ស្វែងរក
The replica watches uk country for this brand for everyone, I believe replica watches most people are more understanding of its home pilots watch, who let people rely on the rolex replicaflight table from the home? Whether it is the original Mark series, or the replica rolex Navy Air Force forces MIRAMAR or Antoine De Saint Exupéry special models have a lot of fans.
ពិធីចែកវិញ្ញាបនបត្របញ្ជាក់ការសិក្សា ដល់សិក្ខាកាមជំនាន់ទី១ និងជំនាន់ទី២

. - ២១ មីនា ២០១៧
 

សិក្ខាកាមជាស្រ្តីចំនួន៥៥នាក់ ទទួលវិញ្ញាបនបត្របញ្ជាក់ការសិក្សា ក្រោយពីបាន សិក្សា នៅមជ្ឈមណ្ឌលបណ្តុះបណ្តាលជំនាញវិជ្ជាជីវៈស្រ្តី របស់អង្គការការីតាសបាត់ដំបង អស់រយៈ ពេលពី៦ ខែ ដល់១ឆ្នាំ ។

ពិធីប្រគល់វិញ្ញាបនបត្រនេះ បានប្រព្រឹត្តទៅនាព្រឹកថ្ងៃទី២១ ខែមីនានេះ ក្រោមអធិបតីលោក អេនរីគេ ហ្វីការេដូ អភិបាលព្រះសហគមន៍កាតូលិកភូមិភាគបាត់ដំបង និងជាប្រធានក្រុមប្រឹក្សា ភិបាល នៃអង្គការការីតាសកម្ពុជា ឯកឧត្តមនឹម ថូ រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនិតិ សម្បទា ប្រធានអង្គការការីតាសកម្ពុជា ព្រមទាំងអាណាព្យាបាល រួមនិងសិស្សានុសិស្ស ជាច្រើនរូប ។

លោកអភិបាលអេនរីគេ ហ្វីការេដូ បានមានប្រសាសន៍ថា៖ នៅថ្ងៃនេះ ជាថ្ងៃពិសេស គឺយើង ពិតជាមានអំណរសប្បាយ និងរីករាយចំពោះលទ្ធផល ដែលយើងមាននាឱកាសនេះ ។ ទាំងថ្នាក់ ដឹកនាំ បុគ្គលិក លោកគ្រុអ្នកគ្រូ អាណាព្យាបាល ព្រមទាំងសិក្ខាកាមទាំងអស់ ដែលបានសិក្សានៅ ក្នុង មជ្ឈមណ្ឌលបណ្តុះបណ្តាលជំនាញវិជ្ជាជីវៈសម្រាប់ស្ត្រី របស់អង្គការការីតាស គឺគ្រប់គ្នាបាន សហការគ្នា បានយ៉ាងល្អ ដែលនាំឲ្យយើងសម្រេចបាននូវផលផ្លែល្អ ហើយនាំឲ្យយើងទៅខាងមុខ ។ ប្រសិនបើយើងមិនចេះសហការគ្នា យើងមិនចេះធ្វើការជាមួយគ្នា នោះយើងមិនអាចទៅខាងមុខ បាននោះទេ ។

លោកអភិបាលបន្តថា អ្វីដែលបងប្អូនទទួលបានពីទីនេះ គឺទទួលបានចំណេះដឹងខាងមុខរបរ ចំណេះ អំពីជីវិត និងបទពិសោធន៍ដែលមានតម្លៃនាំឲ្យយើងដើរទៅខាងមុខ ។ ការងារអង្គការការីតាស ជួយ ឲ្យ អ្នកដែលមានបញ្ហានៅក្នុងជីវិត ដែលក្រ មិនមានមធ្យោបាយ មិនមានចំណេះ មិនមានមុខរបរ ជួយ ឲ្យពួកគេបានទទួលតម្លៃនៃជីវិត ដើម្បីងើបឡើងដើរឆ្ពោះទៅខាងមុខ ដោយជំនះនូវគ្រប់ឧបសគ្គក្នុងជីវិត ដែលខ្លួនមាន ។

លោកអភិបាលបានផ្តាំផ្ញើដល់មាតាបិតា និងអាណាព្យាបាលទាំងអស់ សូមជួយបន្តគាំទ្រ កូនៗរបស់ ខ្លួន ដើម្បីអាចក្រោកឈរ និងដើរទៅមុខទៀត ក្នុងការទទួលបានការងារល្អ សម្រាប់ជួយឲ្យជីវភាព ក្រុមគ្រួសារកាន់តែប្រសើរ។

ឯកឧត្តមនឹម ថូ រដ្ឋលេខាធិការក្រសួងសង្គមកិច្ច អតីតយុវជន និងយុវនិតិសម្បទា បានមាន ប្រសាសន៍លើកទឹកចិត្ត ដល់សិក្ខាកាមទាំងអស់ ឲ្យខិតខំប្រឹងប្រែងរៀនសូត្រ ក្របយកចំណេះវិជ្ជា ទាំងនេះ ដើម្បីអនាគតរបស់ខ្លួននិងក្រុមគ្រួសារ ។ លោកសម្តែង នូវការអបអរសាទរចំពោះសិក្ខាកាម ដែលបានបញ្ចប់ការសិក្សានាពេលនេះ ហើយក៏ សូមអបអរសាទរ នូវស្នាដៃ ដែលកើតមកពីការខិតខំ ប្រឹងប្រែងសិក្សាកន្លងមកនេះ។ ពេលមុនយើងមិនបានរៀន យើងមិនចេះ ប៉ុន្តែចាប់ពីពេលនេះតទៅ យើងបានរៀន បានយើងចេះ យើងមានបទពិសោធន៍ យើងមានចំណេះជំនាញ យើងអាចរកការងារ ធ្វើ ដែលអាចធ្វើឲ្យជីវិតរបស់យើង មានអនាគតល្អជាងមុន ។ កាលពីយើងមិនបានរៀន យើងនៅ ងងឹត ដល់ពេលឥឡូវយើងបានភ្លឺជាងមុន ។

ជាមួយគ្នានេះ ឯកឧត្តម ក៏សូមថ្លែងអំណរគុណដល់អង្គការការីតាសកម្ពុជា ដែលបានជួយដល់ប្រជាពលរដ្ឋខ្មែរ នៅក្នុងការកសាងជីវភាពថ្មី ពីការរៀនយកជំនាញពីមជ្ឈមណ្ឌលនេះ ។ សូមឲ្យក្មួយស្រីទាំងអស់ ដែលមានរៀនចប់ពីទីនេះ សូមយកចំណេះជំនាញរបស់ខ្លួន ទៅប្រកបរបរចិញ្ចឹមជីវិត ដើម្បីអនាគតសម្រាប់ខ្លួន និងកូនចៅរបស់ខ្លួន ។

អ្នកស្រីគុណ គឹមស្រ៊ាង ប្រធានគ្រប់គ្រងមជ្ឈមណ្ឌលបណ្តុះបណ្តាលជំនាញវិជ្ជាជីវៈសម្រាប់ ស្រ្តី របស់អង្គការការីតាស បានលើកឡើងថា មជ្ឈមណ្ឌលបណ្តុះបណ្តាលជំនាញវិជ្ជាជីវៈនេះ ត្រូវបានសាងសង់ឡើង ក្នុងគោលបំណងដើម្បី ជួយស្រ្តីក្រីក្រ មានវិបត្ត គឺផ្តល់ពួកគាត់ឲ្យមានជំនាញវិជ្ជាជីវៈ សម្រាប់ប្រកបរបរចិញ្ចឹមជីវិត ដោយផ្តល់ទាំង ចំណេះ ជំនាញ ព្រមទាំងអប់រំអំពីសុខភាពផ្លូវចិត្ត និងបំណិនជីវិតនោះផង។

