនឯងជាដើម។

លោកឪពុកបូស្កូ ជា​បព្វជិត​កាតូលិក ឬ​ហៅ​ថា​ជាសង្ឃកាតូលិក ហើយ​លោក​គឺ​ជា​ស្ថាបនិក​នៃ​ក្រុម​គ្រួសារ​សាលេស៊ាន​ដុន​បូស្កូ​និង​ជា​អ្នកបង្កើត​ឲ្យ​មាន​សាលា​អប់រំដុន​បូស្កូ​ជាច្រើន​នៅ​ទូទាំង​ពិភពលោក។ សព្វថ្ងៃនេះ នៅ​ក្នុងប្រទេសកម្ពុជា សាលាដុនបូស្កូ​​មាន​ពី​កម្រិត​មត្តេយ្យ​រហូត​ដល់​វិទ្យាល័យ និង​មាន​បណ្តុះ​បណ្តាល​វិជ្ជាជីវៈ និង​បច្ចេក​ទេស​មួយ​ចំនួន​ ដែលមាន​ទីតាំង​នៅ​ទីក្រុង​ភ្នំពេញ និង​នៅ​ខេត្ត​បាត់ដំបង។