អ្នកស្រីប្រធានគ្រប់គ្រងមជ្ឈមណ្ឌលបានបន្តថា មណ្ឌលនេះធ្វើការជាមួយស្ត្រី ដែលរងគ្រោះពី អំពើហឹង្សាក្នុងគ្រួសារ ស្ត្រីជួបវិបត្តិ ស្ត្រីរងគ្រោះនានា និងស្ត្រីដែលជាម្តាយវ័យក្មេង ដែលមិនមានឱកាសដើម្បីសិក្សាជំនាញផ្សេងៗ ខណៈពួកគេ មានកូននៅពេលវ័យក្មេងនោះ ។

អ្នកស្រី ថង ចន្ធី ជាតំណាងអាណាព្យាបាល ចាប់អារម្មណ៍ និងថ្លែងអំណរគុណដល់អង្គការការីតាស ដែលបានបង្កើតកម្មវិធី និងសាលាដើម្បីបណ្តុះបណ្តាលវិជ្ជាជីវៈ ដល់យុវនារី និង ស្ត្រីជាម្តាយ វ័យ ក្មេង។ អ្នកស្រីបានថ្លែងថា សូមអរគុណដល់អង្គការការីតាស ដែលបានបង្កើតមណ្ឌលបណ្តុះ បណ្តាល វិជ្ជាជីវៈ ទទួលយុវនារី និងស្ត្រីជាម្តាយវ័យក្មេង ដែលក្រីក្រ ជួបការលំបាក និងគ្មានទីពឹង ឲ្យបានទទួលការអប់រំ ក្រេបយកចំណេះដឹងលើមុខជំនាញផ្សេងៗ សម្រាប់ប្រកបរបរចិញ្ចឹម ជីវិតទៅថ្ងៃអនាគត ។

អ្នកស្រីបន្តថា ក្រៅពីការផ្តល់នូវជំនាញវិជ្ជាជីវៈសម្រាប់ស្រ្តី អង្គការការីតាស បានជួយលើផ្នែក បំណិនជីវិត និងការលើកកម្ពស់តម្លៃរបស់ស្រ្តី គឺជួយឲ្យស្រ្តីចាកផុតពីភាពក្រីក្រ ភាពល្ងង់ខ្លៅ និងជា ពិសេសក៏បានបង្រៀនអំពីការទប់ស្កាត់ វៀសចាកពីការសេពគ្រឿងញៀន ដែលសង្គមកំពុងស្អប់ខ្ពើម និងព្យាយាមលប់បំបាត់នោះ ។

ជាចុងក្រោយក្នុងនាមជាអាណាព្យាបាល អ្នកស្រីបានលើកជាសំណូមពរ និងមានមតិផ្តាំផ្ញើ ដល់អង្គការការីតាសកម្ពុជា មេត្តាបន្តជួយទៅដល់ស្រ្តីខ្មែរជាច្រើនទៀត ដែលកំពុងទទួល រងគ្រោះ ត្រូវការនូវការជួយឧបត្ថម្ភគាំទ្រពីអង្គការដៃគូនានា ។ សូមឲ្យមាតាបិតា និងស្រ្តីទាំងអស់ ដែលរង គ្រោះ និងមានឱកាសបានរៀនសូត្រនៅទីនេះ មេត្តាខិតខំប្រឹងប្រែង និងយកចិត្តទុកដាក់នៅក្នុងការ សិក្សា ដើម្បីរៀបចំអនាគតរបស់ខ្លួនឲ្យបានល្អប្រសើរ ។

ជាសិស្សជំនាន់ទី១ រៀនលើមុខវិជ្ជាសំអាងកាយ និងកែសម្ផស្ស ដែលត្រូវទទួលវិញ្ញាបនបត្រ បញ្ជាក់ការសិក្សា កញ្ញា សារឿន លីណា បានឡើងចាប់អារម្មណ៍ថា ក្នុងឱកាសនេះ កញ្ញាសូមថ្លែង អំណរគុណ យ៉ាងជ្រាលជ្រៅចំពោះអង្គការការីតាស ដែលបានជួយឧបត្ថម្ភគាំទ្រ និងផ្តល់ឱកាសដល់ កញ្ញា ក៏ដូចជាស្រ្តីផ្សេងៗទៀត ឲ្យទទួលបាននូវមុខជំនាញ ក៏ដូចជាមេរៀនបំណិនជីវិតជាដើម ។ កញ្ញាបន្តថា នៅមុនពេលបានចូលរៀននៅទីនេះ កញ្ញាគ្មានជំនាញអ្វីមួយច្បាស់លាស់ សម្រាប់ប្រកប របរចិញ្ជឹមជីវិតនោះឡើយ ប៉ុន្តែក្រោយពីបានរៀននៅទីនេះ និងបន្ទាប់ពីបញ្ចប់ការ សិក្សា នៅទីនេះ កញ្ញាអាចស្វែងរកការងារធ្វើបាន ។ កញ្ញា ក៏សង្ឃឹមថា កញ្ញាអាចមានការងារធ្វើ សមរម្យដូចគេឯង និងអាចមានជីវភាពល្អប្រសើរឡើងជាងមុនផងដែរ ដើម្បីជួយខ្លួនឯង និងជួយ ក្រុមគ្រួសារផង ។

គួរបញ្ជាក់ថា សិក្ខាកាមដែលបានបញ្ចប់ការសិក្សាលើមុខជំនាញទាំងនោះមានដូចជា ជំនាញកាត់ដេរ សំអាងកាយ និងកែសម្ផស្ស សិប្បកម្មកែច្នៃ ផ្នែកធ្វើម្ហូប និងភោជនីយដ្ឋាន និងផ្នែកតម្បាញ ដែលបានទទួលនូវការឧបត្ថម្ភគាំទ្រពីអង្គការការីតាសទាំងស្រុង ក្នុងអំឡុងពេល សិក្សា និងស្នាក់នៅ រហូតដល់បញ្ចប់វគ្គនីមួយៗ ។

នៅក្រោយពិធីចែកវិញ្ញាបនបត្របញ្ជាក់ការសិក្សាដល់សិក្ខាកាមទាំង ៥៥នាក់ហើយនោះ ក៏មានការថតរូបទុកជាអនុស្សាវរីយ៍ ព្រមទាំងអញ្ជើញពិសារអាហារសាមគ្គីរួមគ្នា ក្នុងបរិយាកាស សប្បាយរីករាយយ៉ាងក្រៃលែង ។

សូមរំលឹកថា អង្គការការីតាសកម្ពុជា គឺជាអង្គការមិនមែនរដ្ឋាភិបាល និងជាអង្គការរបស់ ព្រះសហគមន៍កាតូលិកកម្ពុជា ដែលរួមចំណែកលើសកម្មភាពមនុស្សធម៌ និងការអភិវឌ្ឍន៍សង្គម ។ អង្គការការីតាសកម្ពុជា ជាសមាជិកនៃអង្គការការីតាសអន្តរជាតិ ដែលមានការិយាល័យ នៅទីក្រុងរ៉ូម ប្រទេសអ៊ីតាលី ដែលមានបណ្តាញសមាជិកអង្គការការីតាស ចំនួន១៦៧ប្រទេស នៅលើសកលលោក ៕ 

 
ដោយ៖ ឡុង សម្ផស្ស

 

 

ព័ត៌មានច្រើនទៀត
១៣ មិថុនា ២០១៧

ព្រះសហគមន៍​កាតូលិក​ភូមិភាគ​ភ្នំពេញ ក្រោមការដឹកនាំ​របស់​លោក​អភិបាល អូលីវីយេ ជ្មីតអ៊ីស្ល៊ែរ បាន​យកចិត្តទុកដាក់បម្រើ​​អ្នក​​ក្រីក្រ​ ដោយ​រៀបចំឲ្យមាន​កម្មវិធី​ជួបជុំ​ជាមួយបណ្តាជនជាតិបារាំង​ដែលជា​​អ្នក​ជំនួញ និង​ជាអ្នក​មានតួនាទីការងារខ្ពស់នៅក្នុង​សង្គមកម្ពុជា កាលពីថ្ងៃទី​១៣ មិថុនា ២០១៧ នៅលើទូក​តាមដងទន្លេចតុមុខ រាជធានីភ្នំពេញ។

នៅក្នុង​កម្មវិធីនេះ លោក​អភិបាល បានធ្វើ​បទ​​បង្ហាញ​អំពី​ជីវិត​របស់ព្រះសហគមន៍​កាតូលិក​​កម្ពុជា​ តាមរយៈសកម្មភាពនានានៅក្នុង​សង្គម ជាពិសេស​នៅក្នុង​វិស័យ​អប់រំ និង​សហគ្រិន​សង្គម ដែលជា​បញ្ហា​ប្រឈមដ៏ចម្បង​ចំពោះជីវភាព​​របស់​អ្នក​តូចតាច ដោយ​រៀបចំ​ឲ្យ​មានតំណាង​ដែលជាអ្នក​ទទួលខុសត្រូវផ្ទាល់​តាម​ផ្នែកនីមួយៗ​ មក​បង្ហាញ​អំពី​ទស្សនវិស័យ និង​សកម្មភាព​ដែលកំពុង​ធ្វើ និង​ទទួលបានជោគជ័យកន្លងមក​​។

លោកអភិបាល​ព្រះសហគមន៍ ភូមិភាគ​ភ្នំពេញ​បាន​មាន​ប្រសាសន៍​ថានេះជាឱកាស​មួយ​​ដើម្បី​ឲ្យ​ព្រះសហគមន៍​កាតូលិក​បង្ហាញ​ និង​ជួយស្វែងរក​ការងារឲ្យ​និស្សិត​ធ្វើ ជាពិសេស​ទាំក់​ទងទៅនឹង​ការ​សិក្សា សម្រាប់វិទ្យាស្ថាន​សន្ត​ប៉ូល ដែល​យើង​មាន​ថ្នាក់​បរិញ្ញាប័តនានា​ ​និង​ដើម្បី​បង្ហាញ​ នូវអ្វីដែល​ព្រះ​សហគមន៍​កាតូលិក​ធ្វើ​ទាក់ទងទៅនឹង​សង្គមនជាពិសេស​នៅក្នុង​កសិកម្ម សិប្បកម្ម​ដូចជា​​ត្បាញ​​សូត្រ​​ កែច្នៃ​ម្ហូបអាហារ​ កសិដ្ឋានធំ​ដែលយើងមាន និង​ដើម្បី​បង្កើតទំនាក់ទំនង​ជាមួយ​ជន​ជាតិ​បារាំង ​ដែល​ធ្វើការនៅតាមវិស័យនេះក្នុង​ប្រទេស​កម្ពុជា។ លោកបន្តថា ដើម្បី​ឲ្យគេចាប់ផ្តើម​ស្គាល់​យើង​ ហើយជាពិសេស​យើងបាន​គិតអំពី​ទីផ្សារ​ការងារ​ ព្រោះថា​សមត្ថភាព និង​​ចំណេះដឹង​ប៉ុណ្ណឹង​​មិន​ល្មមទេ​ គឺ​ត្រូវ​ឲ្យ​គេ​ចេះ​បង្កើត​ទំនាក់​ទំនង មានចិត្ត​ស្មោះ​ត្រង់​​ ឲ្យ​យកចិត្តទុកដាក់​ឲ្យទទួលខុសត្រូចយ៉ាងខ្ពស់។

លើសពីនេះទៅទៀត​លោកអូលីវីយេបន្ថែម​ថា ​នេះក៏​ជាឱកាសមួយ​ផ្សព្វផ្សាយអំពី​សូត្រ​​​​ដែលយើងត្បាញ ស្ករគ្រាប់ដែលយើងធ្វើ​ សម្មិទ្ធិផលតាមកសិកម្មដែលយើងមាន​ ហើយ​ប្រហែលជាឱកាស​នៅពេលក្រោយ​រកទីផ្សារដើម្បីលក់​អ្វីៗទាំងអស់ដែលយើងមាន​។

រីឯលោក ផុន សុផល តំណាងវិទ្យាស្ថានសន្តប៉ូល ក៏បាន​បញ្ជាក់ផងដែរថា នេះ​ជា​ជំហ៊ាន​​ដំបូងដែល​ព្រះសហគមន៍​ផ្សព្វផ្សាយជាមួយបណ្តាជនជាតិបារាំង និងជំហ៊ាន​បន្ត​បន្ទាប់ទៀត​គឺនឹងរៀបចំឲ្យ​មាន​ជំនួប​ជាមួយ​សហគមន៍​អង់គ្លេស កូរ៉េ និង​សហគមន៍​ផ្សេងៗទៀត​ដើម្បីជួយ​ដល់​និស្សិត​ ជន​ក្រីក្រឲ្យ​មាន​ការងារធ្វើ។

ដោយ៖ ដាលីស

១១ មិថុនា ២០១៧

បេក្ខជន បេក្ខនារី​ ចំនួន​​២០នាក់​បាន​ទទួលពិធី​សុំ​ចូល​ព្រះ​សហគមន៍​ នៅ​ព្រះ​វិហារ​​ព្រះកុមារ​យេស៊ូ​បឹង​ទំពុន​ នៃ​មណ្ឌល​សកម្មភាព​ភ្នំពេញ​ខាង​ត្បូង ក្រោម​ការ​ដឹកនាំ​ដោយ​លោក​បូជាចារ្យ ដាមីញ៉ាំង ហ្វានឺរ និង​មាន​គ្រីស្ត​បរិស័ទ​ចូល​រួម​ជាង២០០នាក់ នា​ថ្ងៃ​ទី​១១ មិថុនា ២០១៧​ ក្នុង​ឱកាស​បុណ្យ​​លើក​តម្កើង​ព្រះ​ត្រៃឯក​ ដែលជាព្រះបិតា ព្រះបុត្រា និង​ព្រះវិញ្ញាណដ៏វិសុទ្ធ។

លោក​បូជាចារ្យ​ទទួល​បន្ទុក​ព្រះ​សហគមន៍នេះ គឺលោកដាមីញ៉ាំង បាន​មាន​ប្រសាសន៍​ថា​ ថ្ងៃនេះ​យើង​បាន​ធ្វើ​ពិធី​ជំហ៊ាន​ទីមួយ​ដែលជាថ្ងៃត្រឹមត្រូវ​ ដើម្បី​ឲ្យ​បេក្ខជន​រៀប​ចំខ្លួន​ឆ្ពោះទៅ​រក​អគ្គសញ្ញា​ជ្រមុជទឹក ​​ដែល​ទទួល​ក្នុង​ព្រះនាម​ព្រះ​បិតា ព្រះបុត្រា និងព្រះ​វិញ្ញាណ​ដ៏វិសុទ្ធ​។

នៅក្នុង​ធម្មទេសនា​ លោក​ដាមីញ៉ាំង មាន​មានប្រសាសន៍​លើកទឹកចិត្ត​ទៅ​កាន់​គ្រីស្ត​បរិស័ទ​​ទាំង​អស់​ ជាពិសេស​បេក្ខជន បេក្ខនារី​ទាំងនោះ​ដោយ​នឹក​រឮក​ដល់​ព្រះបន្ទូល “​មិនមែន​អ្នក​រាល់​គ្នា​ទេ​ដែល​ជ្រើស​រើស​ខ្ញុំ​ គឺ​ខ្ញុំ​ជា​អ្នក​ជ្រើស​រើស​អ្នក​រាល់​គ្នា”។​ លោក​បាន​ពន្យល់​ថា យើង​មាន​កិត្តិយស ដោយ​ព្រះជាម្ចាស់​បាន​ជ្រើស​រើស​យើង​ ដោយ​ផ្តល់​នូវ​តួនាទី​នៃ​កាងារ​របស់​យើង​គឺ​ “សេចក្តី​ស្រឡាញ់” និង​ត្រៀម​ខ្លួន​ទទួល​ព្រះជាម្ចាស់​ជានិច្ច ទោះ​បី​ស្លាប់​ទៅ​ហើយ​ ព្រោះ​ព្រះជាម្ចាស់​ជាសេចក្តី​ស្រឡាញ់។

លោកបន្ត​ថា នៅ​លើ​លោក​យើង​នេះ​សេចក្តី​ស្រឡាញ់​មិនមែន​ជាស្ករ តែជា​អំបិលព្រោះ​ពេលខ្លះ​ពុំ​មាន​ភាព​ងាយ​ស្រួល​ សម្រាប់​យើង​ដែល​ត្រូវ​ស្រឡាញ់​ខ្មាំង​សត្រូវ​។ ម្យ៉ាងវិញ​ទៀត​អំបិល​មាន​អត្ថប្រយោជន៍ជាច្រើន ទាំងរស់ជាតិ និងជួយរក្សាអាហារឲ្យនៅបានយូរ​(សម័យ​បុរាណ) មិនតែប៉ុណ្ណោះពាក្យថា Salary(ប្រាក់ខែ) បានមកពី​ពាក្យឡាតាំង​ដែល​មានន័យថា​អំបិល​ផងដែរ។

លោកបូជាចារ្យ​រំឮកផងដែរថា អ្នក​ដែល​ត្រៀមខ្លួន​ទទួល​អគ្គសញ្ញាជ្រមុជទឹក គឺ​ត្រៀម​ខ្លួន​ធ្វើ​ជា​អំបិល​​សម្រាប់​មនុស្ស​លោក​ ដូចនេះ​បានជាសម័យមុន​ពេលគេទទួល​អគ្គ​សញ្ញា​​ជ្រមុជទឹក គឺ​គេមាន​ទំនៀមទំលាប់​យក​អំបិល​បន្តិច​ដាក់ក្នុង​មាត់។​

ក្រោយ​ពី​បញ្ចប់​ធម្មទេសនា កញ្ញា កែវ កញ្ញា តំណាង​គ្រូ​អប់​រំជំនឿ​ បាន​ប្រកាស​បង្ហាញ​មុខ​បេក្ខជន និង​ស្នើរ​សុំ​លោក​បូជាចារ្យ ​​ដើម្បីទទួលពិធីសុំចូលព្រះសហគមន៍។

លោកបូជាចារ្យ​ បាន​សួរ​បញ្ជាក់​អំពីគោលបំណង និង​​ជំនឿ​របស់​បេក្ខជន ដោយ​បោះ​បង់​នូវ​ជំនឿដើមរបស់ខ្លួន ហើយ​​ជឿលើ​ព្រះជាម្ចាស់ជាព្រះបិតា ព្រះបុត្រា និងព្រះ​វិញ្ញាណ​​ដ៏វិសុទ្ធ តាមរយៈ​ការយកព្រះគ្រីស្ត​ជាទីពឹង យកព្រះបន្ទូលជាទីពឹង និង​យកព្រះសហគមន៍​ជាទីពឹង​នៃ​ជំនឿរបស់ខ្លួន។

ដោយ៖ ដាលីស

០៤ មិថុនា ២០១៧

បេក្ខជន បេក្ខនារីចំនួន ៣៧នាក់មកពី​សគមន៍​និយាយភាសាផ្សេងៗគ្នា​ បានទទួល អគ្គសញ្ញាលាបថ្ងាស ក្នុងឪកាសបុណ្យព្រះវិញ្ញាណយាងមក នៅព្រះវិហារកាតូលិក សន្តយ៉ូសែប​(ផ្សារតូចភ្នំពេញ)។ ពិធីនេះបានប្រព្រឹត្តទៅកាលពីថ្ងៃទី ៤ ខែមិថុនា​ ២០១៦៧​ ដោយមានលោក អូលីវីយេ ជ្មីតអីស្ល៊ែរ អភិបាលព្រះសហគមន៍កាតូលិកភ្នំពេញជាអធិបតី និងមានបងប្អូន គ្រីស្តបរិស័ទចូលរួមជា​ច្រើន​កុះករ ដែលពីសហគមន៍គ្រីស្តបរិស័ទនិយាយភាសាអង់គ្លេស សហគមន៍គ្រីស្តបរិស័ទនិយាយភាសាបារាំង សហគមន៍គ្រីស្តបរិស័ទនិយាយភាសាកូរ៉េ និងភាសាខ្មែរ​។​

មានប្រសាសន៍ក្នុងពេលធម្មទេសនា លោកអូលីវីយេ ​ បាន​មា​នប្រសាសន៍ ​ណែនាំ​ដល់គ្រីស្ត​បរិស័ទដែលមានវត្តមានក្នុងពិធី​​ថា៖ មុនព្រះយេស៊ូ​យាង​ឡើង​ស្ថានបរមសុខ ព្រះអង្គ​បាន​ប្រទាន​សេចក្តីសុខសាន្ត ហើយ​សេចក្តី​សុខសាន្ត​គឺជាមូលដ្ឋាន​​​គ្រឹះ​ដ៏សំខាន់បំផុត។ លោក​បន្តថា ប្រសិន​បើគ្មាន​សេចក្តីសុខសាន្តនៅក្នុង​ចិត្ត​យើង​នោះទេ នោះ​ទាំង​ខ្លួន​យើង​ផ្ទាល់ ទាំង​ព្រះសហគមន៍ ទាំងក្នុងសង្គម និង​ពិភពលោក​ទាំង​មូល​ក៏គ្មានសេចក្តីសុខសន្តិភាពដែរ។

លោកអភិបាល​ក៏​បានជំរុញ​ឲ្យ​គ្រីស្ត​បរិស័ទ​ទាំងអស់​ យកចិត្ត​ទុកដាក់​ថែរក្សា​សេចក្តី​សុខសាន្ត​ដែលបានទទួលពីព្រះជាម្ចាស់តាមរយៈព្រះវិញ្ញាណ។ ​ដោយហេតុ​ថា ​នៅ​ពេល​​​ដែល​ចេញ​ទៅ​ប្រកាស​ដំណឹងតាមរយៈជីវិត​រស់នៅ​ប្រចាំថ្ងៃ ​ដែល​​ពោរ​ពេញ​ដោយ​សេចក្តី​សុខសាន្ត មាន​សេចក្តី​ស្រឡាញ់និង​ចេះ​បម្រើ​គ្នា​ទៅវិញ​ទៅមក នោះ​នាំ​ឲ្យ​ខ្លួន​យើង​ម្នាក់ៗ​អភិវឌ្ឍន៍ខ្លួនឯងផ្ទាល់​ និង​ពិភពលោកទាំងមូល។​ 

 

លើសពីនេះ​ទៅ​ទៀត លោក​អូលីវីយេ បានជំរុញឲ្យ​គ្រីស្ត​បរិស័ទ​យកចិត្ត​ទុកដាក់​ក្នុង​ការ​លើក​លែងទោសឲ្យ​គ្នា​ទៅវិញ​ទៅមក​យ៉ាង​ពិត​ប្រាកដគឺ "​មានចិត្តលើកលែងទោស និង​លើកលែងទោសពិតៗ មិនត្រឹមតែ​បបូរមាត់នោះទេ"។ លោក​អភិបាល​បញ្ជាក់​បន្ថែមថា ព្រះវិញ្ញាណដ៏វិសុទ្ធចង់សកម្ម តែសកម្មឬមិនសកម្ម​គឺ​​អាស្រ័យលើចិត្ត​របស់យើងដែលខិតខំអនុវឌ្ឍន៍។

 

បន្ទាប់ពីធម្មទេសនា​លោក​អូលីវីយេ​ អភិបាលព្រះសហគមន៍ ​​បាន​សួរ​បញ្ជាក់​អំពី​ជំនឿ​របស់​បេក្ខជន​ចំពោះ​ព្រះជា​ម្ចាស់​​​នៅក្នុង​ពិធី​ទទួល​អគ្គសញ្ញាលាបថ្ងាស ហើយ​​ប្រកាស​ធម៌ជឿ​រួមជាមួយ​គ្រីស្ត​​បរិស័ទ​។ បន្ទាប់មករួម​ជាមួយ​សន្ត​បុគ្គល​ទាំងឡាយ ទូលអង្វរព្រះ​ជាម្ចាស់​​ដើម្បី​សូម​ព្រះ​វិញ្ញាណ​យាង​មក​គង់​សណ្ថិត​ជាមួយ​បេក្ខជន​ទាំងអស់ សូមឲ្យ​ពួកគេ​ទទួល​បាន​ផលផ្លែ​នៃព្រះ​វិញ្ញាណ​គឺ ១) មាន​ប្រាជ្ញាឈ្លាសវៃ។ ២) ដឹងខុសដឹងត្រូវ​។ ៣) ដឹងអំពី​សេចក្តីពិត។ ៤) មាន​យោបល់ល្អ។ ៥) មាន​សេចក្តី​អង់អាច។ ៦) ប្រព្រឹត្តតាម​ការណែនាំរបស់ព្រះវិញ្ញាណ។ និង​៧) ចេះគោរពកោតខ្លាចព្រះបិតា។

 

ជាព្រះវិញ្ញាណរបស់ព្រះយេស៊ូជាអម្ចាស់ដែលប្រទានដល់ក្រុមគ្រីស្តទូត ក្នុងបុណ្យទីហាសិបតាមព្រះបន្ទូលសន្យា មុនចាត់គេឲ្យចេញទៅប្រកាសដំណឹងល្អអំពីព្រះយេស៊ូមានព្រះជន្មរស់ឡើងវិញ ទៅដល់មនុស្សលោកនៃទីដាច់ស្រយាលនៃផែនដីទាំងមូល។

លោក ឃឹម​ សាខន ជា​បេក្ខជន​ទទួល​អគ្គសញ្ញា​លាប​ថ្ងាស​​នៅ​ក្នុង​ថ្ងៃនេះ​បាន​និយាយថា “អគ្គសញ្ញា​លាបថ្ងាស​នេះ​គឺ​បាន​ធ្វើ​ឲ្យ​ខ្ញុំ​ពោរពេញទៅ​ដោយ​ព្រះ​វិញ្ញាណ ដោយ​បំផុសគំនិត​ខ្ញុំ​ថ្មីៗ​ឲ្យ​រក្សា​ជំនឿ​ឲ្យ​ខ្ជាប់​ខ្ជួន​កុំឲ្យ​ប្រាសចាកពី​ជំនឿ សេចក្តី​សង្ឃឹម និង​សេចក្តី​ស្រឡាញ់​”។ លោកបាន​​បន្ត​ថា​ លោក​នឹង​បន្ត​ប្រកាស​ដំណឹងល្អ​ដល់​អ្នក​ជិតខាង​ឲ្យ​ពួកគេទទួលជឿលើ​ព្រះ​យេស៊ូ​គ្រីស្ត​ ដោយ​បង្ហាញ​សេចក្តីស្រឡាញ់ និង​យកចិត្ត​ទុកដាក់​ជួយចំពោះអ្នក​ដទៃ។

តាមជំនឿនៃព្រះសហគមន៍កាតូលិក អស់អ្នកដែលទទួល​អគ្គសញ្ញាលាបថ្ងាស គឺអស់​អ្នកដែលទទួលអគ្គសញ្ញាជ្រមុជទឹករួចហើយ។ អគ្គសញ្ញានេះ គឺបញ្ជាក់បន្ថែមថា បងប្អូនជាគ្រីស្តបរិស័ទ ពេញលក្ខណៈ ព្រះជាម្ចាស់ត្រាស់ហៅ គេឲ្យទទួលព្រះវិញ្ញាណដ៏វិសុទ្ធ​ដើម្បីបញ្ជាក់ជំនឿរបស់ខ្លួន និង ចាត់ឲ្យបងប្អូនចេញទៅ ប្រកាសដំណឹងល្អអំពីព្រះយេស៊ូ តាមរយៈការធ្វើសក្ខីភាពអំពីជំនឿរបស់ខ្លូន ​ធ្វើជាសាក្សី​នៃធម៌មេត្តាករុណា​របស់​ព្រះ​ជាម្ចាស់​​ ដល់មនុស្សដែលនៅជុំវិញយើង។

​ដោយ៖ ដាលីស

 

០៤ មិថុនា ២០១៧

ក្រុម​គ្រូពេទ្យ​ និង​យុវជនរួមជាមួយ​គណៈកម្មការមកពី​ប្រទេស​កូរ៉េ​៤២នាក់​ បាន​​ចាប់​ដៃ​សហការ​​ជាមួយ​ការិយាល័យ​សុខភាព ​ព្រះសហគមន៍កាតូលិក​ភូមិភាគភ្នំពេញ​ ដើម្បី​ជួយ​ពិនិត្យ និងព្យាបាល​ជំងឺទូទៅដល់​ប្រជា​ជនដែលរស់នៅ​​ប្រទេសកម្ពុជា ចាប់ពី​ថ្ងៃទី៤ដល់​ទី​៦ ខែមិថុនា ឆ្នាំ២០១៧ នៅព្រះវិហារ​សន្ត​យ៉ូសែប (​ផ្សារតូច)។

លោក​បូជាចារ្យ​ ម៉ូសេ លី ជាប្រធានដឹកនាំ​ក្រុមគ្រូពេទ្យ​មកពីកូរ៉េ បាន​មាន​ប្រសាសន៍​ថា​ កម្មវិធីនេះ​​ផ្តើម​ឡើង​ក៏ព្រោះ​តែខួបទី២៥ឆ្នាំ​នៃ​​​ព្រះសហគមន៍​សន្តយ៉ូហាន ក្នុង​ភូមិភាគ​ស៊ូវុន​(Suwon) នៅប្រទេសកូរ៉េ ហើយ​ខ្ញុំ​បាន​លឺអំពី​ព្រះសហគមន៍​ និង​ផ្នែកវេជ្ជសាស្ត្រ​នៅ​ប្រទេស​កម្ពុជា​តាមរយៈ លោកបូជាចារ្យ​ដាមីញាំង និង​បងស្រី​ហេលែន ពួកយើង​ក៏បាន​សម្រេចចិត្ត​ជ្រើស​រើស​ប្រទេស​កម្ពុជា ​ដើម្បី​បម្រើសេវាពិនិត្យ និងព្យាបាលជំងឺនៅទីនេះ។​

លោកបូជាចារ្យ​រូបនេះ ​ក៏​បាន​ថ្លែងអំណរគុណដល់​អ្នកជំងឺទាំងអស់ ដែលបាន​ពេញចិត្ត និង​ស្នើសុំឲ្យក្រុមលោក​មកទីនេះទៀត ហើយក៏សូមអរគុណ​ដល់ព្រះសហគមន៍​កាតូលិកកម្ពុជាដែល​បាន​​ទទួល​ពួកលោក​យ៉ាងកក់ក្តៅ។

បងស្រី ហេលេណា អូ បាន​លើកអំពី​ដើមហេតុ​នាំឲ្យ​មាន​កម្មវិធីនេះឡើងថា​ រយៈពេល​២ឆ្នាំ​ដែល​ខ្ញុំ​បាន​ធ្វើ​ការជាមួយ​អ្នក​ជំងឺ គឺ​ខ្ញុំ​បាន​ជួប​អ្នក​ជំងឺ​ភាគ​ច្រើន​ដែល​មិន​សូវ​បាន​ជួប​ជាមួយ​គ្រូពេទ្យ​​ជំនាញ​នោះទេ។​ ដូនជី​ ក្នុង​ក្រុម​គ្រួសារ​សន្តប៉ូល​ នេះ​បន្តថា ដោយឃើញ​ស្ថានភាព​បែបនេះ​ទើប​ខ្ញុំ​រួមជាមួយលោក​បូជាចារ្យ​ដាមីញាំង បាន​ទាក់ទង​ទៅ​ព្រះ​សហគមន៍​សន្ត​យ៉ូហាន​ប្រទេសកូរ៉េ ដើម្បី​រកឱកាស​ជួយ​ដល់​អ្នក​ជំងឺនៅទីនេះ។

អ្នកស្រី មួយ ឃីម មកពី​ច្រាំងចំរេះ បាន​និយាយថា​គ្រូពេទ្យ​នៅទីនេះ​យកចិត្ត​ទុកដាក់ និង​ពិនិត្យបានដិតដល់។ អ្នក​ស្រី​ ឃីម​ ក៏​បាន​ផ្លែងអំណរគុណចំពោះក្រុមពេទ្យស្ម័គ្រចិត្ត និង​ព្រះសហគមន៍ដែលបាន​រៀបចំឲ្យមាន​កម្មវិធីនេះឡើង និង​ចង់ឲ្យមាន​ការពិនិត្យ​ដូច​នេះ​ញឹក​ញាប់។​

រីឯលោក​ លោក ម៉ៅ សុភា ក្នុង​វ័យ​៥១ឆ្នាំ​ មាន​ជំងឺ​ក្រពះពោះវៀន រស់នៅ​ភូមិ​ត្រពាំង​អញ្ចាញ​ បាន​ឮដំណឹងនេះ​តាមរយៈបងប្អូននៅទួលសង្កែ បាន​ថ្លែង​អំណរគុណ​ ដោយ​យល់ថា​ការ​ពិនិត្យ និងព្យាបាលនេះ​ល្អព្រោះ​អាចកាត់បន្ថយលុយ ហើយ​ប្រសិន​បើ​ខាងកូរ៉េ អាច​មក​ញឹក​ញាប់នោះក៏រឹតតែប្រសើរថែមទៀត។ លោក​ថា​ “នេះជាលើកទីមួយនៅក្នុងជីវិតខ្ញុំ​ដែលបាន​មក​ពិនិត្យ និងព្យាបាលបែបនេះ ហើយគ្រូពេទ្យ​បាន​យកចិត្តទុកដាក់ចំពោះអ្នក​ជំងឺ​ ហើយ​ជួសមុខឲ្យ​ប្រជាជនខ្មែរទាំងអស់ខ្ញុំសូមថ្លែងអំណរគុណដល់​កម្មវិធីនេះ”។​

លោក​វិជ្ជបណ្ឌិត ជួង សាវឿន​​បាន​ឲ្យ​ដឹងថា សកម្មភាព​មនុស្សធម៌​របស់​ក្រុមគ្រូពេទ្យ​កូរ៉េ​ខាងត្បូង គឺ​ការិយាសុខភាព​ព្រះសហគមន៍កាតូលិកភូមិភាគភ្នំពេញ ​បាន​រៀបចំជាមួយ​បងស្រីហេលេណា ដើម្បី​ស្នើ​សុំ​រាជរដ្ឋាភិបាលកម្ពុជា តាមរយៈ​ក្រសួង​សុខាភិបាល​ដើម្បីជួយ​សម្រួលដល់ក្រុមនេះ​អាចចូល​មក​​កម្ពុជា​​រួមជាមួយ​​សម្ភារៈ និង​ថ្នាំ​ដើម្បីពិនិត្យ និងព្យាបាលទៅ​តាមគ្រប់​​ប្រភេទនៃជំងឺ។ លោក​បន្តថា រយៈពេលប៉ុន្មានថ្ងៃនេះមានបងប្អូនយើង​ចាប់អារម្មណ៍ជាច្រើន​ដោយ​មាន​អ្នកជំងឺ​មក​ពីតាមបណ្តាខេត្ត​ផងដែរ។​

ចាប់ពីរសៀលថ្ងៃទី៤ រហូត​ដល់​ថ្ងៃទី​៦មិថុនា ខែមិថុនា ឆ្នាំ២០១៧ មាន​អ្នកជំងឺ​​មក​ព្យាបាល​ជំងឺ​ជាច្រើន​​ប្រមាណជាង១០០០នាក់។​

នេះជាលើកទីមួយ​ហើយ ​ដែល​ក្រុមនេះ​ធ្វើការ​សហការរួម​ជាមួយ​ការិយាល័យ​សុខភាព​ព្រះសហគមន៍​កាតូលិកភូមិភាគភ្នំពេញប្រទេសកម្ពុជា។

ដោយ៖ ដាលីស

០១ មិថុនា ២០១៧
 
ព្រះសហគមន៍​កាតូលិក​ភូមិ​ភាគ​ភ្នំពេញ បាន​យកចិត្ត​ទុកដាក់​ចំពោះ​កុមារទាំងឡាយ​ដោយ​​ចូលរួម និង​គាំទ្រយ៉ាងពេញទំហឹង អំពី​សិទ្ធិកុមារ​។​ 
 

ជាក់ស្តែង​ អភិបាលអូលីវីយេ អភិបាល​ព្រះសហគមន៍​កាតូ​លិក​​​ភូមិ​ភាគ​ភ្នំពេញ ​​បានដាក់ផែនការណ៍ឲ្យការិ​​យាល័យ​យុវជន ជំទង់ និងកុមារ​នៃព្រះសហគមន៍​កាតូលិក​ភូមិ​ភាគ​ភ្នំពេញ ប្រារព្ធ​ទិវាសិទ្ធិកុមារអន្តរជាតិ​ នា​ថ្ងៃទី​១ មិថុនា ២០១៧នៅ​គ្រប់​ព្រះសហគមន៍​​នានា​នៅ​ក្នុង​​ភូមិ​​ភាគ​នេះ​​​ ដើម្បី​ឲ្យ​កុមារទាំង​នោះ​ទទួល​បាន​ទាំង​អំណរ​សប្បាយ​​​​​​ជាមួយ​គ្នា ជាពិសេស​ទទួល​បាន​ការ​យល់​ដឹង​បន្ថែម​អំពី​សិទ្ធ​ទាំង​ឡាយ​ដែល​ពួកគេ​មាន។ ព្រមទាំងមានការ​អធិដ្ឋាន​ជាពិសេស​សម្រាប់កុមារទាំងឡាយ​នៅក្នុង​ពិភព​លោក​ ​ដែល​បាន​បាត់បង់ជីវិត​ និង​កំពុង​តែរងគ្រោះ ដោយការរំលោភបំពាន។​​​ លោកអភិបាលអូលីវីយេបានចូលរួមដោយផ្ទាល់នៅ តាមព្រះសហគមន៍កាតូលិកមណ្ឌលសកម្មភាពតាកែវ និងព្រះសហគមន៍កាតូលិកមណ្ឌលសកម្មភាពកំពត។

លោក​ស៊ាន់ សារឿន  អ្នក​សម្របសម្រួល​នៅក្នុង​កម្មវិធីនេះទាំងមូល បាន​ឲ្យដឹងថា៖ នេះជាលើក​ទី​មួយ ​ដែល​ព្រះ​សហគមន៍​បាន​រៀប​ចំកម្មវិធីនេះ​ជាមួយកុមារ​ព្រមៗគ្នា​តាម​ព្រះ​សហ​គមន៍​នីមួយៗស្គ្រប់កន្លែងមណ្ឌលសកម្មភាពនៃភូមិភាគ​ភ្នំពេញ​ ។ ​លោក​ពិត​ជាមាន​អំណរ​សប្បាយ​ដោយ​បាន​ឃើញ​កុមារទាំង​នោះ​មាន​ស្នាម​ញញឹម​គ្រប់ៗគ្នា​ ហើយកម្មវិធី​បានប្រព្រឹត្តទៅ​យ៉ាងរលូន។

 លោក​បូជាចារ្យ​ ដាមីញាំង ហ្វានឺរ ដែល​ទទួល​ខុសត្រូវ​មណ្ឌល​សកម្មភាព​ភ្នំពេញ​ខាង​ត្បូង​ បាន​មាន​ប្រសាសន៍ថា កម្មវិធី​នេះ​មាន​សារៈ​សំខាន់ខ្លាំងណាស់។ ​កុមារដែល​បាន​ចូលរួម​គឺ​មាន​ទាំង​កុមារជាគ្រីស្ត​បរិស័ទ និង​មិនមែន​ជា​គ្រីស្ត​បរិស័ទ​។ លោកបន្តថា៖ ក្មេងៗ​សំខាន់​ព្រោះ​ព្រះ​យេស៊ូ​មាន​ព្រះ​បន្ទូល​ថា ប្រសិន​បើ​អ្នក​គ្មានចិត្ត​ដូចកូនក្មេង អ្នក​មិន​អាច​ចូលស្ថាន​បរមសុខបានទេ។ លោក​ដាមីញាំង ក៏​បាន​បកស្រាយ​ផងដែរថា​ ក្មេងៗ​ជាមនុស្ស​សាមញ្ញ​ មាន​អំណរ​សប្បាយ និង​នាំឲ្យ​មនុស្ស​ធំចូលរួមនៅក្នុង​អំណរសប្បាយ​ ហើយ​ចំពោះ​សង្គមវិញ​ពួកគេគឺ​ជា​អនាគត​នៃ​សង្គម ដូចនេះ​សម្រាប់​ប្រទេសនីមួយៗ​គឺ​ត្រូវជួយឲ្យ​កុមារទាំងនោះ​រីកចម្រើន ដោយ​ចេះទទួលខុសត្រូវ និង​យល់អំពី​សិទ្ធិរបស់ពួកគាត់ផងដែរ។​

ជាលទ្ធផល​ព្រះសហគមន៍​ជាង៤០កន្លែង​ នៃ​មណ្ឌល​សកម្មភាព​ទាំង​៩​របស់​ភូមិភាគ​ភ្នំពេញ​​​បាន​រៀបចំកម្មវិធី​ខាងលើ​​ជាមួយ​កុមារ​​ជាង៤០០០នាក់ ហើយ​កុមារទាំងអស់​នោះ​បាន​ទទួលការយល់ដឹងអំពី​សិទ្ធ​ធំៗទាំង៤របស់ពួកគេគឺ៖ សិទ្ធិរស់រានមានជីវិត សិទ្ធិ​ក្នុង​ការអភិវឌ្ឍ សិទ្ធិទទួលបាននូវការការពារ និង​សិទ្ធិចូលរួម។ 

ដាលីស

២៨ ឧសភា ២០១៧

ថ្លែងនៅក្នុងធម្មទេសនាទៅកាន់គ្រីស្ត​បរិស័ទ​ជាច្រើនរយនាក់​ នាឱកាស​បុណ្យ​ព្រះ​យេស៊ូ​​យាងឡើងស្ថានបរមសុខ និង​សម្ភោធអាគារសិក្សាថ្មី​ នៅ​ព្រះវិហារ​សន្តីម៉ារី ទួលតាំង កាលពីថ្ងៃទី២៨ ឧសភានេះ លោកអូលីវីយេ អភិបាលព្រះសហគមន៍ភូមិភ្នំពេញបាន​ជំរុញ​ឲ្យ​មាតា​បិតានៅតាមព្រះសហគមន៍កាតូលិកនានាក្នុងភូមិភាគភ្នំពេញ យកចិត្ត​ទុក​ដាក់​បញ្ជូនកូនឲ្យ​ទៅ​សាលា ជាជាងឲ្យកូនទៅជួយធ្វើការរកស៊ី។

លោក​អភិបាល​អូលីវីយេ បាន​មាន​ប្រសាសន៍​ថា​៖ “ នៅតាម​ដងទន្លេមេគង្គ​ និង​បាសាក់​​មាន​បងប្អូន​គ្រីស្តបរិស័ទច្រើនណាស់​ដែល​រស់នៅ ​ តាំងពី​មុន​សង្គ្រាម​ និង​ក្រោយសង្គ្រាម​​រហូតបច្ចុប្បន្ន។​ លោកបន្ត​ថា នៅក្នុង​ព្រះសហគមន៍ យើង​គិតថា​នឹងខិតខំ​រស់នៅ​ជាគ្រួសារតែមួយ​តាមព្រះជាយេស៊ូ ហើយ​១៥​ព្រះសហគមន៍​​កាតូលិកនៅតាមដងទន្លេនេះ ខ្ញុំ​បាន​បង្កើត​សាលា មត្តេយ្យ និងបថមសិក្សា​ឲ្យ​កុមារតូចរៀនរហូតដល់ថ្នាក់ទី២ ឬទី៣ ដើម្បីឲ្យគេមានមូលដ្ឋានមុន ពួកគេចូលទៅរៀននៅសាលារដ្ឋបាន។”

ជាក់ស្តែងណាស់ការខិតខំប្រឹងប្រែង និងយកចិត្តទុកដាក់របស់លោកអភិបាលអូលីវីយេ នាំឲ្យព្រះសហគមន៍សន្តីម៉ារី​នេះ បើកថ្នាក់សិក្សាមូលដ្ឋានសម្រាប់កុមារ ពីកំរិតមត្តេយ្យ​ ដល់បឋមសិក្សា ថ្នា់ក់ទី១ ទី២ជាដើម។​ ពេលនេះក៏បានកសាងអាគារដ៏ស្កឹមស្កៃ សម្រាប់បម្រើក្នុងវិស័យអប់រំទូទៅនេះផងដែរ។​

បន្ទាប់ពី​អភិបូជា លោកអភិបាលអូលីវីយេ រួមជាមួយលោកអភិបាល លោកបូជាចារ្យ និងសប្បុរសជនដែលបានឧបត្ថម្ភ ក្នុងការសាងសង់ បានអញ្ជើញកាត់ខ្សែបូរ​​សម្ភោធដាក់ឲ្យ​ប្រើ​ប្រាស់​អាគារ​សិក្សាជាផ្លូវការ។ លោកអភិបាលក៏បានបាចទឹកព្រះពរ នៅក្នុងអគារថ្មីទាំងមូល ដើម្បីព្រះជាម្ចាស់ថែរក្សាគ្រប់មនុស្សទាំងអស់ដែលស្នាក់នៅ និងចេញចូលក្នុងអាការនេះ។ ​

អាគារថ្មីនេះមានសប្បុរសជនជាច្រើនបានជួយឧបត្ថម្ភ  រួមទាំងលោកអគ្គរាជទូតបុរីវ៉ាទីកង់ ប្រចាំប្រទេសសិង្ហបុរី ផងដែរ។

 

ដាលីស

២៥ ឧសភា ២០១៧

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ទទួលជួបពិភាក្សាជាមួយសហគមន៏គ្រឹស្តនៅក្នុងកម្ពុជា ជាង៤០០០នាក់ នាព្រឹកថ្ងៃទី២៥ ឧសភា ឆ្នាំ២០១៧ នៅសាលសន្និបាតនិងពិព័ណ៌កោះពេជ្យ រាជធានីភ្នំពេញ។

នេះជាលើកទី២ហើយ ដែលសម្តេចតេជោ ទទួលជួបពិភាក្សាជាមួយនឹង សហគមន៏គ្រឹស្តនៅក្នុងប្រទេសកម្ពុជា ដែលពេលលើកទី១ត្រូវបានប្រារព្ធក្នុងឆ្នាំ២០១៦។

ថ្លែងក្នុងឱកាសនេះ សម្តេចតេជោ បានអះអាងជាថ្មីម្តងទៀត នូវ សុខុដុមនីយភាព ខាងសាសនា ក្នុងប្រទេសកម្ពុជា និង មានភាពល្អប្រសើរក្នុងទំនាក់ទំនង រវាងសាសនា ព្រះពុទ្ធ សាសនា ម៉ូស្លឹម សាសនា គ្រឹស្ត ដែលពិតជាមានសារៈសំខាន់បំផុតក្នុងសុខុដុភាពខាងសាសនា នេះដែលកម្ពុជាពុំមានជម្លោះសាសនាដូចបណ្តារប្រទេសដទៃទៀតនៅលើពិភពលោក។

សម្តេចតេជោ ក៏បានធ្វើការថ្លែងអំណរគុណចំពោះ សហគមន៏គ្រឹស្ត ដែលបានជំរុញនូវការអភិវឌ្ឍ និង សកម្មភាពមនុស្សធម៌ក្នុងប្រទេសកម្ពុជាផងដែរ។

យោងតាមក្រសួងធម្មការ និង សាសនា កម្ពុជាមាននិការចំនួន២​នៃសាសនាគ្រឹស្ត ដូចជា កាតូលិក និង​ ប្រូតេស្តង់។ អ្នកគោរពប្រតិបត្ត័តាមនិកាយកាតូលិក មានចំនួន ១២៩០០ នាក់ និង ប្រូតេស្តង់ មានចំនួន ៨៣០៨៦ នាក់។​

សាសនាគ្រឹស្តត្រូវបានផ្សព្វផ្សាយក្នុងប្រទេសកម្ពុជាតាំងពីឆ្នាំ១៩២៣ មកម្ល៉េះ ដែលគិតមកទល់បច្ចុប្បន្នមានរយៈពេល ៩៤ឆ្នាំមកហើយ។

ប្រទេសកម្ពុជាត្រូវបានទទួលស្គាល់នូវសេរីភាពខាងជំនឿនិងសាសនា ខណៈពេលដែលសាសនា ព្រះពុទ្ធជាសាសនា របស់រដ្ឋ។ ៩៥ភាករយ​នៃ ចំនួនប្រជាជនសរុប ចំនួន១៥លាននាក់ គោរពប្រតិបត្តិនូវសាសនាព្រះពុទ្ធ ដែលមាន៤៥១៤ វត្តអារាមទូទាំងប្រទេស និង ៥៦៨២០ ព្រះសង្ឍ ព្រមទាំង សាសនិកអ៊ីស្លាមចំនួន ៣០០ ០០០ នាក់៕

ដោយ៖ ផល សុផានិត

២៣ ឧសភា ២០១៧

ទីក្រុងកែប ៖ ​លោកអភិបាលអូលីវីយេ ជ្មីតអ៊ីស្ល៊ែរ បានធ្វើជាអធិបតីក្នុងពិធីបុណ្យយ៉ាង​ឱឡារិកនៃពិធីបុណ្យព្រះនាងម៉ារីជាទីពំនឹងគ្រីស្តបរិស័ទ នៅសហគមន៍សាលាបច្ចេកទេស​ដុនបូស្កូ និងមូលនិធិកូនក្មេងនៃខេត្តកែប។ នេះជាបុណ្យប្រកបដោយសេចក្តីស្រឡាញ់ សម្រាប់ក្រុម​បងស្រីដុនបូស្កូសាឡេស៊ាន ហើយនិងគ្រីស្តបរិស័ទដែលថ្វាយបូជា​ចំពោះព្រះ​នាង​ម៉ារី ​​ជាទីពំនឹងពំនាក់គ្រីស្តបរិស័ទ។ ពិធីបុណ្យនេះ ត្រូវបានប្រារព្វជាប្រពៃណី ថ្ងៃទី២៤ ខែឧសភា ឆ្នាំ២០១៧ ប៉ុន្តែពិធីនេះត្រូវ​បានលើកមកធ្វើនៅថ្ងៃទី២៣វិញ ពីព្រោះលោក​អភិបាល​អាចចូលរួមបានតែនៅថ្ងៃក្នុងនេះ​ ដោយមានការ​ព្រមព្រៀង​ជាមួយលោកបូជាចារ្យ សំណាង និងសហគមន៍សិក្សាដុនបូស្កូនៅកែប។

អំឡុងពេលព្រឹក សិស្សនិសិត្យ គ្រូបង្រៀនបានជួបជុំគ្នាលេងល្បែងកម្សាន្តយ៉ាងសប្បាយ រីករាយ ហើយមានសកម្មភាពកីឡា ស្របពេលដែលពួកគេរង់ចាំលោកអភិបាលមកនៅពេល រសៀល។ នៅពេលលោកអភិបាលអញ្ចើញមកដល់ លោកបូជាចារ្យ សំណាង បានអញ្ជើញ​លោកអភិបាលឲ្យដើរមើលជុំវិញសាលា ដើម្បីទស្សនាសំណង់អាគារថ្មីៗ។ នៅម៉ោង ៥ ល្ងាច គ្រីស្តបរិស័ទមួយក្រុមតូចនៃសាលានេះ បានជួយសំណេះសំណាលជាមួយលោកអភិបាល​នៅបន្ទប់ជាមួយលោកបូជាចារ្យ ហ្វេណាន់ដូ លោកបូជាចារ្យ ឆាល់ និងក្រុមដូនជីខ្លះផងដែរ។ អំឡុងពេលជំនួបខ្លីជាមួយ គ្រីស្តបរិស័ទដប់រូប លោកអភិបាល មានប្រសាសន៍​ដោយលើក​ទឹកចិត្តពួកគេ ឲ្យធ្វើជាគ្រាប់​ពូជនៃជំនឿ​ និងក្តីសង្ឃឹមនៅកណ្តាលនៃសហគមន៍សិក្សា ជា​កន្លែង​មានមនុស្សភាគតិច។

នៅម៉ោង ៦ល្ងាច ចាប់ផ្តើមអភិបូជាឱឡារិកនៃក្រុមគ្រីស្ទបរិស័ទជាទីពឹងពំនាក់ នៅ​សាលធំដុនបូស្កខេត្តកែប ដោយមាននិស្សិត លោកគ្រូអ្នកគ្រូចូលរួម និងសមាជិកនៃ​ព្រះសហគមន៍ នៅកំពុងដឹកនាំដោយលោកបូជាចារ្យ យ៉ូហាន និងបងស្រី។ លោកអភិបាល​មាន​ប្រសាសន៍ រំឭកឲ្យសម្របសម្រួលការឯកភាព និងសេចក្តីស្រឡាញ់នៅក្នុងសាលារៀន ដែលគោរពដល់សន្តយ៉ូហានដុនបូស្កូ ជាឧបការីរបស់យុវជន។  នៅចុងពិធីអភិបូជា សហគមន៍​សិក្សាបាន ដើរជាក្បួនពេញបរិវេណ ដើម្បីបញ្ចប់នៅមុខព្រះឈើឆ្កាងដ៏វិសុទ្ធ នៃសន្តហ្រាន់ស៊ីស្កូអាស៊ីស៊ី​កសាងថ្មី នៅ​ជិត​មាត់សមុទ្រ។ ទាំងនេះជាសញ្ញានៃចលនា​បង្រួបបង្រួមនិកាយផ្សេងៗ និង​យកចិត្ត​ទុក​ដាក់​​ចំពោះបរិស្ថាន។ ​ថ្ងៃឧទ្ទិសថ្វាយ​ព្រះនាង​ម៉ារី​ជាទីពំនឹង ពំនាក់ក្រុមគ្រីស្ត បរិស័ទ បានបញ្ចប់ដោយបង្ហាញកម្មវិធី វប្បធម៌។

  1 2 3 4 5 6 7 8 9 10  ...   
 

© Copyright 2014 Catholic Cambodia - All rights reserved.